Turquestén

De Biquipedia
Ir ta: navego, busca
Bandera de Turquestén

El Turquestén u Turquestán ye una rechión historica d'Asia Central que se troba entre a mar Caspia y o desierto d'o Gobi, y que ye poblada mayoritariament por pueblos turquicos, d'astí o suyo nombre (turq stan).

Tradicionalment se divide en dos zonas, deseparatas por as cadenas montanyosas d'o Tian Xan (Tengri Tagh) y d'o Pamir. A l'este d'ellas se troba o Turquestén Oriental, que actualment ye d'alto u baixo a provincia china de Xinjiang, mientres que a l'ueste ye o Turquestén Occidental, dividito en as antigas republicas sovieticas huei independients de Kirguizistán, Turkmenistán, Tachiquistán, Uzbekistán y el Cazaquistán meridional, así como o norte d'Afganistán.

A rechión d'o Turquestén

Os pueblos mayoritarios del Turquestén, ditos turquicos, tienen un orichen común y se caracterizan por charrar luengas con un solo orichen y profesar predominantement a relichión islamica. Estos pueblos salioron d'a zona de l'Altai y s'estendilloron por tot Asia Central, mezclando-sen con atros pueblos indoeuropeus y asiaticos de l'este. D'o Turquestán, bells pueblos turquicos en salioron en diferents epocas historicas plegando-ne beluns dica Europa (hunnos, avaros, bulgaros, pazinacos, uzos, cumans, etc...).

Toponimia[editar | editar código]

"Turquestén" ye una composición de Turk, orichen etnico d'os suyos habitants turquicos y stan, "país" en persán, como "Daguestán", "Cazaquistán", "Afganistán", etc...En o libro "La Flor de las Ystorias d'Orient"[1] de Chuan Ferrández d'Heredia s'escribe Turquestén:

en el regno de Cathay, deues ocçident en el regno de Turquesten, deues septentrion es el desierto, deues mig iour comarca con vna tierra rica qui es clamada Sin, qui es entre Cathay et el regno de India; et en aquella...

En o "Libro d'as Marabillas d'o Mundo" escriben Turquestem:

Et l'otro camino es de yr del regno de Turquestem por Persia, et por este camino ay muchas jornadas de desierto...
vers el regno de Turquestem...

Referencias[editar | editar código]

  1. Frai Haitón, Chuan Ferrández de Heredia. La flor de las ystorias de Orient. The University of Chicago press, 1934 [1]