Pueblos eslavos

De Biquipedia
Ir ta: navego, busca
Estatos controlatos por os Eslavos

   Eslavos occidentals

   Eslavos orientals

   Eslavos d'o sud

Os pueblos eslavos son un conchunto de pueblos nativos d'Europa Central y Oriental que tenioron una gran expansión en l'Alta Edat Meya de traza que huei os pueblos de luenga eslava ocupan en Europa una superficie mayor que os pueblos indoeuropeus d'atras brancas més antigas.

As luengas eslavas actuals encomenzoron a deseparar-sen dende os sieglos VI y VII y son més pareixitas entre ellas que as luengas neolatinas.

Os eslavos ocuporon un bueito demografico que se creyó quan muitos pueblos chermanicos (en especial lurs clases dirichents) emigroron dende Europa Central enta o Imperio Román. Quan o Khanato d'os Avaros dominaba a cuenca d'o Danubio a población base yera eslava y s'estendilloron por as marguins d'os territorios baixo influencia avara.

Os eslavos no teneban tradición estatal, y encomenzoron a formar estatos baixo influencia de pueblos d'as estepas como os bulgaros, Costantinoble, u d'os chermans. Ixa manca de tradición estatal fació que os eslavos reblasen debant d'a expansión alemana ta l'este, dica que se formó un estato eslavo fuerte, o reino de Polonia, en asociación con Lituania, que tenió a hechemonía d'Europa Centro-Oriental en o sieglo XVI, ocupando un amplo territorio entre a Mar Baltica y a Mar Negra.

Atro estato eslavo, Rusia, ocupó o puesto cheopolitico de Polonia quan entró en decadencia. En a Europa d'os Imperios os pueblos eslavos yeran repartitos entre o Imperio Ruso, o Imperio Otomán, o Imperio Austro-Hongaro y Prusia u dimpués Imperio Alemán, y por ixo a primera Guerra Mundial afectó muito a totz os pueblos eslavos, beluns d'os quals consiguioron un estato independient quan s'esminglanoron estos imperios. A propaganda panchermanista feba veyer a primera Guerra Mundial como una guerra entre Chermanicos y Eslavos, y este punto de vista subchaceba en as ideyas nacionalsocialistas en o periodo d'entreguerras y a Segunda Guerra Mundial.

Dimpués d'a segunda Guerra Mundial a mayor parte d'os eslavos quedoron en estatos controlatos por os comunistas, dica que con a decadencia d'o rechimen comunista de Moscú permitió a los estatos satelites de desfer-sen d'o control d'as autoridatz comunistas y cambear de rechimen.

Luenga[editar | editar código]

Gnome-searchtool.svg
Ta más detalles, veyer l'articlo luengas eslavasveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

As luengas eslavas son una branca chirmana d'as luengas baltas (grupo "baltoeslavo"), y talment siga a zaguera gran branca de luengas indoeuropeas en individualizar-se. O eslavo ye un grupo de luengas indoeuropeas "SATEM", y as parabras que en latín encomienzan con C, (se leiga K), en eslavo encomienzan por S: "corazón" ye sertse, y "cien" sto.

A l'egual que as luengas turquicas as luengas eslavas son més pareixitas entre ellas que as luengas neolatinas, y a causa d'esto ye que a expansión eslava y d'un luengache proto-eslavo orichinario d'a cuenca danubiana estió tardana y posterior a la caita d'o Imperio Román, quan se produciba a evolución dende o latín tardano enta as luengas romances.

Una clasificación tradicional divide as luengas eslavas en occidentals, meridionals y orientals. Manimenos esta clasificación ye quistionata por bells lingüistas porque considera os luengaches estandarizatos oficials y no os suyos dialectos, os luengaches minoritarios y as abundants parlas de transición entre as luengas eslavas.

En as luengas eslavas meridionals se vei una división entre o grupo eslovén-serbocrovate y o grupo macedonián-bulgaro, que reflexan os dos camins d'a eslavización d'os Balcans: dende o Danubio meyo y dende o baixo Danubio. Esto explica que o serbocrovate y eslovén tiengan coincidencias con o checo, con qui teneban contacto dica que a maguiarización d'os eslavos panonians y una colonización con bayoarios (antipasaus d'os baverans, tiroleses y austriacos) los deseparó. Os elementos eslavos no recients d'o rumán coinciden con o bulgaro-macedonián, que amés antes yera més estendillato enta l'este (perdió terreno debant d'o serbo-crovate.

