Pasato perfecto simple d'indicativo en aragonés
O pasato perfecto simple d'indicativo indica accions que s'han rematato en o pasato y que no son necesariament relacionatas con o estato de feitos d'a situazión present.
A forma que se considera més cheneral en l'Alto Aragón ye:
| Presona | 1ª Conchugación | 2ª Conchugación | 3ª Conchugación |
| 1ª Sing. | Aduyé | Debié | Partié |
| 2ª Sing. | Aduyés | Debiés | Partiés |
| 3ª Sing. | Aduyó | Debó | Partó |
| 1ª Plur. | Aduyemos | Debiemos | Partiemos |
| 2ª Plur. | Aduyez | Debiez | Partiez |
| 3ª Plur. | Aduyoron/Aduyón | Debioron/Debión | Partioron/Partión |
O pasato perfecto simple presenta variants dialectals d'intrés. En aragonés oriental se fa servir o pasato perfecto perifrastico de tipo catalán, que se fa con o infinitivo d'o verbo seguindo a lo present d'o verbo ir como auxiliar (pero con im y itz sustituitos por vam y vatz).
A fins d'o sieglo XX y principios d'o sieglo XXI l'aragonés ye en camín de desapareixer y ye cada vegata més restrinchito a arias on precisament ye o pasato perfecto perifrastico a forma usual. Por ixo bi ha propuesta que se pueda fer servir en aragonés común.
En bellas variedatz d'aragonés y en luengas d'arredol bi ha bells verbos irregulars en o pasato perfecto simple que tienen a silaba acentuata en a radiz en cuenta de tener-la en a desinencia presonal, ye por ixo que se dicen pasatos fuertes. Son pasatos tipo yo fice, ellos túvon d'os verbos fer, tener, haber, trayer, etc...Representan un problema d'interpretación, car en bellas parlas d'as vals axials bien conservatas y arcaizants como o belsetán, no se troban.
