Quercus pyrenaica

De Biquipedia

Caxico

Dominio:	Eukaryota
Reino:	Plantae
Dibisión:	Magnoliophyta
Clase:	Magnoliopsida
Orden:	Fagales
Familia:	Fagaceae
Chenero:	Quercus
Espezie:	Quercus pyrenaica

Lo Quercus pyrenaica ye una espezie de caxico con fuella marzescent, propia de suelos silizios e climas transizionals entre mediterranio e atlantico.

[editar] Distribuzión

Bi n'ha en lo surueste de Franzia, en la Peninsula Iberica e Norte de Marruecos (no més que en lo Rif).

Por lo que fa á la suya distribuzión en la Peninsula Iberica, ye més que més en la parte zentral e cuandrant nordozidental, on predominan sostratos cheolochicos silizios. La mayor parte de la distribuzión peninsular d'este caxico ye en las sierras que mugan la Cuenca de lo Duero.

En la mitat oriental, on predominan materials calsinosos tien tendenzia á trobar-se en enclaus coinzidindo con afloramientos de materials paleozoicos e rodeno, por exemplo: Sierra d'Espadán, Sierra de Pina, Peñagolosa, Sierra d'Albarrazín, Sierra Menera, Sierra de Cucalón, Sierra de Mira, Moncayo, Sierra de Prades.

Encara que lo aigan baltizato como pyrenaica no ye guaire común en los Perineus, trobando-se en Iparralde. La suya unica represenzatión en Nabarra e Aragón á lo norte de l'Ebro ye la Sierra de Leire e Sierra d'Orba.

[editar] Ecolochía

Ye un caxico espezializato en un ambient d'umidat otoñal-ibernal. Tamién ye espezializato en ocupar suelos azetos que se desembolican sopre sostratos cheolochicos d'areniscas, rocas metamorficas u rocas ignias azetas. Produze muita follarasca, que alimenta á los animals de lo suelo. Contrarresta lo labato de suelo aportando sals en ixa follarasca, estando millorant de lo suelo. En las sierras gosa plegar dica la cota de 1500 e 1600 m.

Como lo Quercus faginea u Quercus ilex puet estar arbustibo e un exemplar desembolicar muitos trallos que salen independients de la mesma radiz, pero plega més luent. Bels caxicos d'estos con muitos trallos pueden formar alfombras de gran estensión pero con 30 cm d'altaria. Esta capazidat de lo Quercus pyrenaica de desembolicar grans estensions de matullos li permite bibir á la sombra de lo Pin royo, crexer e sustituir-lo en condizions naturals.

Seguntes Pedro Montserrat Recoder, lo Quercus pyrenaica tiene relazión con l'orichen de las rañas de la Meseta Zentral, que se formoron por mobimientos de ladera. Con la plebia d'otoño-ibierno lo suelo, buralenco, saturato d'augua, cai fluindo ladera enta baxo. La presenzia d'una alfombra de trallos de caxico, con las suyas radizes á ran de suelo, forma una espezie de pelleta que mantién la forma d'este suelo mientres se muebe caindo. En muitos puestos las rañas u mantos colubials de lo pliozén e cuaternario superan los 20 m d'espesor e tienen una color royenca. Bi ha encara rañas autibas en los Montes de Oca e la Demanda, como por exemplo en lo Puerto de la Pedraja.

La defesa de Quercus pyrenaica se clama bardal e s'emplegaba pa tener animals de trazión como güeis e esdebeniba boyalar u boalar. Por intereses fusters en muitos puestos como la zona de pinetas de Soria e Serranía d'Albarrazín, l'ome ha faborexito lo pin royo tallando estos caxicos e fendo que i aiga pinetas por debaxo de lo suyo ran topografico orichinal.

[editar] Denominazions

No tien garra denominazión espezifica en aragonés autual porque l'aragonés se charra autualment fuera de la suya aria de distribuzión prenzipal. Los pocos exemplars de la Sierra d'Orba deben pasar como un caxico més. No presenta una denominazión omochenia en castellán. En bellas zonas como Lión, Palenzia e Salamanca, se clama rebollo. Sin d'embargo on coinzide con lo Quercus faginea, como por exemplo en la mayor parte de Castiella, ye este á qui dizen rebollo, e claman roble á lo Quercus pyrenaica, por tener una fuella més gran que fa recordar á los Quercus de fuella caduca. En catalán los botanicos e cheografos claman roure reboll ofizialment á lo Quercus pyrenaica.

Melojo ye como dizen en castellán de Segobia á lo Quercus pyrenaica e ye como agora prefieren dizir-ne los botanicos españols en lurs obras, pa crebar l'ambiguedat de lo termin rebollo e l'amplaria de lo termin roble. Marojo ye una bariant d'esta parabra que s'emplega en zonas d'Aragón que mugan con Castiella como Sierra Menera. Melojo, e sobre tot Marojo, se relaziona con l'asturlionés marfueyu, e talment esistió en aragonés tergüelán la parabra "marfuello", corradical de lo catalán marfull, que sin d'embargo se refiere á lo Viburnum tinus.