A luenga eslava més arcaizant ye o eslovén por a suya posición marguinal (equivalendo a lo caso d'o rumán), amés evolucionata o polaco, (equivalendo a lo caso d'o francés en as luengas romances).

O luengache eslavo de l'alta edad meya Macedonia, muito a man d'o proto-eslavo sirvió de vehiclo de cristianización d'atros eslavos y influyó en a evolución d'atros idiomas eslavos, y dica d'o rumán.

Estructura social[editar | editar código]

Os primers eslavos s'aplegaban en clans familiars patriarcals, unitos en federacions dirichitas por os més viellos.

As federacions de clans orichinoron tribus, con culto común a antipasaus comuns y con organización militar (centena, unidat basica d'a leba; quiliarquía u conchunto de 1000 hombres).

Os capitostes d'os clans esdevinioron con o tiempo una clase aristocratica, pero o localismo u as particularidatz locals no deixan fer asociacions superiors y estar pueblos més poderosos.[1]

Quan os eslavos ya yeran organizatos en "confederacions tribals" u estatos se vei una terminolochia amprata de pueblos vicins no eslavos: principe se diz Kunedzi, que provién d'o chermanico König, korlji (en checo kral) provién de "CARLES MAGNO", y zar provién d'o latín "CAESAR".[2]

Orichen[editar | editar código]

Culturas arqueolochicas en ixas envueltas d'os orichens eslavos

O tema d'a etnochenesi d'os pueblos eslavos ha estato muito polemico porque i heba muita escuredat en as fuents. Muitas yeran as culturas arqueolochicas d'a Edat de Bronze, de Fierro u de tiempos d'os romans que se miraban como candidatas d'estar a cultura proto-eslava. En as zagueras decadas os arqueologos discuten entre dos opcions:

Pa beluns os primers eslavos viviban en epoca romana en Polonia y Rusia meridional, on fuoron incluitos en unas culturas sozmesas a la influencia d'o Imperio Román: Prezeworsk y Cernjahov. Pa beluns a cultura de Prezeworsk estió propia d'os vandalos y vicins y a cultura de Cernjahov estió propia d'os godos d'a Mar Negra y pueblos sozmesos.

Pa atros l'orichen d'os eslavos ha de mirar-se en as rechions forestals de l'alto Dniéper que no tenioron contacto con o mundo román, alavez serían representatos por a cultura de Kiev.

Michel Kazanski fa notar que a segunda opción ye més probable ya que as culturas més recients atribuitas a los pueblos eslavos no amuestran influencias romanas y si que amuestran pareixitos con a cultura de Kiev.

Os eslavos s'estendilloron probablement dende o sieglo V dende as selvas de l'Alto Dniéper enta o Danubio por un territorio ocupato dica ixe inte por a Cultura de Cernjahov. Esta cultura representa a poblacions chermanicas, (os godos), y no chermanicas, (dacos, chetos y sarmatas sozmesos a los godos).

Os dos reinos godos heban estato desfeitos por os hunnos a fins d'o sieglo IV. Os chacimientos més antigos atribuitos sin duda a poblacions eslavas son precisament d'esta rechión y datan de tiempos d'o dominio d'os hunnos (Kodyn, Teremcy, Hitcy, Pescanoe). Dende o sieglo VI os eslavos son documentatos en a muga danuviana d'o Imperio Román d'Orient. Seguntes as fuents escritas os eslavos en o sieglo VI se distribuiban en dos unions tribals: Procopio de Cesaria enta l'anyo 562 parla d'os esclavens (sklavenoi) y os antos en a suya obra "Historias sobre as guerras". O bispe Chordanes menciona en os suyos escritos de 534 a los esclavins y a os antos, como pueblos venetos que ocupan un amplo territorio en os Alpes Orientals, cuenca d'o Danubio y Alta Vistula. Marcelín Comes ofrix datos pareixitos.[3]

L'arqueolochía permite distintinguir entre tres culturas eslavas contemporanias:

Os arqueologos han costatato a homochenidat d'estas culturas y elementos comuns en habitat, necropolis, ceramica, armamento liuchero, vestuario y organización social.

