Uzbecos

De Biquipedia
Ir ta: navego, busca
Uzbecos
O'zbeklar
Mirza Abdulhuq and Rustom Beg in 1841.jpg
Uzbekos en Afganistán en 1841.
Población total
23 a 29 millons
Rechions con comunidatz importants
Flag of Uzbekistan.svg Uzbequistán 21,9 millons
Flag of Tajikistan.svg Tachiquistán 1,11 millons
Flag of Afghanistan.svg Afganistán 3,5 millons
Flag of Kyrgyzstan.svg Kirguizistán 740.000
Flag of Kazakhstan.svg Cazaquistán 371.000
Flag of Turkmenistan.svg Turkmenistán 260.000
Flag of Russia.svg Rusia 126.000
Idiomas
Uzbeko
Relichión
Islam

Os uzbecos habitan en Uzbequistán y zonas mugants de Cazaquistán, Kirguizistán, Afganistán, y Turkmenistán. En Uzbequistán son minoritarios en as rechions de Taixquent (47 %) y Caracalpaquia (33 %). Charran una luenga turquica d'a branca carluca y son musulmans sunnitas. O modo de vida tradicional ye l'agricultura de regano. Son o segundo pueblo turquico més lumeroso dimpués d'os turcos anatolians. Se crei que son 18.500.000 individuos, d'os quals 16.600.000 viven en Uzbequistán, os 1.300.000 d'Afganistán descienden de refuchiatos d'as decadas de 1920 y 1930. En Xinjiang bi n'ha 12.500.

Modo de vida tradicional[editar | editar código]

Os uzbecos, uigurs y altayos practicaban o cautivo de civada fendo servir l'aladro u a xata. Combinaban l'agricultura con o pastoreyo transuant. Os contactos con os rusos aceleroron a formación d'una agricultura més intensiva. En un ecosistema d'estepas y semidesiertos o principal problema ye l'augua, por o que l'agricultura se concentra en os oasis y riberas d'as vals fluvials. Os uzbecos y uigurs fan servir dos tecnicas de trasporte d'augua, a canalización superficial de l'augua de ríos y manantials y a costrucción de canyos (karez), o que tien como avantalla que s'evita a evaporación.

Uzbequistán estió a rechión agricola més productiva d'a exURSS. Antigament l'agricultura no se practicaba que en as costeras d'os monts y as riberas y o resto d'o territorio se dedicaba a la ganadería. As dos formas de subsistencia enantes d'a sovietización yeran o cautivo intensivo d'os oasis y o pastoreyo nomada.

A fins d'o sieglo XIX l'agricultura tradición se veyó progresivament sustituita por o monocautivo de cotón, amaneixendo-ie arredol industrias textils. Tamién fuoron amaneixendo molins d'azaite y destilerías de vodka. Huei as principals zonas de cautivo siguen estando os oasis como os de Fergana u Golodnaya Step, en os que han costruito muitas canals d'irrigación. As principals produccions son as fruitas, a roz, as trunfas, o trigo, as hortalicias y a seda, asinas como a producción masiva d'a pelleta d'Astrakhán, a partir d'a uella carasul.

Luenga[editar | editar código]

O idioma uzbeco perteneixe a la branca carluca d'as luengas turquicas y ye pareixito a lo idioma uigur. O standard creyato en a epoca sovietica se basaba en os dialectos de Fergana y Taxquent. S'abandonó l'alfabeto arabico tradicional en 1923.

Historia[editar | editar código]

As tribus dirichitas por a dinastía Shaibaní a lo norte d'o Aral a fins d'o sieglo XIV yeran conoixitas como uzbecos. En o sieglo XV o Shaibaní Abu-Ghazí prebó d'establir un estato uzbeco en Transoxiana, pero bellas tribus li s'oposoron y s'establioron entre o Sir Daria y o Laco Balkhaix estando l'orichen d'os cazacos.

O nieto d'Abu-Ghazí reemprendió a expansión uzbeca en 1500 ocupando Sarmagant, Bukhara y Khorezm y dimpués Taxquent y Fergana. No podió dominar Corastén, on se topetó con o creyador d'o Imperio Safavida, o Xah Ismail, qui lo derrotó en 1510 en Merv. O dominio uzbeco se dividió en khanatos rivals, pero o shaibaní Abdulá Khan, qui reinaba en Bukhara podió reunir baixo a suya autoridat totz os khanatos uzbecos en 1583 y ocupar Corastén y Seistán dica que o xah Abbas d'a dinastía Safavida lo derrotó, perdendo-se o poder shaibaní en 1599.

