Aiguabarreig (Mequinenza)

De Biquipedia
Ir a la navegación Ir a la búsqueda
Aiguabarreig
Vista General Aiguabarreig.jpg
Aiguabarreig de Mequinenza
Datos chenerals
Tipo Reserva Natural
Establito 2001
Superficie 36.724 ha
Situación
Situación Flag of Aragon.svg Comarca d'o Baixo Cinca (Zaragoza)
Latitut
Lonchitut
Mapa
Val de l'Ebro (orografía).png
Yellow ffff00 pog.svg

L'Aiguabarreig ye un espacio natural de gran trascendencia como aria de reproducción, invernada y descanso de fauna migratoria ubicada en Mequinenza (Aragón). Constituye o mayor forcallo fluvial d'a peninsula iberica (con a unión d'os ríos Ebro, Segre y Cinca), una d'as mas grans d'Europa y una d'as qualas tiene mayor intrés biolochico y ambiental en Espanya.

O termin "aiguabarreig" proviene d'a parola d'orichen catalán que designa la mezcla d'auguas en o puesto en o qual dos u mas corrients d'auguas se chuntan y forman una sola. O Aiguabarreig Segre-Cinca-Ebro se forma en o momento que o río Cinca aporta as suyas augua a o río Segre, en o termin municipal de La Granja d'Escarp/La Granja d'Escarp, y a la suya vegada istas son aportadas a o rido Ebro, ya en Mequinenza.[1]

Marco cheografico[editar | editar código]

Territorialment se troba en o centro d'a depresión meya de l'Ebro. Muga a o ueste con os Monegros, a o este con os tozals de Montmeneu y Almatret y enta o sud con a coda d'o entibo de Ribarroya. Iste gran espacio natural ye dividiu entre dos comunidatz autonomas (Aragón y Cataluña) y as suyas extremidatz en dos comarcas; Segrián para Catalunya y Cinca Baixa en Aragón. O Segre y a Cinca forman un primer forcallo entre as poblacions de La Granja d'Escarp, Massalcoreig y Torrent d'a Cinca, as dos primeras en territorio d'a comunidat de Catalunya y a tercera en o territorio d'a comunidat d'Aragón, a pocos kilometros converchen con as auguas de l'Ebro, ya en o termin municipal de Mequinenza.

L'Aiguabarreig de Mequinenza ye controlau por a ZEPA Matarranya-Aiguabarreig, d'as qualas 7.417,26 ha se sitúan en o municipio de Mequinenza. A ZEPA engloba a zona central d'o Aiguabarreig, dende Torrent d'a Cinca, tot o espacio fluvial de Mequinenza dica a unión con o río Matarranya en a comarca homonima. Para a cuenca d'o río Matarranya, a ZEPA incluye os municipios de Fayón, Nonasp, Favara y Maella.[2]

Paisache[editar | editar código]

En l'Aiguabarreig trobamos cientos de metros d'amplaria d'augua, con a-saber-las mechanas y selvas de ribera, d'as mas extensas de l'Ebro, grans masas de carrizal, plachas de ruellos, gorgas y galachos. Ye tamién punto de confluyencia d'a flora esteparia, provenient d'a zona arida de Monegros y a flora mediterrania que puya por a val d'Ebro, incluyindo qualques elementos propios d'a montanya.

A entrelazada conexión d'as riberas fluvials y as lagunas con un entorno arido y mediterranio a on abundan os cinglos verticals y a la vegada as planas de frutals le atorgan ista riqueza biolochica excepcional.

O paisache ye d'un gran contraste entre o gran humedal que forman a unión d'os ríos Ebro, Segre y Cinca y l'aridez circumdant, circumstancia que fa d'iste puesto un punto estratechico para muitas aus, ya sía pa invernar, pa reproducir-se u como que punto d'aturada en o largo recorriu migratorio.

O feito d'estar ubicau en plena depresión de l'Ebro y a proximidat d'o Parque natural d'o Delta permiten a l'Aiguabarreig convertir-se en un extraordinario conector biolochico.[3]

Vechetación[editar | editar código]

En l'Aiguabarreig se troba vechetación repoblada de pino albar (Pinus halepensis). Tamién i hai arbustos, caracterizaus por a presencia de romero (Rosmarinus officinalis) y qualques especies termofilas, estando freqüent que en o suyo sino amaneixcan chicotas masas de rebollers (Quercus coccifera) u sabinas negrals (Juniperus phoenicea). Existen tamién qualques especies caracteristicas tals como que l'urmo blanco (Populus alba), a salguera (Salix alba) u o tamariz (Tamarix gallica), y helofitos como a canya pita (Phragmites australis) u xisca (Typha domingensis).

Biodiversidat y aus[editar | editar código]

Forcallo d'Ebro, Segre y Cinca en Mequinenza.

