Calsinera

Estratos de piedra calsinera de l'Ordovicense en Tennessee, Estatos Unitos. Los nivels menos resintents son d'atro material, d'orichen clastico.

Formazión de calsineras travertinicas en Pamukkale, Turquía.

Disolución d'una piedra calsinera por efecto de l'augua.

A calsinera ye una roca sedimentaria definita por la presencia mayoritaria de lo mineral calcita. Bi ha calsineras orichinatas por la precipitación quimica y calsinas biochenicas.

Petrochenesi

La mayor part de las piedras calsineras s'han orichinato en plataformas continentals en relación a l'actividat de sers vivos, ye lo caso de las que bi ha en lo Sistema Iberico (antiga plataforma continental de lo Mar de Tethys), y de lo Prepireneu). Bi ha unas calsineras d'orichen continental que s'han puesto formar en lacos (como las calsineras lacustres de la Depresión de l'Ebro), en ambients karsticos (travertins, tovas travertinicas, espeleotemas), y en suelos (mallacans).

Cheomorfolochía

En Aragón, forman lo principal de lo paisache en la mayor part de lo Sistema Iberico oriental, (en as provincias de Valencia, Castellón, Cuenca, Teruel) de las sierras prepirenencas y de las muelas de la Depresión de l'Ebro.

Lo paisache con calsineras puet estar un paisache karstico si predominan os fenomens karsticos, u puet estar un paisache estructural si mos trobamos a las calsineras como nivels resistents con cinglos chunto con atros materials creyando muelas si son d'alto u baixo horizontals u cuestas si bi ha una inclinación menor de 45º.

Utilidatz

Las piedras calsineras tienen muitos emplegos, y lo més tradicional ye sacar calsina calentando-la en fornos ditos calsinars.

Denominacions tradicionals

En aragonés meyeval esta roca se deciba calcina, como actualment encara li se diz a la barracha de calso y arena, y d'a mesma traza que en muitas luengas no bi ha parabras pa esferenziar o cheso cheolochico (un mineral u una roca no formata que por ixe mineral) d'o cheso como material de construcción. Un curioso eixemplo d'a parola calçina lo veyemos en o "Libro de Marco Polo" pa referir-se a las calsineras d'os paisaches karsticos de China:

Et apres troba ho(m)bre la ciudat de Tingui la qual es chica mas es habundada de todas cosas et ala siniestra part deuas leuant ya villas et castiellos assaz et ha tres iornadas desta ciudat es la mar ocçeana et es todo plano car no hi ha sino calçinas et ha Riba dela mar ya vna çiudat que ha nombre singui

Probablement a parabra calsina haiga perdito en aragonés actual o significato petrografico, y s'ha documentato a parabra calsinera en aragonés chistabín pa dicir a roca.

A perduga d'o significato petrografico d'a parabra calcina ha feito que en aragonés bi haiga un amplo ventallo de denominacions tradicionals que fan referencia a aspectos parcials que no son constants en a roca, como a color, y no tienen valura petrografica, como por eixemplo:

• piedra de ruello (ansotán).
• piedra (de) ferranca (semontanés oriental).
• clarisca.

En os Monegros, las calsineras abundan en la part alta de la Sierra d'Alcubierre y tienen un orichen lacustre. Los monegrins en dicen piedra de campanil por estar duras y producir un sonito caracteristico con lo martiello y piedra de clarezca por estar blancas.