São Paulo

São Paulo
	Localidat de Brasil
	; Imáchens de São Paulo.
Estato; • Estato	Brasil; Estato de São Paulo
Superficie	1.523 km²
Población; • Total	; 10.886.518 hab. (2007)
Altaria	760 m.
Ríos	Tietê y Pinheiros
	; São Paulo en o Estato de São Paulo.
	www.Prefeitura.sp.gov.br

De Biquipedia

Ir ta: navego, busca

Iste articlo ye sobre una ciudat brasilenya d'o estato de São Paulo. Ta atros usos se veiga São Paulo (desambigación).

São Paulo ye una ciudat brasilenya, capital d'o Estato de São Paulo, y uno d'os principals centros economicos de Brasil y d'America d'o Sud.

A suya población ye de 10.886.518 habitants (2007) en una superficie de 1.523 km², con una densidat de población de 7.148,07 hab/km². Ye a ciudat con mayor numero d'habitants d'o suyo país y a suya aria metropolitana ye a mayor de Brasil y una d'as mayors d'o mundo. D'ista aria metropolitana fan parte as ciudatz de Campinas y Santos; ámás, as amanatas ciudatz de Jundiaí, Sorocaba y São José dos Campos son esdevenindo actualment tamién parte de l'aria metropoliana de São Paulo.

Antiparte, São Paulo ye o principal centro d'as finanzas y d'a industria d'o Brasil, dende a suya fundación por a Companyía de Chesús en 1554 dica hue, estando muit vinclata a la historia de Brasil.

Contenius

1 Historia
- 1.1 São Paulo en o periodo colonial
- 1.2 En o periodo imperial
2 Cheografía
- 2.1 Climatolochía
3 Localidatz achirmanatas
4 Vinclos externos

[editar] Historia

A historia de São Paulo, una d'as mas antigas y d'as principals ciudatz d'o Brasil, ye muit vinclata a la historia d'o propio país, dende a suya fundación por a Companyía de Chesús en 1554.

Fundación de São Paulo, en un quadro d'o pintor Antônio Parreiras.

[editar] São Paulo en o periodo colonial

Molimento a os bandeirantes, en o Parque Ibirapuera.

O monesterio de Sant Benedet, en São Paulo.

L'orichen de São Paulo de Piratininga estió o 25 de chinero de 1554, quan os chesuitas Manuel da Nóbrega y José de Anchieta bi fundoron un colechio ta catequizar y evanchelizar a la población indichena d'a redolada, clamato São Paulo porque o 25 de chinero ye a festividat de Sant Pavlo. O colechio yera nomás una chicota barraca dica que en 1560 o Gubernador colonial portugués Mem de Sá bi ninvió bellos pobladors procedents d'a localidat de Santo André da Borda do Campo, que quedó albandonata.

En os dos sieglos posteriors, a ciudat yera nomás una chicota localidat aislata d'o resto d'a colonia portuguesa, y por ixo a localidat estió o lugar de naixencia d'os clamatos bandeirantes, que dentraron ta o interior d'o país ta buscar esclavos, oro y diamants. Quan os bandeirantes troboron oro en a rechión de Minas Gerais, o estato portugués prenió a decisión de nombrar a São Paulo ciudat en 1711. Quan o filón de l'oro se remató, l'actividat economica d'a rechión tornó ta o sucre, con São Paulo fendo o papel de centro encaminador d'as mercaderías ta o puerto atlantico de Santos y ta Lisbona y Portugal.

En 1828 se bi establioron estudeyos de Dreito, cosa que permitió o creiximiento d'a ciudat, chunto con un nuevo recurso economico: o café. São Paulo recibió asinas importants continchents d'inmigración forana, a ormino d'orichen italián, encara que tamién d'atros lugars, naixendo asinas as primeras industrias en a ciudat.

[editar] En o periodo imperial

En os primers intes d'o Imperio de Brasil, São Paulo yera considerata como una chicota ciudat provinciana, en mantenindo as suyas caracteristicas d'o periodo colonial, encara que estió en a ciudat de São Paulo a on o rechent Pero I de Brasil proclamó a independencia de Brasil. Sindembargo, a ciudat ganó importancia quan se bi instaloron os propietarios d'as plantacions cafetaleras, atraítos por a facilidat de conexions con o exterior a traviés d'o ferrocarril construito en a segunda mitad d'o sieglo XIX que conectaba a ciudat con o puerto de Santos. Ixo estió un factor de gran importancia, porque yeran presonas con muita influencia politica.

[editar] Cheografía

A localidat de São Paulo ye situata a 760 metros d'altaria sobre o ran d'a mar, y ye trescruzata por os ríos Tietê y Pinheiros.

[editar] Climatolochía

O clima de São Paulo ye un clima subtropical, con una temperatura meya anyal de 19 °C. O mes mas caloroso ye o mes de chinero, con temperatura meya de 22 °C, y o mes mas frido ye chulio, con una temperatura meya de 16 °C. Asinas, São Paulo ye a tercera capital estatal mas frida d'o país, dimpués de Curitiba y Porto Alegre.