Gracias a istas caracteristicas conviven especies d'ambients bien opuestos an as aus son o grupo mas destacau, abarcando dende colonias de ardeídas, en as islas fluvials, a tot tipo de rapinyaderas, asinas como aus propias d'ambients disierticos, incluindo una extensa representación d'especies tasas y menazadas en Europa. Atros grupos faunisticos bien representaus son: reptils, anfibios y mamiferos, istos zaguers, con una extraordinaria representación de diferents especies de moriciegos (Chiroptera), una abundant población de ciervos (Cervidae), corzos (Capreolus capreolus), presencia d'a sichilosa loria (Lutra lutra) y o cada vegada mas abundant bucardo (Capra pyrenaica), podendo-se plegar a observar dende o mesmo lugar u en o castiello de Mequinenza. Os endemismos son notables en a entomofauna y dentro d'as auguas, de conchunta con a penchinchas (Margaritifera auricularia), subsisten con dificultat (por os efectos d'os entibos y a introducción d'especies piscicolas con fins esportivas) poblacions de peixes autoctonos como o burret (Salaria fluviatilis).

L'acumulación de sedimentos en a coda d'o entibo de Ribarroya ha permitiu que a lo largo d'os zaguers anyos s'haigan constituiu diferents mechanas entre as confluencias en primeras d'o Segre con a Cinca dica plegar a l'Ebro, ya en a población aragonesa de Mequinenza. D'entre todas ellas cal destacar l'illa dels Martinets que s'ha convertiu a lo largo d'os anyos en una important colonia de nidificación pa muitas especies d'ardeidas, como o pescairet boyero (Bubulcus ibis), o pescairet blanco (Egretta garzetta), l'abetoret (Ixobrychus minutus), o martinet (Nycticorax nycticorax), a garrapescaire blanca (Ardea alba), a garrapescaire (Ardea cinerea) y a garra royenca (Ardea purpurea), a las qualas en os zaguers anyos s'ha adhibiu o pescairet de lusco (Ardeola ralloides) y a on invernan bien camuflaus entre as masas de canya pita, uns poco eixemplars d'avetoro (Botaurus stellaris).[3]

Vueitres en l'Aiguabarreig de Mequinenza.

As selvas de ribera y canya pita bien conservadass y de gran amplaria albergan una población ornitica, interesant y bien nutrida, que puet estar observada a lo largo de tot l'anyo, aprofitando as diferents fases d'iste ecosistema; ralidos, picidos, turdidos, paridos, fringilidos u embericidos. Arredol d'a estepa trobaremos: o sisón común (Tetrax tetrax), a chorla (Pterocles orientalis), a ganga (Pterocles alchata), o gai azul (Coracias garrulus), o calandrionet (Calandrella brachydactyla) y a charreta (Calandrella rufescens), por destacar qualques d'as mas emblematicas, y en as arias de transición entre istos espacios: a papafiga de uello blanco (Sylvia hortensis) y a papafiga tremonzillera (Sylvia conspicillata), o solitario (Monticola solitarius) y a cudiblanca negra (Oenanthe leucura) y a cudiblanca albarica (Oenanthe hispanica), por citar qualques d'as mas representativas. Entre os arbustos de canya pita se dan cita especies d'insectos como o Calopteryx virgo, Sympetrum flaveolum, Ishnura pumilio y mesmo o caballico d'o diaple (Anax imperator).

Pa rematar, destacar os cinglos caracteristicos d'a val d'Ebro, y que sin puesto a dubdas albergan a un important grupo d'especies rupicolas, en especial rapinyaderas, podendo-se observar sin gran dificultat muitas d'ellas, entre las cal destacar qualques d'ellas con un gran intrés de conservación, a libel nacional y autonomico, por citar qualques d'ellas; o vueitre (Gyps fulvus), a voleta (Neophron percnopterus), l'aliga reyal (Aquila chrysaetos), l'aliga perdiguera (Hieraaëtus fasciatus), l'aliga chicota (Hieraaetus pennatus), l'alica blanca (Circaetus gallicus), o esparvero común (Buteo buteo), l'aguilot (Circus aeruginosus), o milano negro (Milvus migrans) y a milaneta (Milvus milvus), o falcón peregrín (Falco peregrinus) y o bubón (Bubo bubo).[4]

Os anfibios y reptils identificaus en l'Aiguabarreig son o zapo partero común (Alytes obstetricans), o Pelobates cultripes, o Pelodytes punctatus, o zapo común (Bufo bufo), o ranueco (Bufo calamita), a granota (Pelophylax perezi), o galapago leproso (Mauremys leprosa) y a tortuga d'arrigachuelo (Emys orbicularis), a salamanquesa común (Tarentola mauritanica), a sargantana colirroya (Acanthodactylus erythrurus), o engardaixo (Timon lepidus), a sargantana iberica (Podarcis hispanica), o furtarropas (Psammodromus algirus), a Psammodromus hispanicus, a culebra d'escalera (Rhinechis scalaris), a Coronella girondica, o culebrizo (Malpolon monspessulanus) y o escruzón (Natrix maura).

Patrimonio cultural[editar | editar código]

Edificio d'o Museo d'a Historia de Mequinenza.