Os eslavos sozmesos a los avaros y a espansión eslava[editar | editar código]

Os avaros entroron en Europa en l'anyo 567. En l'anyo 561 arriboron en o baixo Danubio.[1] Desfacioron o Reino d'os Chipidas y fixoron o centro operativo en a Val d'o Theis. L'apocheu d'os avaros se produció baixo o reinato d'o khan Bayan (565-602), baixo qui s'establioron en Panonia en l'anyo 565. A presencia d'os avaros en Panonia fació que os Longobardos emigrasen ta Italia y aceleró a dentrata d'os esclavens en os Balcans.[1]

Enta l'anyo 570, os esclavens son sozmesos por os avaros. Os avaros y bells esclavens creboron a muga d'o Danubio en os anyos 581 y 582 y plegoron dica Sirmia en ixa incursión.[1] Os avaros chunto con os eslavos atacoron en muitas ocasions o Imperio Román d'Orient contribuindo a la desromanización de l'antigo Illiricum. Os antos fan liga con Costantinoble contra os avaros.

En o periodo en o que os eslavos son sozmesos a los avaros (entre l'anyo 570 y l'anyo 630) en a cuenca d'o Danubio creyoron muitas necropolis que conoixen os arqueologos (Alatyan, Kiskörös, etc...). En as tumbas s'os guerrers bi ha arcos, sayetas, cinturons de tiras, y amaneixen por primera vegata en Europa os sables y estribos. En o sieglo VII bi ha en esta rechión necropolis mistas avaro-eslavas, como a de Devinska Nova Ves, en Checoslovaquia.

Dende a cuenca Danubiana a la sombra d'os avaros os eslavos conoixerán una expansión tan gran que a fins d'o sieglo VIII os eslavos serán presents en un aria ampla que va dende o Laco Ladoga dica Grecia y dende o río Volga dica o río Elba.

Expansión por os Balcans[editar | editar código]

As incursions eslavas son documentas en o Imperio Román d'Orient dende l'anyo 527. En o sieglo VI os eslavos trescurzaban de contino o limes danubián por dos camins principals: principalment os antos por o baixo Danubio enta Tracia y principalment os esclavens por o Danubio meyo enta o Illyricum. A primera important d'incursions que facioron os eslavos, estió entre os anyos 539 y 550, fue chunto con os yutrigures (bulgaros nomadas encara no eslavizatos) y ha deixato senyal arqueolochica en Macedonia y Bulgaria dende Prişlep dica Filopópolis (actual Plovdin).[1]

En l'aria de Naïssus, (actual Nish) y Cariccin y Iustiniana Prima, (actual Grad), principalment, pero tamién entre Muntenia y Dobrucha y en o Peloponiso l'arqueolochia documenta una incursión eslava d'os anyos 570-571 que no ye conoixita por os historiadors.[1]

Entre os anyos 578 y 586 i habió una invasión conchunta avara y eslava en a que fue preso o Sirmium (582) y ha deixato senyal arqueolochica en Salona (Dalmacia), en o norte de Serbia, en Bosnia Oriental, en Macedonia, en o norte de Bulgaria, en a redolata de Salonica y en o Peloponiso.[1]

O emperador Mauricio a fins d'o sieglo VI prebó una contraofensiva més allá d'o Danubio y forachitar a los eslavos ya establitos en os Balcans, pero a penetración d'os eslavos ya yera irreversible y los eslavos s'establiban ya tan a lo sud como Macedonia y Salonica enta l'anyo 600, y aprendeban tecnicas de piratería y saqueyo navals a bordo de monoxilos. A campanya de l'anyo 601 de Mauricio estió un fracaso y fue enchaquia d'a suya caita.[1]

A principios d'o sieglo VII i heba anarquía en Costantinoble y o limes danubián desapareix pa cutio baixo a presión d'os avaros y eslavos. L'arqueolochía documenta esta invasión entre l'anyo 593 y l'anyo 602 en o norte de Serbia, en Naïssus (Nish), en o norte de Bulgaria y dica o Peloponiso.[1]

A presencia eslava se consolidó en Macedonia y Mesia, y i habió saqueyos en Tracia, Tesalia, Grecia, Peloponiso y dica Creta en l'anyo 623. Salonica fue asitiata en os anyos 617 y 619.[1] L'arqueolochía documenta una invasión eslava y avara entre os anyos 613 y 618 en o Peloponiso, en Serbia, en Bulgaria, que coincidiba parcialment en o tiempo con una invasión persana en Asia la Chica.[1]

