Alans

Os alans fuoron un pueblo iranio y d'orichen sarmata que dica fins d'o sieglo IV yera establito en as estepas d'Europa Oriental a l'este d'os ostrogodos y a lo norte d'o Caucas. A fins d'o sieglo IV o suyo territorio fue invadito por os hunnos y muitos alans s'ixemenoron por Europa y Africa chunto con os pueblos chermanicos que invadioron o Imperio Román, encara que a diferencia d'os chermans nunca no formoron un estato propio en Europa Occidental. Una part d'os alans quedoron en o suyo territorio y atros rematoron en as costeras septentrionals d'o Caucas, on fundoron o reino d'Alania. Os alans caucasians d'a Edat Meya que quedoron dimpués d'a invasión mongol esdevinioron os osetas actuals. Part d'os alans caucasians medievals fuyoron d'os mongols con os cumans y se refuchioron primero en Moldavia (diocesi de Cumania), y dimpués en Hongría. Os emperadors paleologos d'o Imperio Bizantín feban servir a los alans como principals mercenarios quan tamién feban servir a los almogavars.

Os alans en Hispania

O reino anán en Hispania.

O reino vandalo en Africa.

O 31 d'aviento de l'anyo 406 una part d'os alans, que yera baixo o mando de Respendial cruzó o río Rin chunto con part d'os suevos y quasi totz os vandalos y penetroron en o Imperio Román d'Occident dedicando-se a lo saqueyo. En l'anyo 409 arriboron en Hispania, on a población hispanorromana s'habió de defender por os suyos propios meyos, y se repartioron arias d'actuación. Os alans se quedoron a Lusitanica y a Cartachinense.

Os romans ninvioron a los visigodos contra os invasors iranios y chermanicos presents en a Hispania, que fuoron exterminatos en part entre os anyos 416 y 418. Os restos d'os alans emigroron chunto con os vandalos a lo Norte d'Africa y rematoron asimilatos por os vandalos.

S'ha quiesto relacionar o toponimo Mont Alano con o fugaz paso d'os alans en a peninsula iberica. Tamién s'ha quiesto relacionar a los alans con una mayor freqüencia d'os grupos sanguinios B y AB en as provincias d'o centro-ueste on estioron presents con respecto a las atras provincias on no i habió presencia alana.

Os alans en Galia

Os alans que no entroron en Hispania se quedoron en a Galia. Enta l'anyo 414 una horda alana saqueyaba l'aria d'a Garona meya, y atra horda, baixo o mando de Sambida saqueyaba a cuenca d'o Roine arredol de Valence. A colla més poderosa d'alans en Galia yera baixo o mando de Goar, que pasó a lo servicio d'os romans en Renania, y fue acantonata por Aecio en a Loira meya pa controlar a los visigodos y tallar o paso a los hunnos d'Atila. Quan Atila asitiaba Orliens os galorromans consiguioron levantar o sitio gracias a l'aduya d'os alans de Goar. Estos alans tamién luitoron chunto con os romans y visigodos en Campus Mauriacus en l'anyo 451 contra os hunnos. En a "Cronica de los Conquiridors" parlan d'una colla d'alans en Galia que colaboraba con os romans contra os hunnos.

A la fin os alans acantonatos en Galia, que encara yeran nomadas, no complioron o foedus pactato con os romans y ocuporon con os suyos rebanyos nuevas tierras, dedicando-se tamién a lo saqueyo. A fins d'o sieglo V y principios d'o sieglo VI os exercitos alans fuoron destruitos y os restos d'alans s'asimiloron a la población cheneral galorromana.

Mencions en fuents aragonesas

Os alans d'o periodo d'as invasions son mencionatos como alanos quasi siempre, con poquetas excepcions. En a "Cronica de los Conquiridors" parlan d'os alans en o capítol dedicato a Atila:

