Pa negre (cinta)

Iste articlo ye sobre una cinta catalana de 2010; t'atros usos, se veiga Pa negre.

Pa negre
Poster d'a cinta
Ficha tecnica
Dirección	Agustí Villaronga
Aduyant de dirección	Pol Rodríguez
Dirección artistica	Ana Alvargonzález
Producción	Isona Passola (executiva) Lluís Ferrando (delegada)
Disenyo de producción	Aleix Castellón
Guión	Agustí Villaronga (adaptación) Emili Teixidor (novela)
Musica	Jose Manuel Pagán
Fotografía	Antonio Riestra
Montache	Raúl Román
Vestuario	Mercè Paloma
Actors	Francesc Colomer Marina Comas Nora Navas Roger Casamajor Lluïsa Castell
Datos y cifras
País(es)	Catalunya
Anyo	2010
Chenero	drama
Duración	108 min
Companyías
Productora	Massa d'Or Produccions Televisió de Catalunya Televisión Española
Presupuesto	4 millons d'euros
Ficha en IMDb
Ficha en FilmAffinity

Pa negre (Pan negro en aragonés) ye una cinta catalana escrita y dirichita por Agustí Villaronga y basata en a novela homonima d'Emili Teixidor. Alazetando-se en un asasinato s'analizan os vinclos d'una familia y o suyo lugar en os anyos 1940. A cinta mezcla o chenero dramatico, o misterio por saber a verdat d'os crímens y un sinyalín de fantasía ligata con os suenios y pantasmas que s'ofreixen como alternativa en os uellos infantils d'o protagonista, qui marca l'anvista de tot o relato.

Estrenata en o Festival de Cine de Sant Sabastián de 2010, a cinta ganó nueu Premios Goya y fue candidata de l'Academia espanyola de cine t'os Premios Oscar de 2011 dimpués d'haber estada pretrigata chunto a La piel que habito, d'Almodóvar, y La voz dormida, de Benito Zambrano. Con ista elección, esdevenió a primera cinta en catalán que va optar a os Oscars.

Argumento

Pa negre parla sobre a postguerra rural en Catalunya con un parlache no politico, sino emocional. En ixas envueltas d'a postguerra, Andreu, un nino d'o bando d'os republicans, troba un día en a selva os cadavres d'un hombre y o suyo fillo. As conseqüencias portan t'a desintegración d'a suya familia, atrapada por mentiras y culpas d'o pasau.

O mallorquín Agustí Villaronga, director d'a cinta, se centra en como a guerra afecta a chent, deixando de costau ideyolochías políticas y con a guerra soque como telón de fundo.

Guión

Ta fer o guión d'a cinta, Agustí Villaronga fació servir -amás d'a novela homonima- bells aspectos replegaus en atras dos novelas de Teixidor, Retrat d'un assassí d'ocells y Sic transit Gloria Swanson, ta enriquir l'argumento y bellas caracteristicas d'os personaches.

Producción

Puestos de rodache

Ista cinta, producita por Isona Passola, fie rodada en Mataró, Cànoves i Samalús, Mura, el Pont de Vilomara i Rocafort (o Parque Natural de Sant Llorenç del Munt i l'Obac), Puig de la Balma, El Figaró, Olot, Manlleu, L'Espunyola, Colònia Vidal (Puig-reig), Santa Fe del Montseny, Tavertet. Ta fer a cinta se tornó a enchegar l'antiga fabrica textil de Can Llanes, en Manlleu.

Reparto

Actor / actriz orichinal	Personache
Francesc Colomer	Andreu
Marina Comas	Núria
Nora Navas	Florència
Roger Casamajor	Ferriol
Lluïsa Castell	Ció
Mercè Arànega	Sra. Manubens
Marina Gatell	Enriqueta
Elisa Crehuet	lola
Laia Marull	Pauleta
Eduard Fernández	mayestro
Sergi López	alcalde

Personaches

O pai d'o nino protagonista ye un republicano que vive as represalias d'as suyas accions politicas. Quereba eslampar d'o destín de pobreza d'o lugar y por ixo encetó estudeos que o van portar a dentrar en contacto con un mundo d'ideyals que mira de transmitir a o suyo fillo. Por aconseguir-le un millor futuro, remata participando en accions delictivas y pactando con os ricos d'o lugar.

