Sirmia

Mapa de Sirmia

Sirmia (Srijem en o uso crovate d'o serbocrovate, Srem en o uso serbio d'o serbocrovate, Syrmien en alemán, Szerémség en hongaro) ye una rechión d'a Plana Panoniana situata entre os ríos Save y Danubio. Actualment ye dividita en dos partitas, la una pertanye actualment a Croacia (županija de Vukovar-Syrmia) y l'atra pertanye a Serbia (distritos de Srem y Backa Meridional en Voivodina). Chicotas porcions d'a partita oriental pertanyen actualment a lo distrito de Belgrado. Sremska Mitrovica ye una d'as ciudatz més importants y corresponde a l'antiga Sirmium d'os romans.

Población por etnias y nacionalidatz

Bi ha un pueblo eslavo d'orichen escuro, os šokci, que por estar catolicos se consideran crovates actualment. Podrían estar a población orichinal d'o Sirmio (y d'Eslavonia y a Voivodina), anterior a los otomans u por o menos anteriors a las Guerras Otomanas d'Europa. Por estar catolicos ellos mesmos se consideran crovates.

En a partita occidental a mayor part d'a población yera crovate (incluindo a los šokci), con una gran minoría serbia y chicotas minorías rutenas, hongaras, y d'atros orichens enantes d'a Guerra d'Independencia Crovate, quan os serbios practicoron a limpieza etnica.

En a partita oriental a mayor part d'a población ye serbia. Bi ha tamién minorías de šokci , hongaros y eslovacos.

Historia

En a "Cronica de los Conquiridors" mencionan o Sirmio como zona de paso d'os ostrogodos de Teodorico lo Gran:

La ora theodorico se partio dela ciudat Real et fuesse alos suyos. Et aplegadas todas las gentes delos godos q(ue) eran somesas a su Regno / aq(ue)xaua se de yr en ytalia. Como el Rey theodorico entro en ytalia et obtuuo aq(ue)lla tierra. El Rey theodorico co(n) innumerable multitut delos godos por el sirnio puyo en las encontradas de panonia et alli entro en los terminos de uenecia que es la p(r)imera partida et entrada de ytalia et atendose cerca de soncio por tal que recreasse(n) las gentes et los cauallos et alli estuuo algu(n)t t(iem)po

En o "Libro de los Emperadors" parlan d'o Sirmio como una tierra sozmesa por o emperador Basilio II:

que ha sosmesa toda Burgaria al imperio, e encara otra nación que se clama Crovates e toda la senyoría de Sirmio

En 1699 os otomans cedioron o norte de Sirmia con a ciudat de Karlowitz a los Habsburgo. En 1817 lis cedioron o sud. Sirmia fue adhibita a Eslavonia, en o Reino d'Hongría. A fins d'o sieglo XVII Sirmia estió o puesto de refuchio d'os serbios d'a rechión de Pec, que siguioron a los exercitos austriacos dimpués d'a suya retirata en 1689. Sremski Karlovci esdevinió a seu metropolitana d'os serbios d'Hongría, con autoridat sobre totas as ilesias ortodoxas d'Hongría.

Sirmia fue adhibita a Voivodina en 1946, de fueras d'a ciudat de Semun u Semlin, unita a Belgrado. En Sirmia bi ha bells eslovacos y hongaros, pero ya no bi ha alemans.

Bibliografía

• André Sellier, Jean Sellier ATLAS DE LOS PUEBLOS DE EUROPA CENTRAL. Acento editorial.