Entre l'anyo 623 y 631 os eslavos se liberan d'o chubo d'os avaros,[1] que fuoron derrotatos por os griegos bizantins en l'anyo 626 de pa cutio dimpués d'asitiar Costantinoble con os persans. Mientres o sieglo VII esdevienen os amos d'os Balcans. O emperador Heraclio permitió a os crovates y serbios que s'establisen en territorios d'o Imperio Román d'Orient mugants con os avaros pa que fesen d'etnia-tampón. En l'anyo 626 diferents grupos eslavos dominaban ya totz os Balcans, Macedonia, y parte de Tesalia, Grecia central y Peloponiso, encara que os serbios y crovates reconoixeban teoricament a sobiranía imperial.[1]

En 796 os avaros son derrotatos por Carlos Magno. O Imperio d'os Avaros fue repartito entre o Imperio Carolinchio y o Primer Imperio Bulgaro con o río Timiş como muga.

A fins d'o sieglo VIII y principios d'o sieglo IX o Imperio Bizantín recupera muitos territorios en Grecia y a población, que ye en gran mesura eslava, será re-helenizata. Dica o sieglo XV a presencia eslava será considerable,[1] y en a Macedonia griega será forachitata en as limpiezas etnicas d'a segunda Guerra Balcanica.u asimilata decadas dimpués.

Imachen:Macodnian Sklavinia.png
Territorio tribal eslavo de Macedonia, dito Sclavinia por os bizantins, enta l'anyo 700

Bellas zonas habitatas por pueblos eslavos recibiban a denominación de sclavinia, como as actuals "Eslovenia" y "Eslavonia". En aragonés medieval en trobamos bella referencia escrita:

Esclavonia & de Pulla, & de la ylla de Corfou & de Chifolonia por grandes monedas que dio

([4]).

Alla do Ytallia fina a la mar de Venecia, si es la tierra d'Estra de vltra part la mar, do yes larçobispado de Jadrio e atros dos arçebispados e xviiij º bispados. Apres esta yes la tierra de Sclauonja en do ha ij arçobispados e .viij. bispados. Apres es la tierra de Vngria, do ha dos arçobispados e .x. bispados. Apres esto es la tierra de los aspoliens do ha .iiij.º arcebispados con todos .viij.bispes Mas de aquesto no dira agora mas el conto, ante retornara a su materia alla do el lexo Secilia a la fin de Ytalia.

([5]).

Mas aquellos que biuen a manera de bestia habitan en las stremjdades de la tierra; por que en dreyto de meydia son los etiopianos, enta septentrion son los sclauones...

([5])

En a "Cronica de Morea" parlan d'eslavons:

Et a micer Jacomo de la Rocia fuele dado, en baronia, en las partidas de los Esclavones & de la Escorta, quatro cauallerias de tierras & de villanos, & fizo vn castiello, el qual se clamaua Viligort, & por aquel era clamado el senyor micer Jacomo de Viligort

En o "Libro d'os Emperadors" parlan d'un senyor d'Esclavonia a qui quereban demandar aduya os ateniens en os zaguers anyos d'a emperadriz Irene, y ye tentador pensar que se referise a un territorio habitato por eslavos macedonians en l'actual Grecia:

Cuando la emperadriç Ereni romanió monarca, el ermano de su marido e algunos qui eran en presión fuyeron e entraron en la iglesia mayor. Mas uno de casa del emperador que.l dizían Areçio, el cual havía grant privadança en el palacio, tanto favló con ellos fictamientre que los fizo sallir de la esglesia prometiéndoles que no havrían ningún mal. Los cuales, como fueron sallidos, la emperadriç los ha jutgados ir en Atenas. E seyendo en Athenas algunos nobles pregaron al senyor de Esclavonia que prestás con favor e ayuda a un ermano del marido de la emperadriç por entrar a Contastinoble e por haver la senyoría. Mas sintió aquesto la emperadriç e fizo clavar los ojos a todos aquellos.

