Sueldo (moneda)
De Biquipedia
Sueldo ye como se diz en aragonés meyebal á una moneda eredera dreita del sueldo carolinchio, que prene nombre de lo solidus román.
Lo sueldo yera una unidat de cuenta de lo sistema carolinchio que corresponeba á la bentena parte de la libra e que se dibidiba en 12 diners e 24 obolos u mallas. D'astí en deriboron dimpués los sueldos nabarros, aragoneses, catalans e franzeses, clamatos estos zagueros en singular sou, pasando por la parabra intermeya solt. En los países chermanicos Solidus s'adautó como Schilling u shilling.
[editar] Sueldos en Aragón
Lo termin nabarro-aragonés sueldo ye la eboluzión en romanze local de la parabra latina SOLIDUS por diftongazión -ue- de la -O- curta. Sin d'embargo á sobent en os testos meyebals s'escribe latinizato como solido. Ha tenido diferens equibalenzias:
- Bentena parte de la libra, seguntes los Fueros d'Aragón e Tergüel.
- Moneda con balura de güeito cuartos, seguntes Borao e Pardo Asso.
- Meyo reyal de plana, seguntes lo diccionario de autoridades.
Doze diners chaqueses formaban un sueldo chaqués.
[editar] Sueldos en Cataluña
Se i clamaban sous:
- Lo sou barceloní, sou de plata u, simplament, sou yera una moneda d'plata que Pero III d'Aragón acuñó por primera begata en l'año 1285. La suya balura yera de 12 diners de tern. Por lo feito d'estar una moneda d'alta balura lo suyo nombre se fosilizó en espresions como tenir moles sous o costar moles sous, con lo sentito d'un dineral, muitos sieglos dimpués d'estar fuera de curso.
- Lo sou de Perpinyà, tamién de plata, yera una moneda rosellonesa de tiempos de Carlos I d'Aragón.
- Lo sou d'Eivissa yera una moneda ibizenca de bellón acuñata tamién dende Carlos I d'Aragón.
- Los cinc sous yeran en conchunto una moneda de plata que s'emplegó en bellas poblazions de Cataluña mientres la Guerra de los Segadors. Baleba la mitad de la moneda de zinco rials.
[editar] Sueldos en Franzia
- Lo sou, enantes clamato solt (en lo sieglo XI) e sol (á partir de lo sieglo XII), yera una moneda de l'Antigo Regimen que equibaleba á la bintena parte de la libra tornesa e se sozdibidiba en 12 deniers (u diners). En 1787, lo poder alquisitibo d'un sol yera d'alto u baxo el d'un euro de 2005.
