Sicono

De Biquipedia
Ir ta: navego, busca
O sicono de Ficus carica, a figuera, se conoix como figa.

Sicono (d'o griego <σῦκον[1], "sikón", figa) ye o termin con o qual se designa, en botanica, a la inflorescencia y posterior infructescencia caracteristica d'o chenero Ficus, un chenero peculiar adintro d'a familia d'as moracias con qualques especies cautivadas por l'hombre, como a figuera u l'árbol d'o caucho.

Morfolochía[editar | editar código]

Os siconos son agrupacions de flors individuals (inflorescencias), no pas una flor individual, agrupadas en un repeceptaclo vuedo que no s'ubre a l'exterior sique por un forato, l'ostiolo, que s'ubica en o polo apical. Quan as flors se polinizan y maduran, conservan ixa disposición peculiar, y o sicono se torna una infructescencia complexa y atipica, con as verdaderas fruitas individuals (as drupas) en o interior.

Se considera que os siconos han evolucionau, tot ganando en complexidat, dende o modelo de polidrupa que encara presentan belatros grupos de moracias (p. ex. as moras de morera). Os siconos tienen aspecto piriforme, con una cavidat interior a on que se troba as verdaderas fruitas d'o chenero, un conchunto de drupas chiquininas.

Polinización[editar | editar código]

A polinización d'os siconos ye un d'os procesos de polinización más especials en a naturaleza. Os siconos son estructuras que no pueden tener garra forma de polinización que no sía entomofila, o que quiere dicir que precisan de a intervención d'insectos, porque as flors individuals se troban amagadas en o interior y cal que istos animals i dentren ta que se produzca.

L'ostiolo, o forato ta dentrar-ie, ye una barrera especifica, pus gosa tener un diametro muit concreto en cada especie d'istos árbols, adaptau a una especie d'insecto concreta (de regular, chicotz himenopters -graspias-), de forma que cada especie d'istes insectos s'asocia con una especie de Ficus en una relación simbiont en a qual cadaguna amenista a l'atra.

As graspias no penetran en o sicono mirando o polen, sino que i acuden ta meter os uevos, porque as larvas d'istas especies s'alimentan d'as flors que i ha en o interior.

As graspietas fembra, fecundadas en o sicono a on que naixión, nomás pueden atravesar l'ostiolo en un momento preciso de maduración, que coincide con quan as flors femeninas en o interior son receptivas (as flors masculinas maduran dimpués). Os insectos fembra arriban a o sicono carriando polen que se les apegó en o sicono de procedencia, y mientres que dipositan os uevos en bellas flors en o interior d'a inflorescencia (que a figuera sacrifica como alimento ta las larvas, ta poder continar o ciclo), en van polinizando belatras que producirán as drupas y a simient de l'árbol.

As larvas s'alimentan d'as flors no fecundadas a on que sus mais metión os uevos. As primers graspias adultas que amaneixerán gosarán estar os masclos, que no tienen alas pus nunca no gosarán surtir d'o sicono. A sola función que fan os masclos ye mirar as flors a on que se troba as pupas encara inmovils d'as fembras y aparellar-se con ellas. Se considera que a primera eclosión d'insectos adultos, que son os masclos, ye o factor detonant de a maduración d'as flors masculinas d'o Ficus, como forma d'aprestar-se ta quan amaneixcan as graspias fembra y se puedan lievar o polen.

As graspias fembra, con alas, amaneixen dimpués, quan os masclos ya son muertos, y son fecundadas. Contino, foradan a paret exterior d'o sicono y marchan a escar unatra figuera en flor a on que meter os uevos, en carriando o polen d'as flors masculinas que habrán floreixiu en o interior d'o sicono dende que surtión os masclos.

O sicono cicatriza os foratos que le fan as fembras, queda sellau hermeticament, y s'apresta a madurar en transformando-se en a infructescencia plena de simients, que muitos animals consumirán y espardirán a simient con as feces.

Se veiga tamién[editar | editar código]

Referencias[editar | editar código]