Thymus

De Biquipedia
Ir ta: navego, busca
Thymus
Thymus vulgaris DehesaBoyal2.jpg
T. vulgaris
Clasificación scientifica
Dominio: Eukaryota
Reino: Plantae
División: Magnoliophyta
Clase: Magnoliopsida
Subclase: Asteridae
Orden: Lamiales
Familia: Lamiaceae
Subfamilia: Nepetoideae
Tribu: Mentheae
Chenero: Thymus
Linnaeus, 1758

Thymus (L., 1758) ye un chenero de plantas que fa parte d'a familia Lamiaceae, naturals d'Europa meridional y d'a cuenca mediterrania, en do habitan sobre substratos calsinosos en solans y terreros. Tienen port herbacio, muit ramificadas dende que brosta o trallo, asobén con as partes más viellas d'a planta que se les gosan tornar lenyosas. As fuellas son muit menudas (fan dica poquetz milimetros) y coriacias, con una florada primeral copiosa y muit aromatica. As flors son tamién muit menudas, con colors que bailan dende blancas dica rosas u moradas. A especie más común en Aragón ye Thymus vulgaris.

No suportan guaire bien a humedat elevada en o terreno, per el que gosan putrir-se-les as venas. Manimenos, treito d'a humedat, resisten á saber lo bien as condicions extremas, dende as temperaturas caldas estivals dica os hibiernos más fridos y secos, motivo per el que as especies miembros son bien abundants en a cuenca mediterrania y especialment en a Peninsula Iberica, dende a costa dica bells 1000-1200 metros d'altitut. Bellas especies se cautivan como plantas ornamentals y aromaticas, y dende antigo han gosau conoixer emplego como plantas medicinals, per mor d'a presencia d'o timol, una substancia fenolica con propiedatz antisepticas contra Eubacteria y fongos que se troba en os suyos teixidos.

Nombres[editar | editar código]

En Aragón, as especies d'o chenero Thymus reciben o nombre chenerico de tremoncillo u estremoncillo (con diferents variants con modificacions en as vocals) en a mayoría d'o territorio. As dos formas han evolucionau pobablement partindo d'o latín «thymus» anque incorporando-ie una desinencia deminutiva «-ello/-illo» á la forma como ye freqüent en as luengas romances hispanicas. En bells puntos d'Aragón se'n ha conservau formas que evocan una hipotetica forma intermeya, talment más extensa en o romance medieval, que hese puesto estar «termón» u «tremón», y que explicaría ixas formas actuals con -r- interior, anque tot ye especulación. Alavetz, a desinencia «-illo» s'habría ganau a posteriori.

S'ha puesto documentar a forma «tremoncillo» en:

En a Ribagorza, se documenta en La Puebla de Castro[1] y Torres de l'Obispo[1] en a baixa val de l'Esera, y en Capella[1] y Roda d'Isabana[1] en a val de l'Isabana. Que ixo ye per puestos de tota la comarca en os que se i parla l'aragonés, anque en a zona de dominio lingüistico catalán pareix que l'estudio ye más complexo. Se deforma en «tremonsillo», con a clasica substitución d'a -c- (/θ/) con -s- (/s/) en os lugars de l'Alta Ribagorza en os que per cuentas de parlar-ie ribagorzano cheneral i charran benasqués, con o norte en Benás[1] y o estremo sud en Bisagorri[1] y Chía.[1]

En o sobrarbe, la trobamos en Plan y en Chistén[1] en a val de Chistau, en Bielsa[1] en a val de Bielsa, en Tella[1] en a val de Tella, en A Buerda y A Espunya[1] en a val de l'Aínsa, en Guaso[1] y Mondot[1] en a val de Boltanya, en Vió,[1] Nerín[1][2] y Sercué[1][2] en a val de Vió, y en Torla[1] en val de Broto, per el que puede bien decir-se que ye una parola cheneral en tota la comarca.

