Venecia Chuliana

De Biquipedia
Ir ta: navego, busca
Cambeos de muga en Venecia Chuliana entre 1918 y 1954.

Venecia Chuliana u Marca Chuliana ye una rechión d'Europa ideyata con fins politicas en o contexto de disputas territorials y reclamacions nacionalistas en o territorio entre os Alpes Chulians y a Mar Hadriana y dende o Golfo de Trieste a Punta Promontore, incluindo tota a Peninsula d'Istria. Ye un territorio sin mugas bien definitas y habitato por diferents pueblos eslavos (crovates y eslovens principalment) y latins (italians d'orichen veneto u istriot y istriorrumans) y que perteneixe principalment a Croacia, Eslovenia y, una chicota part a Italia. En o periodo d'entreguerras perteneixió a Italia, pero en a Segunda Guerra Mundial Italia perdió o control d'a més gran part d'esta rechión, y dende 1947 desapareixió como rechión administrativa deseparata real. Manimenos o suyo nombre sobrevive en o nombre d'a rechión autonoma de Friuli Venezia Giulia, que incluye tot o Friul y una chicota part de l'anterior Venecia Chuliana en as redolatas de Trieste y Gorizia.

Toponimia[editar | editar código]

O Litoral Austriaco en 1897.

O toponimo italián Venezia Giulia u Venetia Iulia fue inventato en 1863 por o lingüista Graziadio Isaia Ascoli de Gorizia, con a intención de mirar un nombre pa os territorios d'o Reino d'Austria reclamatos por os nacionalistas italians en o norte d'a Mar Hadriana.[1]

O toponimo s'ha tradueito en diferents idiomas d'os países mugants como Julijska krajina (crovate y eslovén), Venesia Jułia (veneto), Vignesie Julie (furlán), Julisch Venetien (alemán), Carsia Julia (latín).

A part Iulia d'o toponimo ideyato en 1863 se remonta a lo municipio Forum Iulii fundato por Chulio César a lo piet d'os Alpes Chulians. En a traducción herediana de "Breviarium ab Urbe condita", on son adhibitas a "Historia Romana" y "Historia Langobardorum" de Pavlo Diacono en trobamos una mención d'este "Foro de Chulio":

Et es claro q(ue) venecia no tan solament es en pocas yslas las quales agora deximos venecias antes Sosten delas encontradas de pannonia de(n)tro enlo fluui aduam et aq(ue)sto se proua por los liuros anyales enlos quales es legido que pergamo es Ciudat de venecia et del lac venatus asi es leydo en las ystorias benatus es lac de venecias del qual partexe micius fluui car eneti en griego loables en latin et aiustada la quienta letra son clamado veneti venecia et istria e(n) vno son contadas por vna prouincia histria es nombrada de istro fluui de aq(ue)sta venecia fue cabo la Ciudat de aq(ue)lla por la qual foro iulianes asi dicto car Julio Cesar constitui aqui mercado et for de mercaderia Et es bueno que toquen breument las otras prouincias de ytalia

Historia[editar | editar código]

En o Imperio Austro-Hongaro constituiba o Litoral Austriaco, dentro d'Austria u Cisleitania, reclamato por os nacionalistas italians por a presencia d'una important minoría italiana.

A posibilidat d'anexionar-se o Litoral Austriaco estió una d'as causas por as que Italia declaró a guerra a Austria-Hongría en a Primera Guerra Mundial. Encara que Italia fue derrotata por Austria-Hongría en a Batalla de Caporetto, por o tractato de Ramallo Italia obtién Istria y un territorio habitato por 400.000 eslovens correspondient a las actuals rechions de Goriška, Istria Eslovena y territorios que mugants con estas rechions en l'actual Italia. Estos territorios constituirán a rechión dita como Venecia Chuliana.

En o periodo faixista d'Italia se prebó d'italianizar a los eslovens d'a Istria Eslovena y Goriška. Quan en setiembre de 1943 capituló Italia o sud d'Eslovenia fue administrato por Alemanya, pero part d'o territorio yera zona d'actividat d'os partisans yugoslavos.

En 1946 Eslovenia esdevinió una republica popular en a Federación Yugoslava y se creya atra muga con Italia (tractato de París de 1947) que adchudica a Eslovenia a val alta d'o Soncio y divide a ciudat de Gorizia. Trieste y a suya redolata son declaratos territorio libre (Territorio Libre de Trieste), y no se resuelve a suya situación dica 1954, con o reparto d'este territorio. Una minoría eslovena d'unas 50.000 presonas queda en Italia, pero analogament muitos italians u venecians quedan en a part yugoslava, en o que actualment ye o territorio dito Istria Eslovena.

Veyer tamién[editar | editar código]

Referencias[editar | editar código]