Pueblos berbers

De Biquipedia
Ir ta: navego, busca
Pueblos berbers
Imazighen / ⵉⵎⴰⵣⵉⵖⴻⵏ
Berber flag.svg

Harîrî Schefer - BNF Ar5847 f.51.jpgZinedine Zidane 2008.jpg
Ibn Battuta · Zinedine Zidane
Población total
80 000 000
Rechions con comunidatz importants
Flag of Morocco.svg Marruecos
Flag of Algeria.svg Alcheria
Flag of Tunisia.svg Tunicia
Flag of Mauritania.svg Mauritania
Flag of Mali.svg Mali
Flag of Niger.svg Nícher
Idiomas
Berber
Relichión
Islam, cristianismo
Mapa
Berber-map.png
Mapa de situación actual d'as etnias berbers

Os pueblos berbers son a población nativa d'o norte d'Africa a l'ueste d'o río Nilo, en parte conoixita como Berbería, y que mantienen l'uso d'as luengas d'a familia berber, anteriors en Africa a la presencia d'a luenga arabe que las va sustituindo.

Pueblos berbers actuals son os rifenyos, os xluh, os berbers de l'Atlas meyo, os cabilenyos, os chagüiya, os cherbans, os mozabís, os tuaregs, os nefusas, os siwís, os zenagas y atros de menors.

Modos de vida tradicionals[editar | editar código]

Os modos de vida tradicionals que tienen u han tenito amás gran part d'os berbers dica fa pocas decadas son:

Relichión[editar | editar código]

A relichión orichinal yera politeista como n'atros pueblos de l'aria mediterrania, y como en o Mediterranio esta relichión tenió sincretismos con as relichions de pueblos que los influencioron u invadioron, (fenicios, cartachineses, romans, ecetra..). En o periodo d'influencia fenicia prenió muita importancia o culto a o dios solar Baal Ammon, (L' Ammon Ra d'os echipcios). O zaguer periodo d'arte rupestre saharián, o periodo d'os carros ye obra de berbers pagans que controlaban as rutas comercials saharianas primero con caballos y carros y dimpués con camellos.

Existioron berbers cristianizatos, (Sant Agostín podió estar d'orichen berber). Parte d'os cristians rurals norteafricans yeran en realidat semitas punicos y no berbers. Quan plegoron os arabes musulmans encara existiban muitos pagans. Encara que no se'n charre guaire en as fuents islamicas, os omeyas cordobeses ninviaban achents islamizadors ta o Magreb. L'arte rupestre saharián desapareixió con a islamización, (as zagueras representan siellas arabes por lo que son posteriors a lo S VII). O islam yera iconoclasta y prohibiba a representación d'animals d'este arte pagán. O cristianismo pervivió en Túniz dica o S XIII, pero en poblacions que probablement u ya no yeran berbers u yeran descendients d'a población romanizata (os rumís).

A islamización d'os berbers ye completa y nomás quedan que repuis de l'antiga relichión politeista. Amás gran parte d'os berbers son musulmans. Bi n'ha beluns de relichión chodiga. En o pasato i habió muitos musulmans kharichitas y bells musulmans xiitas pero dende o periodo almorabet predominan os musulmans sunitas. Os nuclios kharichitas son muito localizatos (Cherba, Mzab, y Chabal Nefusa).

Historia[editar | editar código]

Dimpués d'una historia de más de 3000 anyos d'invasions de pueblos con cultura urbana más desembolicata, (echipcios, fenicios, cartachineses, griegos, romans, arabes, potencias occidentals), os berbers actuals son representatos precisament por a chent de zonas de monts y desiertos que se resisten a prener elementos culturals d'atras culturas. Os berbers de zonas planas, bien comunicatas u interesants pa as culturas alochenas se facioron punicos, romans u arabes seguntes a epoca, estando estos zagueros os que más abanzoron en a asimilación d'os berbers. Amás gran parte d'os arabes nordafricans son en realidat berbers arabizatos dende tiempos medievals. Os aborichens canarios que se troboron os conquistadors yeran berbers.

Os berbers en o Edat Meya Musulmana[editar | editar código]

En a primera invasión efectiva d'os arabes musulmans, que trayó a relichión musulmana, 100.000 arabes s'establioron en Ifriquiya, (Norte de Túniz). En os primeros sieglos de dominio arabe musulmán tamién n'i habió en atros puestos. As zonas d'arabización lingüistica yeran o Sahel Tunizín, (Arredol d'a ciudat de Caiurán), o Norte de Costantina, o norte de Termizén, y Fez. Os berbers s'islamizoron por comenencia u intrés politico y formaban a masa d'exercitos on mandaban os arabes. En as montanyas d'o interior y os desiertos a islamización estió más lenta.

Os berbers prenioron a forma kharichita d'o islam pa reivindicar a igualdat con os arabes y facioron bellas revueltas, belunas con exito. Part d'a Edat Meya musulmana d'o Norte d'Africa s'explica por a rivalidat d'a confederación Zanata con a confederación Zenacha, y por l'aparición succesiva de poblacions marguinals que aproveitan una forma d'islam más reivindicativa pa chustificar prener o poder contra o poder d'atros berbers y arabes más ricos y con atra forma d'islam antigament reivindicativa y que se relaxaba, (Almorabetz, Almuhades, Benimarins, etz...).

Os berbers barwata d'o norte de Marruecos formoron un reino islamico basato en a identidat berber y en una herechía derivata de l'islam kharichita entre 744 y 1058.

Os ismailitas consiguioron l'aduya melitar d'a Kutama pa forachitar a os aglabís d'Ifriqiya y fundar o califato fatimita, que primero s'estendillaba por Berbería, y dimpués prenió o control d'Echipto. Os fatimitas deixoron Berbería baixo control d'os Zirís. En o S XI os fatimitas ninvioron dos tribus d'arabes beduins, Banu Hilal y Banu Sulaim, pa castigar a os Zirís, que heban tornato a la ortodoxia sunní malequita y heban acceptato l'autoridat d'os Abbasís de Bagdad. Encara que los vencioron, a presencia d'estos nomadas desfació a sociedat agricola sedentaria d'os berbers de tierra plana y con o tiempo tamién se filtroron ta zonas deserticas desplazando u asimilando a berbers nomadas. Dende esta segunda invasión os berbers quedoron localizatos en os islotz on huei los trobamos.

En a Edat Meya os países costeros d'o Norte d'Africa yeran conoixitos en Europa como Berbería.

Os berbers tamién estioron presents en tota a Edat Meya en Al-Andalus.

Se veiga tamién[editar | editar código]

Vinclos externos[editar | editar código]