En altras comarcas, se puede citar en Lanuza[1] en a val de Tena (Alto Galligo), en o Semontano de Balbastro en Salas Altas,[1] en Radiquero,[1][3] en Biarche[1] y Balbastro,[1] y en Castillazuelo.[1] En a Plana de Uesca s'ha documentau en A Perdiguera[1] y Panzano[1] y en os Monegros en Tardienta.[1]

Fa parte tamién d'o vocabulario en uso de Fonz[1] en a Cinca Meya, y en Ontinyena[1] en a Cinca Baixa, que ye chusto en a muga con o dominio lingüistico d'o catalán en l'Aragón oriental. Á demás, á desparte de totz istes casos, se conoix tamién a forma metatética «termoncillo»[1] en Echo, en a Chacetania, y una forma atipica: «tremontillo»[4] en Agüero, en a Plana de Uesca.

A forma «estremoncillo», menos freqüent, se documenta en Arguis[1] y en Linars de Marcuello[1] en a Plana de Uesca, en Boltanya[4] y Puértolas[4] en o Sobrarbe, en Peralta de la Sal[4] en A Litera, y en Borrés[1] en l'Alto Galligo, con una destribución cheografica que, sin estar localizada, resulta tan ampla como l'altra (pareix que fa dir que siga cheneral tamién per lugars de tot lo dominio lingüistico de l'aragonés). D'ista variant, se documenta tamién una forma con divagación vocalica en a silaba tonica, como «estremuncillo», que s'ha recullido diatopicament en Pandicosa en l'Alto Galligo y en Plan en o Sobrarbe,[1] sin que se pueda afirmar que existe garra conexión d'entre ixes dos lugars ta que les siga común, si que per estar un fenomén común en luenga aragonesa que baile a prenunciación d'as vocals.

Cal notar tamién que a forma «estremoncillo» ha gosau adaptar-se á lo catalán d'Aragón en bells puntos, achustando-se en as leis foneticas de lo dito idioma, substituindo-ie a parola propia d'o catalán que ye «farigola», ta pasar a fer parte d'o conchunto d'aragonesismos que pueblan as parlas catalanas d'a Francha d'Aragón: la trobamos como «estremunsell»[5] en o catalán ribagorzano que se parla en a val de Barrabés.

Una forma menos freqüent, pero que tamién se conoix per diferents puestos d'Aragón, ye la que dimana d'o etime latín «thymus», anque sin pasar per as deformacions posteriors que han sufiertas as formas más comuns aragonesas «tremoncillo» y «estremoncillo». Se presentan diferents formas d'ixa parola en Aragón: «tomizo»,[5] «tomilo»[5] y «tomecillo»[5] que son puntuals, anque isto fa pensar que a forma «tomillo», per cuentas d'estar un castellanismo lexico introdueito en l'aragonés muderno, haiga puesto estar una forma romance común con o castellano y patrimonial d'Aragón tamién. Anque, en qualsiquier caso, ista forma tampoco no substituye ni se superposa en a suya aria de destribución con as formas «tremoncillo/estremoncillo» (u, lo menos, dica fa relativament pocas anyadas), per el que, s'entiende, se tractaría de formas cheograficament diatopicas; ixo ye, naturals y propias d'Aragón las dos, pero de puestos diferents. Talment «tremoncillo/estremoncillo» más en norte y en nordeste (sobre tot, en el que ye la moderna a provincia de Uesca) y «tomillo/tomilo/tomizo/etc.» en sud y en a resta d'o territorio. En iste sentido, en refirmando ixa ideya, se troba la forma «tomarro»,[1] clarament emparentada con as ditas derivaderas de «thymus», en Pancrudo, en a Comunidat de Teruel.

Farigola[editar | editar código]

En zagueras ya, cal decir que tamién se reconoix en bells puntos (encara á dintro d'o dominio lingüistico aragonés) o catalanismo lexico «farigola», y bella forma adaptada en as leis foneticas de l'aragonés, como «farigüela», anque son (isto el cal decir) formas muit puntuals. «Farigola» s'ha documentau en Torres de l'Obispo,[1] lugar que en chunto con Chuseu y bell altro nuclio más forma un enclau particularment complexo lingüisticament parlando, en metat d'a Ribagorza, con una parla que s'encaballeta muito d'entre l'aragonés ribagorzano y o catalán ribagorzano, sin que os autors conoixedors d'o tema s'agosen á adscribir «l'hablla torrense» ni á l'uno ni á l'altro idioma. Se'n ha dau treslau tamién en Caspe,[4] en o Baixo Aragón historico, y tamién, á tamas d'a distancia, como en o caso de Torres troba explicación en a proximidat cheografica con a Francha catalanofona que tiene la ciudat baixoaragonesa. A forma morfolochicament adaptada á l'aragonés «farigüela» no s'ha puesto documentar si que en Fonz,[1] y per os textos que recopiló Saroïhandy, pareix que o fonzense tamién teneba (lo menos, historicament) un grau de transicionalidat con o catalán talment mayor que no lo baixorribagorzano,[6] per el que tampoco no se puede prener como representativo de l'aragonés.

