Provincias Ilirianas

De Biquipedia
Ir ta: navego, busca
As provincias ilirianas en o contexto d'as entidatz politicas d'Italia en o periodo napolionico

As provincias ilirianas estioron una entidat politica autonoma d'o Primer Imperio Francés que existió entre 1809 y 1816 y yera formata por un conchunto de territorios a lo norte y este d'a Mar Hadriana con población eslava meridional (eslovens y crovates). A suya capital estió Ljubljana. Os franceses imposoron en as provincias ilirianas l'administración y o dreito franceses, y tamién l'uso oficial d'o francés, y construyoron camins, puents, immuebles, a part de fer reformas socials como a emancipación d'os siervos y a redistribución de tierras. Tamién bi habió campanyas de reforestación[1].

A entidat "Provincias Ilirianas" fue creyata en 1809 por o Tractato de Schönbrunn quan o Imperio Austriaco cedió a lo Primer Imperio Francés os territorios d'a Carintia occidental y alta con Lienz en o Tirol oriental, Carniola, o surueste d'o río Sava, Gorizia y Gradisca, y Trieste como resultato d'a derrota en a Batalla de Wagram. Estos territorios a lo norte y este d'a Mar Hadriana fuoron adhibitos con Dalmacia a las Provincias Ilirianas. O territorio de l'anterior Republica de Ragusa, que heba sito anexionato a lo reino napolionico d'Italia en 1808 fue adhibito a las Provincias Ilirianas.

En l'anyo 1813 o Imperio Austriaco reconquirió estos territorios de fueras de Kotor y a suya redolada, que fue ocupada por os montenegrins dende 1813 dica 1814. O Congreso de Viena confirmó a sobinaría austriaca sobre as anteriors provincias ilirianas y, con part d'o suyo territorio, se creyó adintro d'o Imperio Austriaco un "Reino d'Iliria" que no fue formalment aboliu dica 1849.

O periodo d'existencia d'as provincias ilirianas contribuyó a la formación d'o ilirismo y a eslavofilia entre os crovates y eslovens[2].

Referencias[editar | editar código]

  1. (fr) Dennis P.Hupchick, Harold E.Cox: Les Balkans. Atlas historique. Ed Economica, 2008. p 56.
  2. (es) Francesc Bonamusa: Pueblos y naciones en los Balcanes. Siglos XIX y XX. Akal 2010, p 82.