Penyas (costa)

De Biquipedia
Ir ta: navego, busca
Este articlo ye sobre as penyas como forma costera. Pa atros significatos d'as parolas penya u penyas vaiga a penya (desambigación).
As penyas sobre a mar mes altas d'Europa son en Santo André de Teixido (Galicia).

Unas penyas (u puntualment un salto), son unas costas rocosas con una pendient quasi vertical que se forman por a erosión que producen as ondas marinas, fendo que as penyas s'escachen y retaculen, devez que a mar abance y creye una plataforma d'abrasión en l'aria on dinantes plegaban as penyas. Estas penyas se pueden decir tamién "cinglos" si a suya part superior corresponde a una superficie con plans u replans, no necesariament horizontals, pero paralelos a la estratificación.

As ondas d'a mar trencan contra a base d'as penyas producindo una erosión contina. Quan l'augua d'a onda de mar entra en as crepas comprime l'aire que bi ha, y quan l'augua se'n retira l'aire comprimiu s'expande y va esgallando y crebando a roca. L'augua va foradando a roca, va creyando covachas, esplucas dica que a masa rocosa que bi ha dencima d'estas espacios vueitos de roca s'escacha, con torrocatas y eslices. Si a roca d'as penyas ye masiva y compacta este proceso de compresión y expansión de l'aire ye menos efectivo, pero as ondas d'a mar pueden egualment ir esgarrapando a base con os materials erosionaus que transporta l'augua.

Os trozos de roca que cayen a l'augua pueden mover-se por a fuerza d'a mar, se desgastan por l'acción d'as ondas d'a mar y s'esminglanan, quedando redondeyaus, y achiquius. Quan son prou chicotz as corrients de deriva litoral se'n pueden levar estos materials sueltos a las plachas. Entre os libels de marea alta y marea baixa, a lo piet d'as penyas se forma una plana un poquet abocada enta la mar dita plataforma d'abrasión, y por debaixo d'o libel de marea baixa se forma una faixa acumulación.

Denominacions[editar | editar código]

En as parlas altoaragonesas no bi ha una denominación tradicional especifica pa estas formacions litorals porque a on se charran no bi ha costa. Pa escarpes por un regular mes grans que os cinglos y as ripas bi ha denominacions como salto u penya. En textos aragoneses medievals por un regular trobamos a denominación de penyas en pluralia tantum. A vegadas tamién trobamos salto en singular, referindo-se a puntos mes concretos.

En "Historias contra los paganos" d'Orosio, bi ha una mención a las costas d'una part d'a mar Roya como penyas:

Entro a Egipto e al çaguero puerto de Arabia, qui es de la part meridional, luengo e estrecho por las penyas e islas muit altas e fragosas, el cual parece desde el Mar Bermejo (esto es, del Oceano), enta occident

En a "Cronica de los Conquiridors" leyemos tanto penya como salto, encara que salto ye un termin que i apareix pa traducir atros conceptos en atras partz d'o libro:

et de continent corineu todo yrado recobro fuerça et priso goemagot estrenyen fuerment a goemagot et puso se lo en los musclos et corria ayna ala riba dela mar et gito a goemagot que tenia en el cuello. et de aqui puyosen en cabo de una penya muyt alta ala riba dela mar et gitolo dentro en la mar. Et antes que goemagot fuesse caydo en la mar fue espeçado en muchas pieças. por que cayendo feria adiesso en una piedra adiesso en otra. Et la mar fue sangrienta dela sangre de goemagot. asi que aquel lugar entroal present dia es llamado salto de goemagot.

Bibliografía[editar | editar código]