Explicación más deficil tienen as formas que se rechistran tan á dintro d'o dominio lingüistico d'a luenga aragonesa como en as vals d'o Sobrarbe central, y d'ellas no se'n puede decir si que forman parte d'un corpus exiguo anque bien vivo de parolas catalanas (u millor dito, comuns con o catalán, perque ye poco probable que o catalán se i haiga parlau nunca[7]) que han gosau trobar de forma quasi paradoxica un recuesto en ista comarca sin tener garra más vinclo ni continuidat en a suya destribución cheografica que las comunique con os territorios en os que se parla catalán. En chunto con «pols», «conil», «cama» y bellaltras pocas, i trobamos «farigolera» en Fanlo[1] (val de Vió) y «farigoleta» en Buerba,[1] en do cal suposar que tamién convivan con «tremoncillo» y «estremoncillo», tan comuns en a comarca como en a resta d'a provincia de Uesca.

Imáchens[editar | editar código]

Referencias[editar | editar código]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 1,15 1,16 1,17 1,18 1,19 1,20 1,21 1,22 1,23 1,24 1,25 1,26 1,27 1,28 1,29 1,30 1,31 1,32 1,33 1,34 1,35 1,36 1,37 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
  2. 2,0 2,1 (es) QUINTANA i FONT, Artur, El Aragonés nuclear de Nerín y Sercué (Valle de Vio); Gara d'Edizions. Zaragoza, 2007. ISBN 978-84-8094-060-3
  3. (es) Vocabulario de animales y plantas del Somontano de Barbastro en www.Radiquero.com; Consultato lo 5 de setiembre de 2010.
  4. 4,0 4,1 4,2 4,3 4,4 (an)(es) ANDOLZ CANELA, Rafael, Diccionario Aragonés, Aragonés-Castellano Castellano-Aragonés (5ª Ed.); Mira Editores. Zaragoza 2004. ISBN 84-8465-160-6
  5. 5,0 5,1 5,2 5,3 (es) VILLAR PÉREZ, Luis. Plantas medicinales del Pirineo Aragonés y demás tierras oscenses. Diputación Provincial de Huesca. Zaragoza, 1987.ISBN 978-84-5055-256-0
  6. (es) SAROÏHANDY, Jean-Joseph, Misión lingüística en el Alto Aragón (compilación de materials ineditos dende 1906); Xordica Editorial. Zaragoza, 2005. ISBN 84-96457-06-0
  7. Sobre iste punto, existen qualques estudeos feitos -millor especulativos que no seguros- sobre a posible presencia de comunidatz catalanofablants en a comarca d'o Sobrarbe en diferents momentos d'a historia; sobre tot, vinclada con as expleitacions meneras en Bielsa y Chistau -en as que i habrían estau empleaus meners venidos de Catalunya- y con a presencia de qualques apellidos catalans u occitans en o sieglo XVI (Puigcercós -aragonseizau á partir d'o s. XVII como «Puycercos»- «Mur» -encara freqüent en l'actualidat-, Barrat -podrían estar os actuals «Barrau» de Bestuer-, etc.), y como norma cheneral pareix que concluyen que anque i podioron haber bella familias que se i instalasen, y mesmo exlicarían a presencia d'ixes catalanismos puntuals en l'aragonés actual d'a comarca, a luenga catalana nunca no i habría gosau estar luenga significativa y a mayoría d'a población i habría guardau lo romance aragonés.

Vinclos externos[editar | editar código]

Biquiespecies
Se veiga a información de Biquiespecies sobre Thymus.