Tarba

De Biquipedia

Tarba (Tarba [ˈtaɾβɔ] en oczitán; Tarbes en franzés) ye una ziudá d'o departamento franzés d'os Altos Perineus, capital de subprefeutura y de cantón, asinas como d'a probinzia istorica de Bigorra. Tien poco más de 50.000 abitans y se i troba situata á 320 metros sobre o ran d'a mar. Destaca en ella o edificio molimental d'a catedral u seu d'A Nuestra Señora. Poseye un gran parque clamato Chardín Massey, asinas como atros menors (Parque Paul Chastelain, Parque Bel Air), una fuen molimental en a plaza d'o Marcadieu y una estatua ecuestre adedicata á lo Mairal Foch.

[editar] Istoria

Billa establita en o sieglo III adC, esdebinió colonia romana baxo lo nombre de Tarba. Asolata por os normandos en 840, la recostruyó o Bispe de Bigorra u Tarba. Dende o sieglo XII estió capital condal y más tardi capital de senescalía. En a Edat Meya yera formata por seis bicos: a Seu, Carrera Llarga, Mauburguet, Burg Vell, Burg Nou y Burg Cranc. En 1569 os protestants cremoron a suya seu, pero o Bispe la fazió reconstruyir en 1652. En 1790 se combirtió en capital departamental. En Tarbes naxió en 1851 o mairal Foch, comandant d'os exerzitos aliatos en a Primera Guerra Mundial.

[editar] Toponimia

A forma aragonesa d'iste toponimo oczitán se troba en a onomastica aragonesa meyebal, Calle del Forno de Tarba en a Zaragoza d'o sieglo XV, y en antroponimos como Galacián de Tarba, Don Ramón de Tarba.

Como colonia romana e foco de romanizazión en tierras d'os aquitals arredol de Tarba bi ha toponimos rematatos en -án testimonio d'una romanizazión inizial e toponimos rematatos en -ac testimonio d'una romanizazión més tardana de carauter galorromán.

Se beigan as imachens de Commons sobre Tarba.