Trallo (botanica)

De Biquipedia
Ir ta: navego, busca
Iste articlo tracta sobre o trallo en as plantas. Ta atros usos de «trallo» se veiga Trallo (desambigación).
O trallo d'una planta.

En botanica, o trallo u tallo (d'o latín <THALLUS) ye l'eixe d'as partes aerias d'as plantas cormofitas y ye l'organo a on que se sustentan as follas, as flors y os fruitos. As suyas funcions principals son fer de refirme mecanico ta os atros organs aerios en a planta y transportar os productos metabolicos y d'a fotosintesi d'entre os organs a on que se produz y as venas.

A diferencia que a radiz, o trallo tiene tanos a on s'inserta as chemas axilars. Tiene cheotropismo negativo, o que quiere dicir que creix siempre en o sentiu a la contra de como tira la gravedat. As diferents especies de plantas superiors pueden tener un solo trallo (unicaulars) u tener-ne mas d'un u muitos (especies pluricaulars), siempre que brosten ya individuals dende a radiz. As plantas unicaulars pueden estar ramificadas u no.

Anatomicament, o trallo se composa de tres tipos de teixius: o teixiu dermico u dermis, o teixiu fundamental y o teixiu vascular u fascicular. O fundamental fa la función de sustento, y o fascicular transporta os nutrients y metabolitos. A disposición y as diferents posicions relativas d'istes tres tipos de teixius son un d'os criterios que diferencian os taxons de plantas superiors.

O trallo creix prolargando-se por a multiplicación celular d'os meristemos apicals, en una forma de creiximiento que se diz creiximiento primario. Todas as especies de plantas superiors tienen creiximiento primario, o qual ye responsable d'o creiximiento en altaria. O creiximiento secundario ye o producto d'a multiplicación celular en os meristemos secundarios, que son o cámbium y o felocheno, distribuius a lo largo d'o trallo. Iste tipo de creiximiento condiciona que o trallo s'ixample, y ye caracteristico d'as plantas lenyosas.

Se veiga tamién[editar | editar código]

Vinclos externos[editar | editar código]