Sorbus aucuparia

De Biquipedia
Ir ta: navego, busca
Sorbus aucuparia
Rowan tree 20081002b.jpg
Sorbus aucuparia
Clasificación scientifica
Dominio: Eukaryota
Reino: Plantae
División: Magnoliophyta
Clase: Magnoliopsida
Orden: Rosales
Familia: Rosaceae
Subfamilia: Maloideae
Chenero: Sorbus
Especie: S. aucuparia
Nomenclatura binominal
Sorbus aucuparia
L., 1758

Sorbus aucuparia (L., 1758), que en aragonés se conoix popularment como pixortera/bixortera u buxardera[1] (anque existen variants en o territorio de parla aragonesa), ye una especie d'árbol de fuella caduca en o chenero Sorbus, d'a familia Rosaceae.

Ye una especie de mida meyana (no gosa pasar t'alto d'os 15 metros), que se troba en puestos humidos de tot Europa, dende las landas d'Islandia y Escandinavia dica la Mediterrania, arribando enta Siberia per l'este.

As fuellas son composatas, imparipinnatas (numer impar de foliolos) con d'entre 9 y 15 foliolos que tienen as laderas aserratas y fan dica 9 cm de lonchitut. Fa la florata en primavera, y os fruitos (ditos «cerollas» como muitos altros de pareixitos) fan d'entre 4 y 8 mm de diametro. Brostan en carrazos de muitos lulos chuntos, que mientres se guadan alto en l'árbol s'envistan de luent per a color tan roya que gosan tener. A crosta ye més clara de color que no en altras especies d'o suyo chenero, y se pareix relativament en a d'as cereseras domesticas.

En muitos lugars d'a Ribagorza se i decumenta tamién o nombre «bixortera/o»,[1] en o Sobrarbe oriental (val d'a Cinca y afluents) se i conoix como «pixortera»,[2] y «bixordera/o» en l'alta val de l'Ara[1] (se veiga la curiosa equivalencia d'entre estas dos, la una estando la versión conservadera con as consonants oclusivas xordas intervocalicas que l'altra sonoriza). Ixa zaguera, a demés, pareix que troba la suya equivalenza en as parlas de més ta ponient en as formas «buxardera/o» y relativas que se sienten per l'Alto Aragón occidental,[1] que poderían estar un tremescluz d'a primera con o termino «buxo», que define una altra especie vechetal de tot diferent.

Existe tamién, como con totz os eixemplars de serberas, una denominación popular como «cerollera borde», que ye cheneral en tot lo territorio.

Imachens[editar | editar código]

Referencias[editar | editar código]

  1. 1,0 1,1 1,2 1,3 (an) VIDALLER TRICAS, Rafael; O Libro d'as Matas y os Animals; Dizionario aragonés d'espezies animals y bechetals; Ed. Bal de Onsera. Zaragoza, 2004. ISBN 978-84-89862-35-7
  2. (es) BLAS GABARDA, Fernando et ROMANOS HERNANDO, Fernando; Diccionario Aragonés: Chistabín-Castellano. Gara d'Edizions. Zaragoza, 2008. ISBN 978-84-8094-061-0