Circasians

Circasians
Rechions con comunidatz importants
Rusia, Turquía, Chordania
Idiomas
Luenga circasiana
Relichión
Islam

Os circasians son un conchunto de pueblos con un orichen común de luenga caucasica nordoccidental. Antigament habitaban a ribera d'o Cubán y as planas d'o norueste d'o Caucaso pero muitos prefioron emigrar ta o Imperio Otomán a estar sozmesos por os rusos y actualment a distribución d'os circasians en o suyo país orichinal ye en forma d'enclaus sin continuidat territorial. En Turquía son o 2,1 % d'a población y son lumerosos en a rechión d'Adana. Tamién son lumerosos en Chordania y bi n'ha comunidatz en Israyel.

Modo de vida tradicional

Bi ha circasians agricultors. As tierras d'os circasians que se'n fueron perdioron productividat quan los sustituyoron os ucranians y rusos que no conoixeban as tecnicas de cautivo. A pasta de panizo ye fundamental en l'alimentación tradicional d'os circasians.

Organización social

Tienen un codigo moral tradicional. O circasians son famosos en Orient Meyo por a honradeza, y en Chordania costituyen a escolta cerimonial d'o rei. A familia ye extensa y muito unita, y bi ha respeto a los agüelos. O matrimonio con una presona que comparta l'apellito d'o padre u d'a madre ye prohibito. Enantes de 1864 no i heba una autoridat central. Os shapsugui y natujais yeran republicans y atras tribus yeran se gobernaban con o feudalismo.

Luenga

A luenga circasiana tien cierto grau d'intercomprensión con l'abkhasio y l'abazo. As primeras prebatinas d'escribir o circasián son d'o sieglo XIX. Bi ha dos standards, o circasián occidental, basato en a parla temirgoi, y o circasián oriental, basato en a parla bacsana de bells cabardos. O circasián oriental s'escribiba en alfabeto arabe dica 1924, quan fue cambeyato por l’alfabeto latín. En 1936 l'alfabeto latín fue cambeyato por o cirilico, O circasián occidental s'escribiba en alfabeto arabe dica 1928, quan fue cambeyato por l'alfabeto latín. En 1938 l'alfabeto latín fue cambeyato por o cirilico, pero con una variant diferent pa dificultar a comunicación escrita con os que charran circasián oriental, abkhasio u abazo.

Relichión

Actualment a mayoría d'os circasians son musulmans sunnitas d'a escuela hanafí, enantes estioron cristians, y entre os cabardos bi ha una minoría cristiana ortodoxa rusa. A cristianización y a islamización d'os circasians estió superficial y mantenioron dica fa poco tiempo muitas creyencias y practicas paganas, como a dendrolatía. Comparten con os Osetas un ciclo de literatura epica (os Nartos) con temas pagans que se remontan a la mitolochía scita, sarmata y alana.

Historia

Os circasians teneban relacions con o Imperio Bizantín, y dende o sieglo XII teneban relacions comercials y culturals con Italia. Circasia fue invadita por as tropas de Tamerlán a fins d'o sieglo XIV. A caita de Costantinoble en 1453 fació que o comercio con Italia s'aturase. Os movimientos de población que i habió quan o Khanato d'a Horda d'Oro entró en decadencia facioron que os circasians emigrasen enta o sudeste empentando a los alans-osetas enta l'este.

Os primers contactos entre circasians y rusos se producioron en o sieglo XVI, quan se creyoron os primers puestos cosacos pa cosirar a muga con os pueblos d'o Caucaso. Ivan o terrible se casó con una princesa cabarda. Por o tractato de Adrianopolis en 1829 o Imperio Otomán cedió as tierras d'os circasians a lo Imperio Ruso. Os circasians nunca no heban reconoixito o protectorato otomán, y doncas no reconoixeban o dreito de ceder tierras a los rusos.

A derrota final se produció en 1864, dende ixe anyo a metat d'os aborichens caucasians d'o norueste se refuchioron en o en o Imperio Otomán: os emigratos yeran principalment circasians occidentals, pero con ellos tamién emigroron totz os ubikhes y muitos abkhasios. O exodo estió rapedo y no yera organizato, y mils en morioron de camín. As tierras d'os circasians fuoron ocupatas por ucranians y rusos. Os otomans asentoron a los circasians en l'Armenia Otomana y tamién en Dobrucha y Siria (que en ixe tiempo comprendeba os actuals Israyel, Palestina y Chordania).

Os circasians arribatos en Adana contribuyoron a lo desembolique d'o cautivo d'o cotón en a part oriental de Cilicia.

Bibliografía

• Felipe Fernández-Armesto. LOS HIJOS DE ZEUS. PUEBLOS, ETNIAS Y CULTURAS DE EUROPA. 1996 Grijalbo.