Su mai trigó a suya parella refusando a l'alcalde, qui quiere vengar-se y encorre a familia. Treballadera y esfensora d'os suyos, arriba a amagar crimens y mira d'aconseguir a favor d'os poderosos ta salvar a chent que quiere. A suya cunyada gran l'empenta en iste camín.

A suya tía Enriqueta reculle tamién istas paradochas: tien relacions con un guardia civil que son motivo de xorrontadura pero d'atra mán refusa un matrimonio de conveniencia y luita por a suya independencia treballando como modista. A lola veye con pena como totz os suyos fillos paten as coseqüencias d'a redota melitar y fa un poder por protecher a os ninons, os quals embolica con falordias tradicionals plenas de pantasmas.

Os tres primos d'Andreu chugan un papel important en o suyo acucutar en a realidat: Núria por as revelacions constants d'o pasau, por os prebas de fuyida que'n proposa y por recontar un atra vesant familiar d'o pasau y a prima chiqueta porque representa l'odio y os prechudicios d'o pueblo enta os primos "royos".

Totz os personaches tienen un costau fosco: o mayestro ye alcoholico, se siente fracasau y s'entrefila una relación pedofila con a prima; l'alcalde ye corrupto; os ricos mueren a totz os que se meten en o suyo camín; os vecins han participau d'o feito desencadenant d'atros crimens (capar un homosexual y republicano).

O nino remata contachiau d'ista morfuga opresiva y mentirola y marcha por a via comoda, asegurar-se un futuro, decepcionau d'o suyo entorno familiar, con o qual creba mesmo acceptando l'aduya d'os ricos que han causau a muerte de su pai.

Premios

• 2011: XXV Premios Goya:
  • Premio Goya a la Millor cinta.
  • Premio Goya a o Millor Director ta Agustí Villaronga.
  • Premio Goya a la Millor Actriz ta Nora Navas.
  • Premio Goya a la Millor Actriz Segundaria ta Laia Marull.
  • Premio Goya a la Millor Actriz Revelación ta Marina Comas.
  • Premio Goya a o Millor Actor Revelación ta Francesc Colomer.
  • Premio Goya a o Millor Guión Adaptato ta Agustí Villaronga.
  • Premio Goya a la Millor Fotografía t'Antonio Riestra.
  • Premio Goya a la Millor Dirección Artistica t'Ana Alvargonzález.
• 2011: III Premios Gaudí:
  • Millor cinta en luenga catalana.
  • Millor interpretación femenina principal ta Nora Navas.
  • Millor interpretación femenina secundaria ta Marina Comas.
  • Millor interpretación masculina secundaria ta Roger Casamajor.
  • Millor dirección ta Agustí Villaronga.
  • Millor guión ta Agustí Villaronga.
  • Millor fotografía ta Antonio Riestra.
  • Millor musica ta José Manuel Pagán.
  • Millor montache ta Raúl Román.
  • Millor dirección artistica t'Ana Alvargonzález.
  • Millor dirección de producción t'Alex Castellón.
  • Millor soniu ta Dani Fonrodona, Fernando Novillo y Ricard Casals.
  • Millor vestuario ta Mercè Paloma.
  • Millor maquillache y peluquería ta Satur Merino y Alma Casal.
• 2010: Festival Internacional de Cine de Sant Sabastián
  • Concha de Plata a la Millor Actriz ta Nora Navas.

Procheccions

En 2010 l'estrenoron con 75 copias. L'asistencia de publico t'as salas de prochección mientres a primer semana superó a zifra d'os 28.000 espectadors. En soque un mes en cartelera recullió 700.000 euros, seguntes numers de l'Institut Català d'Indústries Culturals (ICIC). Con enchaquia d'as nominacions a os premios Goya, a cinta se tornó a exhibir en chenero de 2011 en 39 salas de tot l'Estau espanyol.

En Francia s'estrenó con 40 copias en versión orichinal subtitolada, con buenas creticas d'a prensa escrita. Tamién se prochectó en China, Chapón, Alemanya y Estatos Unitos.

Vinclos externos

• (ca) (es) (en) Web oficial.
• (en) Pa negre en IMDb.
• (es) Pa negre en Filmaffinity.
• (es) Pa negre en DeCine21.
• (es) Pa negre en LaHiguera.
• (es) Pa negre en Fotogramas.