Al-Musta'in II

De Biquipedia
Ir a la navegación Ir a la búsqueda
Arabic components (letters) in the word Allah.svg Iste articlo contién transliteracions de l'alfabeto arabe. Ta mas información veyer "Transliteración de l'alfabeto arabe a l'aragonés".
Al-Musta'in II
أحمد بن يوسف المستعين‎
Rei d'a Taifa de Saraqusta

1085 - 1110
Predecesor Al-Mutamán
Succesor Abdelmalik

Nombre real أحمد بن يوسف المستعين‎
Naixencia ?
Muerte 1110
Val Tierra
Dinastía Hudín

Áhmad al-Mustaín II (en arabe أبو جعفر أحمد بن يوسف بن هود المستعين بالله, Abū Ŷaʿfar Aḥmad ibn Yūsuf ibn Hūd al-Mustaʿīn bi-Llāh) estió o quarto rei d'a dinastía hudín d'a taifa de Saraqusta (1085-1110).

Mientres o reinau d'Áhmad al-Mustaín II l'avance d'os aragoneses Cinca abaixo y en as comarcas de Uesca ye ya muit important, y a isto se suma o feito de que a resta d'as taifas, embrecadas en guerras y debilitadas dimpués d'a conquiesta de Toledo por o poderoso Alifonso VI de Leyón, no podeban aduyar-le.

Devant d'ista situación, al-Mu'támid d'Isbiliya (Sevilla) pidió a os reis de Batalyaws (Badajoz) y Garnatah (Granada) que s'unieran a ell ta pedir a intervención de Yúsuf ibn Tasufín, emir d'os almorabetz, que acudioron en aduya d'as taifas hispanas y consiguioron vencer a la coalición de reinos cristianos, encabezaus por Alifonso VI de Leyón y Castiella en 1086 en a batalla de Sagrajas. Ista redota libró a Saraqusta d'a presión d'os cristians por un tiempo: en 1086 a ciudat yera setiada por Alifonso VI que habió de devantar o setio ta enfrontinar-se a los almorabetz.

En 1090 o imperio almorabet reunificó as taifas como protectoraus chusmesos a o poder central de Marráquex y destituyioron a totz os reis de taifas fueras d'al-Mustaín, que conservó buenas relacions con os almorabetz, gracias a lo que se mantenió como reino independient, ya que, en estar una zona mugant d'al-Ándalus con os cristians, estió l'unico territorio que evitó a unificación almorabet.

Manimenos, os cristians continaban enantando. En 1089 cayió Monzón, en 1091, Balaguer y en 1096, Wasqa (Uesca) dimpués d'a batalla d'Alcoraz. Ta mirar d'oposar-se a o reino d'Aragón, al-Mustaín heba de bosar fuertes parias a o suyo protector, Alifonso VI de Castiella.

Al-Mustaín consiguió mantener un dificil equilibrio politico entre dos fuegos, pero en 1110 fue redotau y muerto en a batalla de Val Tierra, amán de Tudela, por Alifonso I lo Batallero, que ya heba preso Exeya y Taust.

Bibliografía[editar | editar código]

  • CERVERA FRAS, M ª José, El reino de Saraqusta, Zaragoza, CAI, 1999. ISBN 84-88305-93-1
  • CORRAL, José Luis, Historia de Zaragoza. Zaragoza musulmana (714-1118), Zaragoza, Ayto. de Zaragoza y CAI, 1998. ISBN 84-8069-155-7
  • MONTANER FRUTOS, Alberto, "Introducción histórica" al capítulo "El palacio musulmán", en: Bernabé Cabañero Subiza et alt., La Aljafería (vol. I), Zaragoza, Cortes de Aragón, 1998. págs. 35-65. ISBN 84-86794-97-8
  • VIGUERA MOLINS, Mª Jesús, Aragón musulmán, Zaragoza, Mira editores, 1988. ISBN 84-86778-06-9
  • VIGUERA MOLINS, Mª Jesús, El islam en Aragón, Zaragoza, CAI, (Col. «Mariano de Pano y Ruata», nº 9), 1995. ISBN 84-88305-27-3


Predecesor:
Al-Mutamán
Rei taifa de Saraqusta
1085 - 1110
Succesor:
Abdelmalik