Ala (zoolochía)
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Ista pachina tracta sobre as alas en zoolochía. Pa atros emplegos d'ala, se veiga Ala (desambigación).
As alas son as estremidatz d'os animals que s'emplega pa volar, presents en as aus, en os insectos y, entre os mamiferos, en os quiropteros. En un pasau remoto tamién en teneban os pterosaurios. En toz ixes grupos biolochicos tan diferents, a presencia d'alas ye un caso clasico de converchencia evolutiva.
Existe atros grupos d'animals que se gosan desplazar por l'aire, pero lo fan sin estar capables de fer-lo de traza autonoma, mas bien planeyando. Os ditos animals tienen estructuras alternativas que fan a función de desplazamiento, como a piel (petachio) d'os mamiferos dermopters y bel radedor (como en os esquiruelos voladors), una membrana entre os didos (como en a rana voladera de Wallace) u una membrana de piel entre as costiellas (como en o fardacho Draco volans).
Insectos[editar | modificar o codigo]
En os insectos, as alas dimanan d'expansions d'o tórax. Nomás i ha alas en os adultos (imagos), y en tienen de regular dos pars.
As alas d'os insectos son membranosas, con nervacions reticulars y mas u menos abundants en función d'o taxon. Son transparents, pero tamién pueden estar de colors diferents y plegables u no, seguntes as deixen estendidas u no cuan se posan. As caracteristicas d'as alas son un factor important en a taxonomía d'os insectos.
Bellas órdens d'insectos tienen alas particulars y ixo ye una d'as caracteristicas definideras d'o taxón en custión. Por eixemplo, os coleopters y os ortopters tienen o primer par d'alas enduriu, mas tierco, o que les sirve pa guardar-ne o segundo debaixo. Iste par d'alas modificadas en istes animals recibe o nombre d'elitros.
Un atro eixemplo son os dipters. En os dipters, o segundo par d'alas ye reduciu a un apéndiz que se diz halterio y que ixes animals emplegan pa equilibrar-se entre o volido. As paixarelas y as palometas (que chuntas forman a orden Lepidoptera) tienen alas desproporcionadament grandes (mesas en comparanza con atras órdens) y que son cubiertas d'un polvo feto d'escamas finismas, imperceptibles a uello humano, que son as que le dan nombre: λεπίδος, lepídos ye escama en griego.
Aus[editar | modificar o codigo]
En as aus, son as estremidaz anteriors as que les fan volar y lievan as plumas, que se comportan como superficie sustentadera pa o volido.
As plumas remeras son plumas granizas, prolargadas y firmes, y son as que mayor importancia tienen en as aus pa volar. Combinan estar robustas con flexibles, por o que aportan valors principals que dimpués definen as caracteristcas de volido de l'animal. De feto, cuan quiere privar-se que una au voladera vuele, como pasa entre a volalla d'un corral, en hai prou con tallar-les-ne (istas plumas, no pas l'ala), cosa que no les fa garra mal.
As remeras primarias, ixo ye, as que i ha en a ladera de l'ala, son as responsables d'a potencia de volido. Pa seguir o rumbo, l'animal puede ubrir y zarrar as que i tiene en a parte mas estrimera. As remeras secundarias son mas numerosas y de forma mas regular, pero mas chicas que as primarias, y se fienden menos en a carne. As secundarias intervienen menos con o volido, pero son necesarias pa dar-le buena sustentación; por ixo s'orientan a favor de l'aire.
As plumas d'as aus ofreixen una gran variedat de formas y colors. En i ha como os pingüinos, que en tienen curtetas y minusculas que no les sirven si que pa nadar, y tamién atras, como os kiwis (Apteryx) que tienen plumas primitivas y rudimentarias, con filamentos que aparentan estar pelos. En os estrucios y as gallinas, que son aus no voladeras, as alas son reducidas y sirven pa poco. Por contra, entre as aus que vuelan en i ha muit desenvolicadas, mesmo si entre ellas i ha diferencias importants; curtas y arronchadas entre as aus de volidos curtos, como os paixaros, pero tamién i ha alas grans entre as aus de volido largo y lento, como as grudas, as cigüenyas y os garrapescaires, y largas pero tamién estretas y punchudas entre as aus de volido largo y rapido, como as volandrinas, os albatros y as gaviotas.
Quiropters[editar | modificar o codigo]
.jpg)
Entre os muriciegos, as estremidaz anteriors y os didos fan de suporte pa una membrana de piel (petachio) que les permite o volido. Os quiropters son os solos mamiferos que vuelan (volido activo, no pas planeu).
L'ala d'os muriciegos ye por tanto homologa de la man humana ubierta y va cubierta de la dita membrana (petachio). Os quiropters tienen un volido lento pero muita maniobrabilidat.
Mitolochía[editar | modificar o codigo]
Os antigos griegos le meteban alas a l'amor, a victoria y a atras virtuz y divinidaz que dimpuesas s'ha representau sin ellas. En son eixemplos: Minerva, Diana, Venus, etc.
En mutos molimentos antigos y principalment en os que se diz impropiament etruscos, as alas no son si que l'alegoría y representación d'a lechereza. Por ixa mesma razón, os poetas han meso alas a las sirpients de Ceres, a Pegaso, a os caballos de Pelops, a o carro de Triptolemo, a o rayo, o caducio, etc.
As alas mitolochicas pueden estar fixas u móbils. Entre ixas zagueras se conta as alas que Mercurio se cenyiba contra o petaso u chambergo, u contra las sandalias. As alas que lievan as personificacions de Victoria y as Erinias son ligadas contra o peto con cintas.
D'acuerdo con Platón, as alas son hieroglifico que reprsenta a intelichencia. Y as alas d'oro que Orfeu le da a lo primer fillo de Saturno serían, por tanto, un símbol d'a sabieza de l'alma d'o mundo d'acuerdo con as ideyas platonicas.[1]
Referencias[editar | modificar o codigo]
- ↑ (es) B. G. P. (1835). Diccionario universal de la mitología o de la fábula. José Taul.
