Vascons

De Biquipedia
Ir ta: navego, busca
Mapa hipotetico sobre lo territorio de los vascons y los suyos vecins.

Los vascons estioron un pueblo prerromán habitador de Navarra y zonas mugants que incluyiban actuals territorios de lo norueste d'Aragón. Mientres lo periodo de la Hispania romana y Reino Visigodo de Toledo seguiban mencionando a los habitants d'ixas zonas como "vascons", etnonimo que seguntes bells autors remató aplicando-se a totas las poblacions no romanizadas de los Pireneus y alta Val de l'Ebro u los habitadors d'ixas rechions. Lo etnonimo de los vascons orichinó la denominación de "gascons" pa los habitants de l'antiga Novempopulania, y talment se relacione con lo etnonimo de los actuals "vascos".

La interpretación sobre lo concepto de vascons y lo territorio que habitaban u controlaban ye subchecto a polemica a causa de los diferents transfondos ideyolochicos contraposaus de los historiadors y archeologos.

Primeras mencions a los vascons[editar | editar código]

Retrato de Tito Livio, a qui se debe la primera mención historiografica que se conserva de l'antigüidat sobre los vascons

La descripción de lo territorio que los vascons[1]ocupaban mientres la epoca antiga mos ha plegau a traviés de los textos de los autors clasicos, entre lo sieglo I a.C y lo sieglo II, Tito Livio, Estrabón, Plinio y Claudio Ptolomeu que han estau los estudiaus en més mesura[2] como fuents de referencia, encara que bells autors han senyalau la manca d'uniformidat y mesmo contradicción de lurs informacions u advertiu sobre la interpretación realizada, en particular pa con las heredadas d'Estrabón.[3]

La mención historiografica més antigua[4] corresponde a Livio (59 a. C. - 17) qui, en un breu pasache de lo fragmento XCI de la suya obra sobre la campanya de l'anyo 76 a. C. de la guerra sertoriana, relata como dimpués de remontar lo río Ebro y la civitas de Calagurris Nasica, se trescurza lo territorio plan de los vascons u Vasconum agrum dica las mugas de lurs vecins, los berons.[5] D'un estudio comparau d'atras partz de lo mesmo fragmento, se deduz que ixa muga se trobaba a l'ueste, mientres que enta lo sud los vascons yeran vicins de la ciudat celtibera de Contrebia Leucade.[6]

Plinio en Naturalis Historia reprodució un texto anterior de l'anyo 50 a. C. en lo que se situaba a los vascons en los cabos occidentals de los Pireneus, vecins de los Vardulos, y estendillaus dica los monts d'Oiarso y la Mar Cantabrica en un aria que denominó Vasconum saltus.[7] Lo cheografo griego Estrabón, en ixas envueltas d'Augusto (63 a. C. - 14), quan se referiba a los vascons (en griego clasico, Ούασκώνων) sitúa lur principal Pólis en la ciudat de Pompaelo[8] chunto tamién la ciudat de Callagurris.

"Las dos poblacions, con Kalágouris, una de las ciudatz de los ouáskones,... Esta mesma rechión ye trescurzada por la vía que sale de Tarrákon y va dica los ouáskones de la marguin de l'Ocián, ta Pompélon y ta Oiáson, ciudat alzada sobre lo mesmo Ocián. Esta calzada mide dos mil quatrocientos stadios y remata en la muga entre Akitanía y Ibería. [...] Dimpués, por dencima de la Iakketanía, en dirección a lo Norte, ye la nación de los ouáskones, que tien por ciudat principal a Pompélon, como qui diz "la ciudad de Pompéios"." (Estrabón)[9]
Claudio Ptolomeu, seguntes un gravato alemán de lo siglo XVI, qui enumeró las principals ciudatz vasconas.

Estos datos se troban en la obra de Ptolomeu, qui vivió mientres lo sieglo II en tiempos de lo Imperio Román, Geographikè Úphégesis, en lo capítol 6, 66 de lo suyo libro II detalla lo nombre de 15 ciudatz a lo interior de lo territorio de los vascons, amés de la costera Oiasso:[10]Iturissa, Pompaelo, Bituris, Andelos, Nemanturissa, Curnonium, Iacca, Graccurris, Calagurris, Cascantum, Ercavica, Tarraga, Muscaria, Seguia y Alavona.

Lo territorio de los vascons en tiempos de la Republica Romana y de l'alto Imperio Román se correspondeba a las actuals Navarra, la marguin nordeste de Guipuzcua y part d'A Riocha, Zaragoza y Uesca,[11] incluyindo la ciudat y redolada de Calagurris.[12]

Referencias[editar | editar código]

  1. "La Tierra del Toro. Ensayo de identificación de ciudades vasconas, articlo por Alicia Mª Canto (1997), incluye mapa con las ciudatz y restos trobaus (ver edición electrónicay tamién "Ptolomeo y las ciudades vasconas. Ensayo de localización", y lo mapa de lo territorio en "Ciudades vasconas_Propuestas de localización").
  2. (Schulten 1927), (Blázquez 1966),(Canto 1997),(Gómez Fraile 2001).
  3. (Arce,1999),(Gómez Fraile 2001:28).
  4. (Schulten 1927:226),(Blázquez 1966:2).
  5. ...dimissis eis ipse profectus per Vasconum agrum ducto exercitu in confinio Beronum posuit castra,... ("...dimpués de levar (Sertorio) su exercito a traviés de lo territorio de los vascons instaló o suyo campamento en una zona mugant con los berons,..."). Texto seguntes P. Jal, Tite-Live. Histoire Romaine XXXIII. Livre XLV et Fragments. París, 1990 (1979), pág. 214-218
  6. (Blázquez 1966:3)
  7. Naturalis Historia, 4,110-111: Proxima ora citerioris est eiusdemque Tarraconensis situus a Pyrenaeo per oceanum Vasconum saltus, Oiarso, Vardulorum oppida, Morogi, Menosca, Vesperies, Amanum portus, ubi nunc Flauiobrica colonia 8. Ciuitatium VIIII regio Cantabrorum, flumen Sauga, portus Victoriae Iuliobricensium. ac eo loco fontes Hiberi XM passuum portus Blendium, Orgonomesci e Cantabri. portus eorum Vereasueca, regio Asturum, Noega oppidum, in poeninsula Paesici, et deinde conuentus Lucensis, a flumine Nauialbione Gibarci, Egiuarri cognomine Namarini, Iadoui, Arroni, Arrotrebae, pronunturium Celticum, amnes Florius Nelo. Celtici cognomine Neri et super Tamarici 9 quorum in paeninsula tres arae Sestianae [-182→183-] Augusto dicatae, Copori, oppidum Noeta...
  8. Str. III, 4, 10:...Ύπέρκειται δε τής Ίακκητανιίας πρός άρκτον τό τών Ούασκώνων έθνος, έν ώ πόλις Πομπέλων, ώς άν Πομπηιόπολις. (...dimpués, por dencima de la Iacetania, en dirección a lo Norte, ye la nación de los vascons, que tien por ciudat principal a Pompelon, como qui diz "la ciudat de Pómpeios".). Texto seguntes F. Lasserre, Strabon, Géographie II. Livres III et IV. Les Belles Lettres. París 1966.
  9. "Lo que Estrabón dijo de verdad sobre los Vascones", articlo de Alicia Mª Canto en Celtiberia.net
  10. (Schulten 1927: 230-232)(Canto 1997)
  11. (Blázquez 1966:11)
  12. (Gómez Fraile 2001:58)