Quadra

De Biquipedia
Ir ta: navego, busca
Interior d'una quadra en una casa deshabitada, en L'Atiart (A Fueva).

Una quadra (d'o latín <QUADRA) ye una cambra u un edificación especialment construida ta cerrar-ie o bestiar, ya siga de forma temporal u de perén. As quadras pueden fer parte d'un edificio, estando de regular una d'as cambras inferiors (con freqüencia á o nivel d'a carrera) y deseparadas d'as estancias en as que i fan vida as presonas, u tamién pueden estar un edificio exento, deseparau fisicament d'a vivienda, como una borda.

En l'Alto Aragón existen quadras d'ixas dos maneras. En as casas que per as suyas dimensions el permiten se soleba disenyar una quadra en a planta baixa, á nivel d'a carrera con acceso á traviés d'o patio u con bella puerta propia en es menos casos. As quadras exentas existen á sobén en as casas que per mida se troban privadas ta poder-las concaber en o edificio de vivienda. Tampoco ye cosa guaire extranya de trobar-se bordas con dos plantas, en as que a planta baixa ye una quadra y o suler (u planta superior) fa de paller u de falsa.

As quadras en as que se i cerraban os mamiferos grans, como vacas u abríos, tienen o costumbre de concaber estructuras que permetesen disposar-ie á os animals de forma que ocupasen lo menos espacio que se podese, como p. ex. un pesebre u rastillera fixa en a que se podese ligar-los y dar-les yerba, con presencia en bells casos d'uns foraus en a paret, ditos «saliners» u «salinars», en os que se meteba una piedra de sal cristalizada («piedra salinera») ta que la i podesen laminar. Isto ye caracteristico, más que más, d'as quadras en as que se i guardaba vacumen, pus d'alcuerdo con o costumbre d'antigos, as vacas podeban perder productividat si pasaban frido (diz que se les «curtaba a leche») y ta privar que ixo les pasás se soleban guardar cerradas tot l'hibierno, motivo per el que se les i heba de proporcionar tot el que amenistasen en estando alí.

Ta solventar os problemas de lempideza, as quadras se pavimentaban con lastras de penya quan o suelo de debaixo yera de tierra. Isto yera important ta sacar o fiemo dimpués, pus iste se gosaba rascar con espalas ta cargar-lo en simples carretillos. Qualques casas, as millor disenyadas, incluiban tamién una canal de desaugüe ta o fiemo, facilitando muito a fayena de limpiar, perque se podeba ayudar muito arrullando-le tarrazos d'augua con un simple pozal.

Imáchens[editar | editar código]