San Metier (A Fueba)

De Biquipedia

San Metier
A torre de l'antigua ilesia fortificada de San Metier.
Comunidá autonoma	Aragón
Probinzia	Uesca
Redolada	Sobrarbe
Codigo postal	22336
Monezipio	A Fueba
Altaria	747 m.
Distanzia	100 km enta Uesca 16 km enta l'Aínsa
Poblazión	9 ab. (2005)

Ista fuella ye escrita en baixo sobrarbés.

San Metier ▶ ⁽ⁱ⁾ (ofizialmente e en castellano Samitier; en grafía SLA Sant Metier) ye un lugar dera redolada de Meyano, en o baixo Sobrarbe, que feba parte de l'antiguo monizipio de Meyano, pero que en descomponer-se éste por a inundazión d'o pantano se fízon achuntar con A Fueba.

San Metier agafa ro nombre suyo dera ilesia-ermita que tien zerqueta, en l'alto dera serreta oriental que el separa d'A Fueba, consagrada ta'ros santos Metier e Zeledonio, a cual en fizo alzar-la Sancho "O Mayor" por allá por l'año 1030.

A ilesia dera localidat, simplera, data d'o sieglo XVIII e ye consagrada ta'ra albocazión de San Miguel, pos que en ixos tiempos se perdió ra ilesia orichinal que teneba ro lugar, bellos metros más ta baixo, dera que s'ha conserbau nomás que ra torre que teneba, con unas almenas carateristicas que le'n remataban o tellau.

A plazeta d'o lugar tiene una fuent de piedra tan curiosa porque i-tiene esculpidas calabreras.

Contenius 1 Ermita e Castiello 2 Nombre 3 Fiestas 4 Enrastres esternos

[editar] Ermita e Castiello

l'Articlo prenzipal d'este alpartau ye Ermita de San Metier e San Zeledonio.

l'Articlo prenzipal d'este alpartau ye Castiello de San Metier.

De San Metier t'alto, ta'ra serreta de l'Entremont, sale una pista que se fa bien fura de puyar, pos que por d'enzima de Meyano mete á bellos puestos unas curbas malas, por as cuals de puyar con o coche talmente se'n puet brincar ta baixo. A escursión ta'ras ermitas, puet prolongar-se escaixos 30 minutos, anque dica fer-ne 20 ya s'ancuentra ra ermita de Santa Waldesca, chicorrona e d'o sieglo XVIII, t'ande que i-puyan os debotos en romería. A ermita prenzipal que daba nombre á ro lugar ye bien restaurada modernamente, s'ancuentra en l'alto dera paret rocosa que zerra l'Entremont, por ande i-pasa ra Zinca, espeutacularmente alzada de chunto con o castiello que nomás que ha conserbau a torre hesagonal que teneba e bellos 20 metros de muralla. O conchunto se fa de mal beyer de baixo en o lugar, pero s'albira prou bien desde ra carretera de l'Aínsa.

A ermita, que mandón construir dero sieglo XI como parte d'o castiello, ye una edificazión romanica, d'entre ras más antiguas d'Aragón, empenzipada por mayestros lombardos por os arredols de l'año 1030 anque se rematón as obras en 1050 e no ye gota claro que no las rematasen os mismos abitantes. O templo, simple e rudo, el construyón sin campanario e con tres absides en detrás, con una ubicazión bien estratechica que zerra o conchunto e fa de grande impedimento ta que denguno que fose atacando ro castiello las pasase canutas por o zillo de detrás.

O castiello conserba sólo ra torre d'omenache, que como en Boltaña u Tronzedo tiene ra planta hesagonal. O conchunto el fizon ta que el defendiesen una comunidat de monches-soldato, en un abanze de todo lo que eban de ser años dimpués as ordens melitars en o reino.

[editar] Nombre

En a cronica de San Chuan dera Peña amaneze como Sant Emeteri. En atros testos meyebals ye Sant Mitier, Sanmitier e Sancto Meterio.

[editar] Fiestas

• 17 de chinero, fiesta d'ibierno fendo honor ta San Antón.

• 15 d'agosto, Fiestas Mayor fendo honor t'a birchen d'Agosto.

[editar] Enrastres esternos

Se beigan as imachens de Commons sobre San Metier.

• (an) Estadisticas de San Metier en o portal AragonEsAsi
• (es) San Metier en a web de l'ayuntamiento dera Fueba
• (es) San Metier en o portal toristico de Sobrarbe