Somero salbache africano
De Biquipedia
 |
Iste articlo tien una bersión escrita con una grafía alternatiba esperimental propuesta por bels biquipedistas á dintro d'o Biquiproyeuto:Grafía. Puede beyer-se aquí. |
| Somero salvache africano | ||||||||||||||||
|---|---|---|---|---|---|---|---|---|---|---|---|---|---|---|---|---|
 Equus africanus |
||||||||||||||||
| Estato de conserbazión | ||||||||||||||||
|
||||||||||||||||
| Clasificazión zentifica | ||||||||||||||||
|
||||||||||||||||
| Nomenclatura binomial | ||||||||||||||||
| Equus africanus | ||||||||||||||||
O somero salbache africano (Equus africanus) ye un mamifero salbache d'o continent africano, pareixiu á o somero domestico, que anque güe se troba prou recluyiu en os países d'o nordueste d'Africa (Etiopía, Somalia e Eritrea), antes ba tener un aria de destribuzión que encluyiba Sudán, Echipto e Libia.
As suyas midas plegan ta os 2 metros de largo, con entre 230 e 275 kg de peso. Tiene o pelo curto e de color grisa clara, con una randa escura que s'estira dende a foyeta dica a coda (igual como os somers) e con rayetas negras en as patas, por baixo d'o chenullo. A sozespezie nubia (Equus africanus africanus) tiene, á más d'a francha lonchitudinal d'a espalda, un atra que le baixa por o güembro, que anque son compartidas con bels somers, no se troban en l'atra sozespezie (E. a. somalicus).
Os somers africanos biben por un regular en ambients deserticos u semideserticos, á on nomás os suyos estomagos pueden sacar bella cosa d'a pastura. Os sistemas dichestibos d'istes animals son duros e sacan l'augua de poca cosa que coman. Se conoixe que pueden tamién tirar asabelos días sin gota d'augua. Á diferenzia d'a mayoría d'equidos, os somers africanos no prezisan mica compañía, e se mueben abitualment solencos (fueras d'as fembras con pollinez), e nomás cuan se troban solos fan serbir a boz suya, que ye prou grau e asinas se claman os unos ta os otros en a distanzia (dica 3 km).
Tamién s'ha pensau que os somers africanos podesen estar os debantpasaus d'os somers domesticos. Se conoixe que os sumerios ya ban fer-ne uso dende fa sieglos, que os meteban á empentar bagons e carros. Atros autors piensan que ixes ban aber de ser onagros u espezies de burros ya más modernos.
O estau de conserbazión autual d'a espezie ye dramaticament perigloso t'a suya superbibenzia. As capturas masibas que antes se'n feban ta domesticar-los e tamién l'entrecruze con os somers domesticos han feito que autualmente no en queden si que unos poquez zientos. Á más, en Somalia e Etiopía, á on que os cazan ta usar-los en a medezina tradizional, o incremento d'armas en zirculazión con as rezients guerras zebils no ha feito si que estimular o deszenso poblazional d'esta espezie. A competenzia, finalment, con o bestiar domestico ta sacar-ne pastura d'o suyo duro hábitat ha feito declinar encara más a demografía que teneba.
