Almorabetz en Al-Andalus

De Biquipedia
Ir a la navegación Ir a la búsqueda
A maxima extensión territorials d'os almorabetz.

Os almorabetz en Al-Andalus representoron un poder més fuerte que os estatos musulmans d'o periodo d'as primeras taifas, a las que sustituyoron. Consiguioron aturar por bell tiempo l'abance d'os cristians respecto a los musulmans. Si a lo principio representaban un movimiento islamico rigorista defensor d'a ortodoxia sunní, con o tiempo se fuoron relaxando como efecto d'o contacto con a cultura d'Al-Andalus.

En Al-Andalus gubernoron como una superestrutura melitar. L'administración contina en mans de secretarios y alfaquís muladís partidarios d'a ortodoxia sunnita promovita por os almorabetz. A capital d'os almorabetz en Al-Andalus estió Granada dende 1090 dica 1148. L'antiga tolerancia relichiosa relativa se malmete y esto tiene conseqüencias en a composición etnica. Muitos mozarabes fuyen ta o norte cristián, y part d'os que se quedan son deportatos ta Africa. Bells musulmans de territorio cristián son forachitatos ta o sud controlato por as taifas y os almorabetz. S'acelera o proceso de desaparición d'os dialectos mozarabes.

O periodo almorabet fue succedito por un breu periodo de segundas taifas, anterior a la invasión d'os almuades.

Invasión almorabet[editar | editar código]

Os reis taifas de l'Al Andalus aduyaban a lo rei Suqut de Ceuta, que lis feba de barrera contra l'abance Almorabet. O rei de Sevilla ordena a lo gobernador d'Alchazira d'Alfadra que fortificase a costa de Chibraltar. Quan os reyes taifas andalusís se veyen amenazatos por os abances d'Alifonso VI de Castiella y Leyón en Sevilla y Badajoz, a flota sevillana aduya a os almorabetz a prener Ceuta (1083).

Al Almorabetz plegan ta l'Al Andalus en 1086, clamatos por os reis taifas. Luitan contra Alifonso VII de Castiella y Pero I d'Aragón y Pamplona. O emir Yusuf Ibn Tasufín vence a os cristians en Zallaqa. Vencitos os enemigos més importants, prenen dende 1090 o control de totas as taifas menos as d'Albarrazín, Alpuent y Zaragoza, que tardoron más en ocupar porque no podeban atacar-as bien dica que no prenesen Valencia, feito que se desvenió en 1102, con a desaparición de l'estato controlato por o Cit Campiador.

Conquiesta d'o Levant peninsular[editar | editar código]

Quan o exercito puya por Levant lis s'incorpora Abd al-Malik Ibn Hudayl, sinyor d'a Taifa d'Albarrazín. En verano de 1102 hi habió una prebatina d'invasión d'a Taifa de Zaragoza por part d'o cheneral de Valencia. Os Almorabetz ocupan a Taifa d'Albarrazín en 1104. A l'emir Yusuf lo succede o suyo fillo Alí, proclamato hereu en Marráquex en 1102 y en Cordoba en 1103. A lo rei taifa de Zaragoza li heban dato garantías que no sería invadito, y o hereu de Zaragoza, Imad al-Dawla Abd al-Malik, heba asistito a la proclamación de 1103 en Cordoba. A derrota de Val Tierra fa que o cheneral almorabet Muhammad Ibn Al-Hach ocupe Zaragoza o 31 de mayo de 1110. Os Banu Hud se refuchian en Rueda de Xalón y fan liga con Alifonso I lo Batallero.

O segundo gobernador almorabet de Zaragoza, Abu Bakr ibn Tifliwit (1115-1117) deixa una ciudat aislata quan muere y o Batallero la conquista o 18 d'aviento de 1118.

A conquista cristiana de Zaragoza, a fin d'una ofensiva con a derrota de Cutanda en 1120, y la expedición d'Alifonso I lo Batallero por Andalucía yeran una contrimuestra d'a debilidat y decadencia d'os almorabetz. En Marruecos ya se coceba o movimiento almuade.

Os Almorabetz encara tornan a fer atra ofensiva, en 1133, con a batalla de Fraga con desastre cristián, muerte d'o Batallero y retacule d'os cristians aragoneses, nabarros y occitans cristián enta l'ueste. A intervención d'Alifonso VII con o exercito de Castiella y Leyón atura a los almorabetz en Fuents d'Ebro, impedindo de tornen a ocupar Zaragoza.

Zaguers anyos d'os almorabetz en Al-Andalus[editar | editar código]

Os abances melitars d'os almuades en Berbería en a decada de 1130 facioron que os almorabetz fuesen retirando tropas d'Al-Andalus.

Os aragoneses aproveitoron a febleza d'os almorabetz pa resistir y mantener-sen en as suyas posicions, que yeran de dificil defensa dimpués d'a derrota en a Batalla de Fraga. Os cristians aragoneses, nabarros y occitans mantenioron as posicions en Calatayú, Ricla, Epila, Zaragoza, Belchit, Fuents d'Ebro, Piracés, Uesca, Alcalá d'o Bispe, Pueyo de Fanyanars, Balbastro y Benavarri. Habioron de potenciar a Confrairía de Belchit en o Concilio de Burgos de 1136 y de creyar una confrairía nueva en Balbastro en 1138.

Os musulmans andaluces aproveitoron a menor presencia d'almorabetz pa fer revueltas en a decada de l'anyo 1140, coindidindo con a caita de Sichilmasa en mans d'os almuades. Os aragoneses y atros repobladors cristians d'o territorio aragonés tornoron a avanzar en territorio almorabet en os anyos 1141 y 1142 baixo o mandato de Remón Berenguer IV de Barcelona.

O periodo de segundas taifas encomienza en l'anyo 1144, quan os musulmans andaluces se sublevan en a redolata de Mértola y creyan un reino taifa independient gobernato por o rei Ibn Qasi.

Veyer tamién[editar | editar código]