Orden de Sant Chaime

Orden de Sant Chaime Orden de Santiago
Sant Chaime
Información cheneral
Activa	Sieglo XII - actualidat
País	Castiella
Tipo	Orden relichiosa y melitar
Insignias
Simbolo d'identificación

La Orden de Sant Chaime (conoixita a vegatas como Orden de Sant Yago u Orden de Santiago por estar orichinaria de Castiella) ye una orden melitar meyeval naixita en la Peninsula Iberica en lo contexto de la Reconquiesta. Amanixió en l'anyo 1170 dimpués de la reconquiesta de Cáceres, quan Ferrando II de Leyón fundó la cofrairía de los flaires de Cáceres, confirmata en 1175 por lo Pontifiz.

La suya primera presencia en Aragón ye en 1212, quan lo mayestre Fernando González aduyó a Pero II d'Aragón a prener Mont Albán. Lo rei donó la villa a lo mayestre, que fundó una comanda de la Orden, que esdebenirba la casa matriz de los suyos establimientos en la Corona d'Aragón. Lo convento de la villa de Mont Albán yera chusmeso a lo principio a lo prior d'Uclés, qui yera los receptor de las rendas de los diferents centros santiaguistas.

La Orden teneba dos categorías de miembros, clerigos y laicos, estando la unica milicia relichiosa de la Edat Meya que almeteba chent casata en las suyas filas. Aduyoron a la reconquiesta de lo reino de Valencia. Lo comandador de Mont Albán condució a lo campo de batalla a los caballers de Santiago y tamién a los habitadors de la villa.

A mitat de lo sieglo XIII los dominios de la orden se facioron grans, por donacions u compra, estabilizando-se lo suyo patrimonio a finals d'este sieglo.

Las més importants posesions santiaguistas en lo reino d'Aragón estioron:

• La Comanda de Mont Albán.
• Lo Hespital de Sant Bertolomeu de Zaragoza (clamato dimpués de la Mercé)
• La Casa de la Mercet de Teruel.
• La Comanda de Sant Marcos de Teruel .
• Lo lugar de Villanueva de la Uerva.
• Tamién tenioron propiedatz y biens en Calatayú y Albarrazín.

Monesterio de Uclés, seu d'a Orden de Sant Chaime.

La Orden de Sant Chaime tenió importancia tamién en lo reino de Murcia en o periodo d'ocupación aragonesa (1296-1304). En l'Archivo de la Corona d'Aragón bi ha textos que en charran:

Al noble e amado don Johan Osores, maestro de la Horden de la cavalleria de Sant Jayme et cetera.

Entendiemos que agora avíades çitado a Ferrant Péreç, comendador de la val de Ricot, a capítol e que allí le avíades tuelta la comanda de Ricot e que la queríades dar a otro. E como el dito Ferrant Pérez sia homne bueno e en qui muyto podría homne fiar, e él la su comanda aya tenido bien e lealment assí que danno ni menoscabo no a venido por él al regno nuestro de Murcia, rogamos vos que por amor de nos embiedes al dito Ferrant Pérez por comendador de Ricot assí como la tenía, et si por ventura por cosas que.l fiçiesse contra la Orden lo avíades a mudar de la dita comanda, que consintades que la tenga el dito Ferrant Pérez entro que nos ayades certifficado a qui tenredes por bien de comendarla, que se faga con nuestra voluntat porque nos no end ayamos a aver sospeyta, e gradecer vos lo hemos muyto.

Dada en el sitio del castiello de Lorca, III días por andar del mes de junio et cetera.

Petrus Martini, mandato Guillermi Durffortis.

ARCHIVO DE LA CORONA DE ARAGON, C, reg. 253, fol. 27v.

En aragonés meyeval tamién en deciban Orden de Uclés, por estar o monesterio de Uclés a seu d'a Orden.