Pan
O pan ye un alimento alazetal en a gastronomía occidental, feito con farina, cheneralment de trigo, emprenyatuera u masa y augua. A vegatas s'adiben d'atros productos ta dar-le determinatas qualidatz.
Tamién se fa con atras farinas (centeno, hordio, panizo, roz, trunfa y soya), pero ta que o pan puye (o sía, aumente de volumen y se faiga esponchoso retenindo os gases produeitos por a emprenyatuera), cal que a masa tienga a elasticidat que le da o gluten, que ye una proteína que se troba en o trigo y tamién en os atros cerials, pero en cantidatz muito más chicotas. Por ixo, os pans d'atros cerials gosan fer-se con una tercera parti u más de farina de trigo. En atro caso, s'obtiene un producto que no puya, como as cocas de panizo que se fan en muitos países americans.