En a "Grant Cronica de Espanya" fan servir o toponimo sclauonia chunto con "Ilirico" parlando de tierras saqueyatas por os godos, (que evidentment estioron presents en ixos territorios muito antes que arribasen os eslavos). En principio no podemos saber si se refieren a la sclavinia de Macedonia u a las actuals eslavonia y eslovenia:

Deq(ue) los godos huuiero(n) stado e(n) scicia g(r)ant t(iem)po & fuero(n) multiplicados e(n) gra(n)t num(er)o de g(e)n(te)s dexaro(n) a guardar la p(ro)ui(n)cia de scicia & de dacia p(ar)tida de lures g(e)n(te)s segunt es dicho desuso. & todos los ot(r)os passaro(n) el dinubio & (con)quiriero(n) & destruyero(n) toda sclauonia & yllirico & toda g(r)ecia. & touiero(n) el sitio de lur senyorio e(n) macedo(n)ia & e(n) yllirico por spacio de diez anyos. Et u(n)a p(ar)tida d(e)los godos poblaro(n) e(n)las mo(n)tanyas q(ue) so(n) dichas oy dispotado de romania pri(n)cipado d(e)la morea la gra(n)t ciudat de sparta / & la ciudat de uat(r)ia /. & los habitadores de aq(ue)lla fuero(n) clamados spartos.

Expansión enta o noreste[editar | editar código]

En a segunda metat d'o sieglo VII y en o S VIII tribus eslavas provinients en o esencial d'a rechión d'o baixo Danubio abanzan enta o norte, a traviés d'a val d'o Dniéper y esclafan a los grupos locals eslavos, balto-eslavos y baltos. Restos crematos en os habitats d'esta rechión son un vestichio d'incendios (Kolocin, Demidovka, Tusemlja, etc...), a l'egual que a troballa en os libels de destrucción de tipo avaro, y chabalinas con dos ganchos, armas que a sobén fevan servir os eslavos danubians, son testimonio d'a progresión d'a expansión eslava.

Dimpués d'estas migracions bi ha nuevas culturas eslavas, que amaneixen en o sieglo VIII, como as de Luka-Rajkoveckaja u Romny Borsevo, que preceden dreitament a la cultura d'a Rusia Meridional.

Pareix que as altas temperaturas de l'alta edat meya (anteriors a la "glaciación chica") facioron posible que as zonas de selva mixta de Rusia y Belarrusia no fuesen tan dificils pa o modo de vida agricola como en l'actualidad.

Os eslavos orientals salen d'a protohistoria quan a fins d'o sieglo VII y principios d'o sieglo VIII contactan con os gazaros y en o sieglo VIII contactan con os escandinavos.

Os gazaros atacoron a los eslavos d'o Dniéper meyo y facioron desapareixer a cultura d'os antos, (cultura de Pen'Kovca), como amuestran chacimientos en os que se troban trasoros amagatos ("as antiguidatz d'os antos"). En l'aria baixo dominio gazaro se desembolica una nueva cultura que sustituye a l'anterior, a cultura de Saltov.

Os escandinavos arriban en a costa oriental d'a Mar Baltica, penetran en o interior por as rotas d'os grans ríos fan contacto con os fineses, os baltos y os eslavos orientals. Se creyan uns centros protourbans nuevos que en l'aria d'o Laco Ladoga que son analogos a los de Birka y Hedeby (Escandinavia) y amuestran una fusión d'elementos culturals fineses, eslavos y escandinavos. En l'anyo 862 os eslavos de Novgorod y os fineses aceptan a dominación d'un principe escandinavo que s'heba establito en a redolata d'o Laco Ladoga, y se considera una fita en o naiximiento de Rusia. Os escandinavos d'orichen proto-sueco que i heba en as gran cuencas fluvials d'Europa Oriental chunto con os eslavos son conoixitos como "varegos" y son comparatos por beluns con os "normandos" d'Europa Occidental (fusión de viquingos, francos y galorromans).

Os eslavos orientals "proto-rusos" consiguioron establir-sen en o sieglo IX en a selva mixta que bi ha entre a taiga y a estepa arbolata, y i desembolicoron una agricultura propia de zonas marguinals, con cerials. Huei esta zona ye muito dura pa esta actibidat, y os rusos han tenito que esforzar-sen muito pa sobrevivir en esta zona, (han tenito que complementar l'agricultura tradicional con pesca, caza y recolección en mayor mesura que en Europa occidental, pero amés d'una mayor temperatura més alta en ixos tiempos, bi heba un factor favorable p'a supervivencia d'os eslavos orientals en ixa zona: una ampla zona con "tierra negra", dita en ruso Opolie, que no se corresponde con o suelo teorico actual pa ixa latitut y vechetación. L'Opolie ye un ampla aria oval d'uns 130 km de largura entre os ríos Kliazma y Volga, con centro en l'antiga ciudat de Yariev-Polski, y con as ciudatz de Vladimir, Alesandrov, Pereslavl-Zalesski, Rostov la Gran y Sezdal en os suyos cabos. En l'actualidat esta zona tien muitos lugars agricolas y menos arbols que as rechions mugants y ye celebre por as suyas cereceras.