Dende o sieglo XVI os uzbecos se sedentarizoron y se fusionoron con a población sedentaria local. Asia Central perdió importancia como rota comercial por desembolique d'a navegación entre Occident y Estremo Orient. O Imperio Safavida xiita d'Irán feba de barrera con atros países sunnitas. En o sieglo XVII s'imposoron as parlas turquicas d'os uzbecos en Khorezm, en Fergana y Transoxiana, on quedoron poblacions persofonas dimpués conoixitas como tachicos. Pa la chent d'ixa epoca a distinción principal yera entre nomadas, (turquemans y uzbecos encara no sedentarizatos), y sedentarios (ditos totz sartos, tanto os persofonos como os turcofonos).

Dimpués d'a caita d'os shaibanís a dinastía d'os yanís, orichinaria d'Astrakhan, s'establió en Bukhara. En Khorezm continó reinando una branca d'os shaibanís y cambioron Urgench por Khiva como capital. A fins d'o sieglo XVIII un shaibaní fació de Fergana o nuclio d'un khanato independient con capital en Cocand. Os khanatos uzbecos luitaban entre ellos y amés sufriban as incursions de saqueyo d'os turcmenios (turquemans que quedoron entre l'Aral y Caspia dimpués que atros turquemans emigroron ta Orient Meyo). A fins d'o sieglo XVIII os manquitís prenioron o títol d'emirs y sustituyoron a los yanís en 1785 conseguindo creyar un estato estable. En Khiva amaneixió a dinastía d'os cungratís dende 1804 y tamién consolidó o suyo poder. En o sieglo XIX renaixió a vida urbana, se millororon os sistemas de regano y se desembolicó un comerzio con Rusia.

A conquiesta rusa encomenzó en 1865 quan prenioron Taixquent. Os rusos creyoron dos rechimens: l'administración directa en o gobierno de Turquestén, (que incluiba Taixquent, Fergana y Sarmagant) y o protectorato sobre o Emirato de Bukhara y o Khanato de Khiva, on se manteneba a tradición administrativa y relichiosa local. Manimenos amaneixió una burguesía turquestanesa que recibió o hadidismo d'os comerciants y intelectuals tartres en Taixquent y Bukhara. En 1908 fan acto de presencia os "Chóvens Bukhareses", antirrusos, panislamicos y reformistas que copiaban o modelo d'os "Chóvens Turcos". En 1917 un congreso celebrato en Taixquent reunió a turquestaneses y tartres. A mayor parte prefirió aliniar-se con os democratas de Rusia contra as cherarquías musulmanas conservadoras y creyar un estato islamico federato con o estato ruso. En octubre de 1917 os bolqueviques ocuporon Taixquent excluindo d'o gobierno a los intelectuals musulmans. En noviembre de 1917 en Cocand se proclamó o Estato Islamico autonomo de Turquestén. O soviet de Taixquent lanzó una expedición contra Cocand en febrero 1918 y se creyó en abril a RSSA de Turquestén. Os bolcheviques rematoron por fer concesions a lo islam porque no i teneban o refirme d'os colons rusos, d'esta traza bells liders d'o movimiento hadidista s'unioron a lo partito comunista. En 1919 esclató en Fergana a revuelta d'os basmachis y s'estendilló por tot o sur de Turquestén dica Turcmenistán, que se fundió en 1922. En 1917 os musulmans innovadors demandoron reformas que no obtenioron. En setiembre de 1920 deposoron a lo emir con l'aduya de tropas rusas y establioron una republica popular sovietica que s'adhibió a la URSS en 1924. En Khiva se desvinió lo mesmo con a proclamación d'una republica popular en Khorezm en 1920 y l'anexión por a URSS en 1923. En a decada de 1920 y principios d'a decada de 1930 muitos uzbecos se refuchioron en Afganistán fuyindo d'as autoridatz sovieticas.

En 1924 se creyó a Republica d'Uzbequistán aplegando as rechions més poblatas d'os antigos khanatos de Khiva, Bukhara y Kokand.

Bibliografía[editar | editar código]