Carrasca
De Biquipedia
| Carrasca | ||||||||||||||||
|---|---|---|---|---|---|---|---|---|---|---|---|---|---|---|---|---|
 Carrasca |
||||||||||||||||
| Clasificazión zentifica | ||||||||||||||||
|
La carrasca u lezinera (Quercus ilex) ye un arbol carauteristico de las selbas mediterranias amplament distribuito por la Cuenca Mediterrania.
Como espezie carauteristica de la Cuenca Mediterrania tien fuella perén e esclerofila, dura, con menos superfizie que los Quercus de fuella caduca e muitas begatas con punchas.
Lo suyo creximiento ye lento e la suya fusta ye densa.
Lo suyo fruito se clama ballota u lezina (on se diz lezina á lo fruito, corresponde clamar lezinera á l'arbol), de lo mesmo tipo que lo glan de los caxicos.
[editar] Subespezies
Bi ha muitas bariants e se distribuyen en dos estremos que gosan considerar subespezies pero que bels botanicos consideran espezies. La bariant tipica ye Quercus ilex ilex, més antiga e adautata a lo clima mediterranio calido e umido. La subespezie Quercus ilex ballota, enantes clamata Quercus ilex rotundifolia representa l'adautazión de l'anterior a lo clima mediterranio continentalizato e a begatas menos umido de l'interior de la peninsula iberica e Berberia.
[editar] Relazión con la Cultura tradizional
En la Cuenca Mediterrania puet formar selbas on domina lo estrato arborio, los carrascals. En lo paisache de lo Semontano Perinenco e bellas depresions preperinencas la bechetazión natural ye lo carrascal, y encara ye bien representato. Sin d'embargo l'azión umana ha favorexito que lo Pin borde, de creximiento més rapido li aiga preso puesto.
Las ballotas de bellas bariedaz son dulzes e las gosaba minchar enantes la chent. En Estremadura e Andaluzía (y antismás en Tergüel) los tozins de raza iberica minchaban ballotas, que teneban azidos grasos insaturatos como l'azeto linoleico, que dimpués s'acumulaban en lo blanco de la suya carne, con lo que dan un pernil de gran calidat.
La fusta ye d'alto poder calorifico e se fa serbir pa fer carbón bechetal.
Por estar una bersión mediterrania de lo caxico, ye sagrato pa las culturas antigas indoeuropeyas como griecos e romans, e ye l'arbol de Zeus u Chupiter, egual que en atras tradizions de Zentroeuropa u més luent, lo caxico ye l'arbol de los dioses de la tronata locals. Amanix en las tradizions e leyendas aragonesas, e dica en lo suyo escuto, car l'Árbol de Sobrarbe ye una carrasca. Tamién ha dato nombre á lo lugar sobrarbés de Lezina.
[editar] Etimolochía
La parabra carrasca ye prerromana, de posible orichen sorotaptico e corradical con lo catalán garriga. Carrasca ye una parabra muito estendillata en lo zentro d'a Peninsula Iberica porque s'emplegaba en mozarabe e arabe ispán.
La palabra lezina ye d'orichen latín e se relaziona con lo castellán encina e lo catalán alzina. Seguntes Joan Coromines, en Cataluña la deseparazión de l'aria on se diz alzina e l'aria on se diz carrasca coinzide en parte con la deseparazión entre la Cataluña Nueba e la Cataluña Biella. Bels botanicos catalans siguen la combenzión de clamar a la subespezie ilex como alzina e a la subespezie ballota como carrasca aprobeitando lo feito que la primera se troba més que més en l'aria termediterrania umida e sozmediterrania de lo nordeste e la segunda en l'aria en l'ueste e sur, pero en catalán las dos parabras son cheosinomimos e la chent no esferenzia subespezies ni por carauteristicas ni por emplego.
En Aragón tamién podió desbenirse que lezina estase lo nombre emplegato en que no ocuporon los musulmans e carrasca lo nombre en las arias més baxas e mediterranias que si que ocuporon, porque lezina s'emplega més que més en lo norte, pero no ye tan claro como en lo caso catalán porque la parabra carrasca tamién s'ha documentato en las bals més altas de lo Perineu axial.