A pesca esportiva y a navegación son dos d'as actividatz mas freqüents. L'Aiguabarreig ye, gracias a la pesca, un punto d'intrés internacional con cientos de pescataires, particularment centroeuropeos, que visitan cada anyo istos ríos y desfrutan de l'extenso ret d'ufiertas existents arredol d'ista actividat. As especies de peixes introducidas, de gran atracción pa o pescador, son sobre tot o black bass, o lucio-perca u o conoixiu siluro. No hemos d'ixuplidar os cientos de naturalistas que visitan cada anyo a zona, atraitos por a suya gran diversidat biolochica, particularment os ornitologos.

O entorno de l'Aiguabarreig ye marcau por a cuenca carbonifera de Mequinenza y os mas de 150 anyos d'historia minera en a localidat. A extracción de lignitos y o suyo transporte ha marcau os lugars d'o Aiguabarreig, dau o suyo estreito vinclo con os ríos. Simbolo son os extinguidos "llauts", unas embarcacions que manteneban unidas as personas y a cultura de todas as villas riberenyas. Encara pueden veyer-se diferents espacios de patrimonio industrial minero arredol d'os ríos que as suyas auguas sirvioron pa transportar o carbón en unas embarcacions tipicas de Mequinenza conoixidas como que "llauts".[1]

Os Museos de Mequinenza se centran en o patrimonio minero y historico d'o Lugar Viello de Mequinenza que estió demolido y inundau baixo as auguas d'o rido Ebro dimpués d'a construcción d'os entibo de Ribarroya y Mequinenza. En o Museo d'a Mina se puede visitar una mina de carbón autentica de mas d'un kilometro de recorriu interior con material historico y maquinas que han estau utilizadas pa la extracción de carbón entre mas de 150 anyos en a cuenca minera de Mequinenza. En o Museo d'a Historia de Mequinenza se puede recorrer o pasau d'a población, dende a Prehistoria dica o espaldo d'o lugar viello de Mequinenza asinas como un espacio dedicau a o escritor mequinenzano Jesús Moncada.

O castiello de Mequinenza s'alza quasi a o canto d'un gran cinglo chusto en a confluencia d'os ríos Ebro, Segre y Cinca en Mequinenza. O suyo planta ye un quadrilatero irregular, con siet torretons rectangulars fueras d'un, o mas robusto, que ye de planta pentagonal. Pocas fortalezas tendrán un millor emplazamiento que ista, alufrando un amplo y impresionant paisache sobre a confluyencia d'os ríos y as suyas tierras circumdants aconseguindo veyer en días serenos os Pireneus. O edificio ye un autentico castiello-palacio, un d'os millors que l'arte gotico deixón en a Corona d'Aragón, datau en os sieglos XIV y XV.[5]

Parte de l'antiga población de Mequinenza puet visitar-se hue en día porque s'ha convertiu en un gran parque d'a memoria a l'aire libre dimpués d'o suyo espaldo y inundación por os pantanos de l'Ebro. S'han recuperau d'entre as runas os trazaus orichinals d'as carreras y d'as casas que quedaban por alto d'o libel de l'augua. A Mequinenza antiga, o “Lugar Viello” como que la conoixen os mequinenzanos, ye una invitación a pasear por a memoria d'as suyas carreras y carrerons, a redescubrir parte de l'antiga ilesia, a imachinar os antigos muelles y conoixer mil historias, curiosidatz y leyendas d'aquella milenaria y historica villa de navegants y miners a canto d'o río Ebro.[6]

Existen quantos abrigos d'arte rupestre en a redolada de Mequinenza, denominaus barranco de Campells III, Valbufandes III y Valbufandes IV y catalogaus como Patrimonio d'a Humanidat por a UNESCO.[7] Istas manifestacions d'arte rupestre reciben tamién a maxima protección churidica seguntes a Lei 3/1999, de 10 de marzo, de Patrimonio Cultural Aragonés.

Referencias[editar | editar código]

  1. 1,0 1,1 (es) Una visión multidisciplinar del patrimonio geológico y minero. Pedro Florido. IGME. ISBN 978-84-7840-836-8
  2. (es) MATA-PERELLÓ, J.M. y COLLDEFORNS i CHERTÓ, B. (2001). Itinerario Minero y Geológico entre Serós y Mequinenza (Segrià-Baix Cinca, Depresión Geológica del Ebro). Los Itinerarios Minero-Geológicos, una forma práctica para el aprendizaje de las Ciencias y Técnicas de la Tierra. Actas del Primer Simposio Ibérico sobre Geología, Patrimonio y Sociedad. Tarazona.
  3. 3,0 3,1 (ca) Carceller, F. & Chacon, G. 2003. L’aiguabarreig on s’uneixen els rius més cabalosos. Mètode 38: 52-59.
  4. (es) Naturaleza de Mequinenza
  5. (es) Castiello de Mequinenza
  6. (es) www.museosdemequinenza.com
  7. (en) Unesco

Vinclos externos[editar | editar código]