Pues estos dos hermanos, auiendo grant et cruel exercitu de Huncnos et passando por Germania, inuadieron las Gallias, todas las cosas destruyendo por fierro et por fuego et por rapinas, et talando et matando todas gentes. Finalment pressas las ciudades et derrobadas, assitiaron la ciudat de Orliens : laqualcosa huyendo el emperador Valentiniano, aplego grant exercitu et enbio enlas Gallias al illustre varon Ecio, consul patricio ; elqual, ydo enlas Gallias, priso consi a Theodorico, rey de los Ystregodos, fillo qui fue de Criario rey, hermano de Uallamer et de Todomir, delos quales es fecha mencion de part de suso enla vida de Honorio et de Theodosio. Mas por meritos de sant Auiano, bispe de la dicha ciudat, Diosguardo la ciudat de poder delos enemigos, et assi como sant Guibilino, rey delos Alanos, por el miedo que auien de Atilla, lo huuies permesso liurar la dicha ciudat, Dios por meritos del dicho santo quiso que aquella cosa fues reuelada. Atendiendo et alos otros reyes delos Videgodos et occuparon la ciudat, et porque auian sospechoso a san Gibilindo, fizieron bien guardar la ciudat, et ordenaron que lo pusiessen en medio de la batalla con su gent ; et Atilla que lo supo huuo miedo dela batalla et demando de nueuas a algunos que yuan dela part delos enemigos, et dixieronle que sus enemigos no eran tantos ni tan bien ordenados como le auien dicho et que no le calie temer dela batalla; mas no le dizien verdat. Et era enlos campos de aquellas partidas vna altura o montanya la qual cada vno delos exercitus cuydauan occupar, et prisieron los Huncnos la diestra part et los Romanos con los Godos la siniestra; los quales desordenaron por tal manera que pusieron ala part diestra de lur batalla, atendendo con los Uidegodos ala siniestra.

Tamién los mencionan en a "Cronica de Sant Chuan d'a Penya.

Et depues de aquesti Valient; et en tiempo de aquesti los godos tenyan lur senorya mayor en Tolosa. Et aquesti rey prendió las tierras de Bética et de Galicia, las quales tenían los vándalos et los alanos; et depues de aquesti Goodorenus; et depues su filio Turison; et depues su hermano Trodoricho. Et depues de aquesti regnó su hermano Euricho. Et aquesti prese en España la prouincia de Tarragona, et depues de aquesti regnó su fillo Alarico;

Una d'as pocas excepcions ye en a traducción herediana de "Historia Romana" de Pavlo Diacono on podemos leyer alans:

et fuert Jnstruydas en armas et en cauallos co es alans hunos et godos se combatio theodosio con ellos en muchas g(ran)des batallas

et fizieron foyr el enemigo vltra mar / En aquel t(iem)po demientre los vuandalos et los alans tribulauan espanya honorio enuio a defesar aq(ue)lla castino duque co(n) huest

et entretanto fueron en ayuda de los Romanos los burgunyo(n)s et los alans con ssa(n)gibano lur Rey elos franceses et los Saxons / Ripariols bretones Sarmates armocians licians et quasi los pueblos de todo occident

Os cans que presuntament introdució en Occident este pueblo iranio yeran conoixitos como alans, y en os conflictos d'a Unión Aragonesa contra a monarquía se menciona un can alán que causó un problema:

hombres, e después a pocos días el Bort de Concud hubo brega en la ciudat con los de la dita Unión sobre qui un alán que traya en dito Bort, del dito rey, mordió a uno de la ciudat, por lo que se albolotó la ciudat contra el dito Bort, et fueron armados...

Os alans caucasians (orichinarios d'o Reino d'Alania) son mencionatos en o "Libro de los Emperadors" como alanes (os textos medievals no gosaban representar graficament os plural en -ns de l'aragonés). Manimenos en a Cronica de Morea los mencionan como alanos.

En aquesti tempo l'emperador fizo un fillo con su esposa María, la cual era de la generación de los alanes, al cual puso nombre Costantino; e aprés lo han coronado emperador.

En "La Flor de las Ystorias d'Orient de Haitón, tradueita por a escuela de Chuan Ferrández d'Heredia nombran l'antiga Alania como Comarca Alame y Aloen como una rechión d'Armenia:

Enel Regno de iorgie deues orient comarca a vna grant montanya q(ue) es clamada alborc et aquí habitan muchas naçiones de gentes et por aq(ue)sto es clamada aquella comarca alame et de aq(u)i se stiende el Regno de iorgie por ocçident deues septemtrion entro ha vnas prouinçias del Regno de turquia el luengo del regno de Iorgie se stiende por la ribera de la Mar Mayor deues mig iour et comarca con Erminia la Grant.

exçeptuado el regno de Beas, que es en Gorgie, et vna encontrada del regno de Arminia que es clamada Aloen. Aquestas dos encontradas se tuuieron contra los moros.

Chuan de Mandevilla leyó a Frai Haitón y en transmitió as informacions sobre o Caucas y Armenia. D'esta traza en a versión aragonesa d'o "Libro d'as Marabillas d'o Mundo" parlan de l'aria de Darial, (Dar-i-Alán, puerta d'os alans), on encara hue viven os osetas d'o Caucas y la nombran como Tierra Alamo:

empues es el Regno de georgie qui comiença vers vna montaynna grant qui es clamada absor do fincan muchas diuersas gentes de diuerssas nationes et claman la tierra Alamo.