Tractato de Lunéville

De Biquipedia
Ir ta: navego, busca
As mugas d'o Sacro Imperio Román Chermanico dimpués d'o Tractato de Lunéville en 1801.

Se conoix con o nombre de tractato de Lunéville u paz de Lunéville a un tractato internacional sinyato o 9 de febrero de 1801 en a localidat de Lunéville (Meurthe y Mosela, Francia) entre os representants d'a Primera Republica Francesa y os representants d'o Sacro Imperio Román Chermanico, en o marco d'as Guerras revolucionarias francesas, rematando-se asinas a dita Segunda Coalición y dixando a o Reino Unito como o solo país en luitas contra os revolucionarios franceses dimpués d'as greus redotas d'os imperials en as batallas de Marengo y Hohenlinden.

Sinyoron o tractato Chusé Bonaparte, en representación d'a Republica Francesa, y Johann Ludwig von Cobenzl en representación d'o Imperio.

Seguntes as clausulas d'o tractato, os imperials habrían de cumplir con o tractato de Campo Formio de 1797, amás de perder bellos territorios y posicions de preeminencia en Alemanya. Antiparte, Francia enamplaba as suyas mugas enta l'este a costa d'o Sacro Imperio, plegando dica o canto d'o río Rin, encara que renunciaba a fer reclamacions en a marguin dreita d'o Rin. Tamién se fixoron as mugas en bells territorios italians, estando adhibitos a Francia bells territorios, encluyendo-ie o Gran Ducato de Toscana. Tamién s'alcordaba respectar a independencia d'estatos satelites de Francia, como a Republica Batava, a Republica Cisalpina, a Republica Helvetica y a Republica Ligur. En compensanción, Austria s'anexionaba o bispato de Trento y o bispato de Brixen.