Adolfo Arnal Gracia

Adolfo Arnal Gracia
Consellero d'Agricultura d'o Consello Rechional de Defensa d'Aragón
7 d'aviento de 1936 – marzo de 1937
President	Joaquín Ascaso Budría
Gubierno	Gubierno Ascaso
Precediu por	José Mavilla Villa
Succediu por	Isidro Miralles García
Consellero d'Economía y Abastos d'o Consello Rechional de Defensa d'Aragón
16 d'octubre de 1936 – 7 d'aviento de 1936
President	Joaquín Ascaso Budría
Gubierno	Gubierno Ascaso
Succediu por	Evelio Martínez Vicente

Naiximiento	1911 Zaragoza (Comarca Central, Aragón)
Muerte	¿24? de ferero de 1938 Alfambra (Comunidat de Teruel, Aragón)
Atras afiliacions politicas	CNT
Profesión	Obrero mecanico y anarcosindicalista

Adolfo Arnal Gracia (Zaragoza, 1911 - Alfambra, ¿24? de ferero de 1938) estió un obrero mecanico y anarcosindicalista aragonés, qui estió primero consellero d'Economía y Abastos y dimpués consellero d'Agricultura d'o Consello Rechional de Defensa d'Aragón.

Biografía

Dentró en 1929 prou choven a la Confederación Nacional del Trabajo que ta par d'alavez, en os zaguers anyos d'a dictadura de Primo de Rivera, yera una organización clandestina. Fue eslechiu vicesecretaire en o primer comité de 1931. Adolfo Arnal estió un d'as feguras prencipals d'a CNT y d'a Federación Anarquista Iberica (FAI) en a capital aragonesa. Fue nombrau secretaire d'o sindicato anarquista en 1935, fendo un important papel organizativo en o congreso extraordinario d'a CNT de mayo de 1936 y chugando tamién un rol important en a dinamica d'expansión d'o sindicato por ixas envueltas.

Dimpués d'o golpe militar de chulio de 1936, Adolfo Arnal esfendió a tesi d'una resistencia pacifica y una contención d'a fuerza sindical, expresada a traviés d'una bada cheneral, debant d'a postura de Miguel Chueca, qui pidió a recullida d'armas pa fer frent a os sublevaus. Manimenos as accions d'os chenerals y oficials sublevaus en a capital zaragozana, primero con retadas y treslaus d'integrants y afiliaus obrers y politicos y dimpués con afusilamientos masivos, facioron que ista resistencia pasiva se tornase imposible.

Aznar salió d'a capital conseguindo en setiembre d'ixe mesmo anyo arribar dica as linias d'o frent, en a parti oriental d'Aragón. En plegar ta as localidaz de Fraga y Casp fue nombrau consellero d'Agricultura d'o Consello d'Aragón que s'heba organizau en ixas comarcas. En febrero de 1937 asiste a o congreso d'actividaz agrarias de Casp, a on proposó a creyación d'un organo de credito que fue acceptau. En marzo de 1937 deixa o suyo cargo en o consello pa dentrar en l'Exercito Popular, a on comandaría una sección d'a 125^ena Brigada Mixta (perteneixient a l'antiga 28^ena División, d'a que estió comisario). Morió en febrero de 1938 entre as operacions republicanas pa neutralizar o seche de l'exercito franquista sobre a capital teruelana mientres a batalla de Teruel.

Vinclos externos

Predecesor: José Mavilla Villa	Consellero d'Agricultura d'o Consello Rechional de Defensa d'Aragón 7 d'aviento de 1936 - marzo de 1937	Succesor: Isidro Miralles García
Predecesor: Evelio Martínez Vicente	Consellero d'Economía y Abastos d'o Consello Rechional de Defensa d'Aragón 16 d'octubre de 1936 - 7 d'aviento de 1936	Succesor: Dengún

Datos: Q84515066