Pueyo testigo

De Biquipedia
Ir ta: navego, busca
Pueyos testigo en as Bardenas Reyals.
Esquema sobre a relación entre os pueyos testigo y las cuestas, texto en francés.
Zaguera expresión d'un pueyo testigo en as Bardenas Reyals enantes de desapareixer por erosión d'o libel sedimentario resistent d'o cabalto.

Un pueyo testigo u pueyo testimonio ye un pueyo u un mont, dependendo d'a escala, que destaca muito en un terreno on representa os zaguers restos d'una formación cheolochica que ha desapareixito por un proceso prolongato d'erosión. Indican l'antiga extensión de plataformas estructurals u cuestas.[1]

En a depresión de l'Ebro y atras cuencas sedimentarias terciarias d'a Peninsula Iberica bi ha uns pueyos testimonio caracteristicos ditos muelas, con un tramo d'estratos horizontals y resistents de calsinera, piedra d'arena u almendrón en o suyo cabalto envistables como cinglos. Manimenos bells autors consideran pueyo testimonio no a las muelas en cheneral sino a muelas chicotas u restos d'ellas y con forma conica a on encara s'observa una minima presencia d'os estratos duros en lo suyo cabalto,[1] como o Piagordo d'Andorra. Atro eixemplo de pueyo testimonio ye o Pueyo de Belchit, con un libel resistent de calsineras miocenas y a on se troba a ermita de Nuestra Sinyora d'el Pueyo.[2] En Villanueva de la Uerva bi ha un pueyo testigo dito Cabezo de Sant Pavlo.[3] En a Meseta Castellana os pueyos testimonio reciben asobén a denominación d'alcores[4], arabismo que no ye desconoixito de tot en Aragón, visible en a microtoponima de Tramacastiel y que talment aduye a interpretar o macrotoponimo "Alcorisa".

Quan un pueyo testigo pierde tramo duro d'estratos que proteche os materials tovos esdevién un antepueyo[1], que puet prener forma de teta, como se vei en Las Tetas de Robres[5] u en toponimos con a radiz "mambla" (parola que deriva d'o latín MAMULA). Una vegada que s'ha formau un antepueyo a erosión irá desfendo-lo con relativa rapideza a escala de tiempo cheolochico y esdevendrá una simpla loma u un simple puyalón en meyo d'una plana.

Veyer tamién[editar | editar código]

Referencias[editar | editar código]

  1. 1,0 1,1 1,2 (es) Francisco Pellicer Corellano, Maria Teresa Echeverría Arnedo Formas de relieve del centro de la depresión del Ebro pp63. Institución Fernando el Católico, 1989.
  2. (es) Miguel Arenillas Parra et al. La presa de Almonacid de la Cuba. Del mundo romano a la ilustración en la cuenca del río Aguasvivas. Gobierno de Aragón, 1996 p 73
  3. (es) Eduardo Viñuales Cobos: Red natural de Aragón. nº 25, Campo de Cariñena Prames, 2009.
  4. (es) Bermudo Meléndez, Jose María Fuster Geología Editorial Paraninfo, 1978. p 134
  5. (es) Fernando Biarge Piedra de Arena. El paisaje monegrino. Ediciones del Mallo 2004.