Snowpark

Un snowpark u terrain park ye un aria a l'aire libre a on que esquiadors y snowboarders pueden fer trucos. Os snowparks tiene as suyas radices en os skateparks y por ixo tienen prous caracteristicas en común. Un dos primers "Snowboard Parks" construitos estió o de Vail en l'anyo 1990.^[1] O snowpark fue copiato a escape por atras estacions d'esquí. Hue cuasi todas as prencipals estacions d'esquí tienen un snowpark, y belunas mesmo gosan tener varios parks con diferents rans de dificultat. Bi ha estacions que son exclusivament snowparks como "Echo Mountain Park" en Idaho Springs (Colorado, Estaus Unius) u "Snow Park" en Wanaka (Nueva Zelanda).

Dificultat[editar | modificar o codigo]

Por un regular os snowparks tienen sinyalizacions ta os obstaclos y brincos respective a o suyo grau de dificultat, igual que se fa en as pistas d'esquí. Bi ha diferents indicacions y graus de dificultat seguntes a estación d'esquí y o país a on se trobe. En Estaus Unius y Canadá se gosan sinyalar con ovalos naranchas ta diferenciar-los d'a resta de pistas, y se gosa clasificar seguntes si os suyos obstaclos son grans (Large), meyos (Medium) u chicoz (Small). Encara que as caracteristicas d'os obstaclos varian prou entre una estación y atra, por un regular os de grandaria chicota gosan estar brincos y rails chicorrons que tienen poca altaria, os meyos pueden tener entre 4 y 12 metros d'altaria incluyindo-ie tamién cambios d'obstaclos con deseparacions entre os uns y os atros, y os grans pueden tener brincos d'entre 12 y 27 metros d'altaria con unións entre éls prou difícils y half-pipes con gran inclinación. En Europa se gosan clasificar como as pistas por graus de dificultat, azuls os obstaclos fácils, royos os difícils y negros os muit difícils.

Obstaclos[editar | modificar o codigo]

Os obstaclos son tot tipo d'obchectos que se troban en a pista y sobre os que o esquiador u snowboarder puet puyar-se, brincar u fer toda mena de trucos. Muitos obchectos son parellans a os que se podrían trobar fendo snowboard u esquí en arias urbanas (baranas d'escaleras, cletas, mesas, etc.). Os que mas se gosan trobar en os snowparks son:

Rail: Ye una barra metalica, con os cantos redondiatos u con una chicota superficie plana, sobre a que o esquiador u snowboarder puet eslizar-se.
Box u caixa: Ye pareixita a os rails, pero ye feita d'una superficie mas ampla d'UHMWPE, un fibra sintetica de poliuretano. Puet tener cantos metalicos u no. Ye una estructura parellana a las funbox d'os skateparks.
Árbols: A vegatas se fan servir elementos naturals como árbols u troncas aintro d'o mesmo snowpark u en os suyos arredols.

Os rais y as caixas gosan tener diferents formas y grandarias: rectos, inclinatos, curvatos (ditos a vegatas "rainbow") u doblatos. Os rails, mas que mas os rainbow, se pueden trobar tamién por dencima d'atros obstaclos u mesmo de vehíclos.

Bancos de parque y mesas de picnic: Un tipo especial de caixas son as que tienen forma de banco de parque u de mesa de picnic. Os cantos gosan estar feitos con rails metalicos y as superficies d'UHMWPE. Iste tipo d'obstaclos proporcionan multiples superficies d'eslizamiento.
Buzón: Se tracta d'un tubo de metal de diferents largarias con una sección transversal que s'asemella a un buzón de correu.
Paret: Ye una superficie vertical, u cuasi vertical, con forma parellana a una paret feita d'UHMWPE. A mayoría d'istos obstaclos tienen una superficie igual en a parti mas alta con una inclinación entabaixo d'a paret.
Bonks: En zaguerías s'han feito prou populars en muitos snowparks, os bonks son obstaclos con forma pareixita a un pozal d'a vasuera u un celindro vertical con un chicot brinco dencima. Por un regular se gosa brincar dencima d'él, trucando a superficie con os esquís u a tabla de snow. Atras variacions encluyen brincar chirando enta u dende o bonk, tocando-lo con diferents partis d'as tablas u permaneixiendo bels segundos de piet dencima d'o bonk.
Rainbow: Ye una caixa u rail que tien a forma como un "arco Santchuan" (en anglés rainbow).

Brincos[editar | modificar o codigo]

Os brincos en os snowparks pueden ir dende un 1,5 dica mas de 27 metros d'altaria y pueden variar en dificultat y forma entre una estación y atra. En contraste con os obstaclos, que son feitos por un regular de materials como acero y plastico, os brincos se construyen cuasi de tot con nieu u nieu con una base de tierra. Os trucos que se i fan penden por un regular en fer chiros sobre l'eixe vertical u horizontal en l'aire mientres s'agafa por eixemplo a tabla u se deseparan os esquís. Os diferents tipos de brincos en un snowpark son:

Tabletop: Ye un brinco, que pareixe por a suya forma una mesa u trapezoide, en o que se despega dende una zona inclinata entalto, se brinca sobre una zona plana (table) y s'aterriza en una zona con pendient entabaixo.
Step-down: Ye un brinco a on a zona d'aterrizache ye mas baixa que a zona de despegue.
Step-up: Ye un brinco a on a zona d'aterrizache ye mas alta que a zona de despegue.
Gap: Ye un brinco que tien un hueco (en anglés "gap") entre a zona de despegue y a zona d'aterrizache. Parellán a o tabletop, pero sin a zona plana intermeya.
Hip: Ye un brinco con una sola zona d'aterrizache, que ye perpendicular a o despegue.
Spine: Ye un brinco con dos zonas d'aterrizache, que son perpendiculars a o despegue. Parellán a o hip, pero podendo-se aterrizan enta os dos cantos.
Super kicker: Ye un gran brinco que se fa servir ta fer trucos aerios con rotacions. Tamién se dicen "kickers".
Mini kicker: Ye un gran brinco (encara que mas chicot que un Super Kicker) a on que se fan os mesmos trucos que en un Super kicker.
Channel gap: Ye como un brinco prou amplo que ye tallato por o meyo, por lo que bi ha un hueco entre as dos partis suyas.

Tubos[editar | modificar o codigo]

Half-pipe: Ye una pista con pendient por os dos cantos suyos, de traza que pareixe un meyo celindro. Se veiga tamién: Superpipe
Quarter-pipe: Ye un puyata vertical que se fa con a intención de que o esquiador u snowboarder puye, faiga un truco y torne a baixar por o mesmo puesto.

Zonas Terrain Park[editar | modificar o codigo]

En zaguerías as zonas Terrain Park u snowpark se son fendo prou populars en muitas estacions d'esquí. Son arias, por un regular encletatas y no guaire grans, en as que se pueden trobar brincos y obstaclos. En bels puestos Echo mountain park u 540 central board park a dedicación d'a estación ye exclusiva a o snowpark.

En iste tipo de zonas amás tamién se gosa meter musica y bi ha tipos d'obstaclos y brincos, que encara que mas chicoz, pueden estar raros y difícils en bels casos.

En Aragón se puet trobar o Terrain Park de Formigal y atros mas chicoz en Cerler u Valdelinares.