Rhiannon

De Biquipedia
Ir ta: navego, busca

Rhiannon ye en a mitolochía galesa y concretament en o Mabinoggion una reina con caracteristicas de deidat y relacionata con o caballo, equivalent d'Epona, a diosa yeugua d'as antigas Galia y Hispania.

Rhiannon ye filla de Hefeydd o biello. Ye casata con Pwyll, y dimpués con Manawydan.

Historia de Rhiannon[editar | editar código]

Pwyll conoixió a Rhiannon quán apareixió como una dama polita bestita con ropas doratas y montando un caballo. Pwyll ninvió os caballers suyos pa encorrer-la, pero iba masiau aprisa. Dimpués de tres días podió agafar-la. Cuán él fabló demandando-li que s'aturase, Rhiannon li dició que preferiba casar-se con él que com Gwawl, con qui yera promesa en contra d'a suya voluntat. Decidioron de trobar-sen una anyada dimpués d'ixe día. Pwyll ganó a man de Rhiannon metendo a Gwawl en un saco machico y forzando-lo a que cambease a suya libertat por reblar y perder o dreito a la man de Rhiannon.

Rhiannon parió un fillo dimpués de tres anyadas de mandato. Manimenos a nueit d'a naixetura o fillo desapareixió mientres yera con 6 nodrizas, que se durmioron. Temioron que las matarían por ixo, y pa evitar que lis dasen a culpa, tacaron con sangre d'un cadiello a Rhiannon mientres dormiba, y dixoron os uesos d'o cadiello arredol d'o leito suyo. Pwyll castigó a Rhiannon con estar 7 anyos en a cort de Alberth y sentar-se totz os dias chunto a una piedra que bi heba fuera d'o castiello, a o costato d'a esportalata, on heba de recontar a suya historia. A más heba de carreyar sobre a suya espalda a qualsiquier invitato que plegase ta a cort como si fuese una yeugua.

O nino apareixió fuera d'o establo d'o rei Teyrnos. Este rei teneba o problema que una yeugua d'él pariba l'1 de mayo pero desapareixeban os poltros. Un 1 de mayo cusiraba a suya yeugua pa veyer que se desveniba. Dimpués de naixer un buen potro a man d'una bestia ya lo agafaba pa lebar-lo-se. Teyrnon li talló o brazo, y quan salió pa encorrer a a bestia se trobó a o fillo de Rhiannon. Adoptaron a o nino; en 7 anyadas ya yera adulto y li daron como caballo a o mesmo potro que yera naixito ixe 1 de mayo quan lo troboron. Dimpués de veyer-se que se pareixeba muito a Pwyll, veyó de qui yera fillo y lo tornó con os suyos padres de verdat, que li pusioron de nombre Pryderi (preoucupación, cuidato).

Equivalencias con atros presonaches[editar | editar código]

  • O mesmo presonache que Rhiannon apareixe en a novela occitana Jaufré con o nombre de Brunisén.
  • S'interpreta una escena d'o Caldero de Gundestrup, con una muller con unos paixaros, como Rhiannon en o suyo chardín con os suyos paixaros que quan cantan adormeixen a os vivos despiertan a os muertos.
  • Por o suyo nombre Rhiannon, que se remonta a una forma más antiga Rigantona, reina gran, ye clarament relacionada con Rivanona d'a mitolochía de Bretanya, y no tan clarament con a Morrigan d'a mitolochía irlandesa.
  • Por a suya relación con o caballo ye clarament relacionata Macha d'a mitolochía irlandesa y con a diosa yeugua Epona de Galia y Hispania, entre os lusitans Iccona, y poderba tener relación con a figura d'o caballo en as mitolochías pirenencas. Esto zaguer tamién la fa pareixita a as Walquirias d'a mitolochía escandinava.
  • Una pervivencia d'o mito en contexto anglosaxón y que ha plegato a o cine ye a historia de Lady Godiva.

Bibliografía[editar | editar código]

  • Jean Markale: Pequeño diccionario de mitología céltica. Alejandría, 1995. 2000.