Expansión enta o norueste[editar | editar código]

Os eslavos abanzoron enta l'Elba y la costa baltica, encara que no arriboron en a Ribera baixa de l'Elba dica fins d'o sieglo IX. O primer estato formato por os eslavos occidentals, Moravia la Gran ye calendato de principios d'o sieglo IX, sucedendo a lo Estato de Samo fundato por un franco en un territorio habitato por eslavos.

A expansion eslava enta o norueste fue favoreixita a lo principio por as campanyas de Carlos Magno contra os saxons. Pueblos eslavos como os obroditas s'estendilloron a costa d'os saxons. Manimenos os pueblos chermanicos teneban mayor creiximiento demografico y ya heban preso una tradición estatal d'os romans y galorromans. D'esta traza a expansión eslava s'aturó. Ya en tiempos de Carlos Magno entre l'anyo 789 y 812 i habió guerras repetitas entre francos y eslavos occidentals que fació a los wilzos, sorabos y checos esdevenisen tributarios d'o Imperio Carolinchio, que estendilla a suya sobirania dica a desembocadura de l'Oder.[1]

En tiempos d'os emperadors saxons i heba campanyas contra os eslavos con a escusa de cristianizar-los. En l'anyo 928-929 son sozmesos os hevelios (de Brennaburgo d'o Havel) y los dalemincios. En Lenzen esclafan un levantamiento d'os wilzos y obroditas. Henrique I ha de fer una tregua de nueu anyatas con os eslavos pa poder combatir a los hongaros.[1]

Entre os anyos 936 y 937 o rei Otón I o Gran manda organizar as marcas d'a muga pa enfortir-las. I son presents Hermann Billung y Gero.[1]

En octubre de 955 os alemans vencen a los eslavos en Recknitz, poco dimpués d'a batalla de Lech contra os hongaros (10 d'agosto de l'anyo 955).[1]

A cristianización d'os eslavos contina con a fundación d'os bispatos de Schleswig, Oldenburgo, Havelberg, Brandenmburgo (948), Meissen, Merseburgo, Zeitz (dimpués en 1032 traslatato ta Naumburgo), toz sufraganios de l'arcebispato de Magdeburgo (968) pa cristianizar a los eslavos de l'Elba. Os bispes de Praga (973) y Olmütz (975) dependen d'a diocesi de Maganza.[1]

En l'anyo 983 bi ha una gran sublevación eslava que fa que os alemans haigan de dixar totz os territorios a l'este de l'Elba por muito tiempo. En a rebelión de Havelberg y Brandemburgo de 983 as misions cristianas son exterminatas.[1] O paganismo local esdevenirá una sinyal d'identidat eslava contra os invasors alemans. Manimenos a conversión d'os polacos a lo cristianismo con influencia alemana fará que a la fin os eslavos de l'Elba no puedan resistir a presión alemana.

Os eslavos de Bohemia u checos son sozmesos en l'anyo 1004 por o emperador Henrique II, pero en 1018 por a paz de Bautzen no puet conservar que Lusacia y o territorio d'os milzians en calidat de feudo imperial. En l'anyo 1007 se funda o bispato de Bamberg pa evanchelizar a los eslavos d'o Main.[1]

Dende o sieglo XII os eslavos de l'Elba serán victimas d'a expansión alemana enta l'este u "Ostsiedlung".

Referencias[editar | editar código]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 1,15 1,16 1,17 1,18 1,19 1,20 Hermann Kinder Werner Hilgemann ATLAS HISTORICO MUNDIAL. Desde los orígenes a la Revolución Francesa
  2. Hermann Kinder Werner Hilgemann: Atlas histórico mundial. Desde los orígenes a la Revolución Francesa. Ediciones Itsmo.
  3. Gabriela Makowiecka, Estanislao Macowiecki La Cultura Eslava Editora Nacional
  4. "Libro de los fechos et conquistas del principado de la Morea"
  5. 5,0 5,1 "Libro del Trasoro"

Bibliografía[editar | editar código]