Nou Barris

De Biquipedia
Ir ta: navego, busca
A seu d'o districto.

Nou Barris (Nueu Vicos en aragonés) ye un districto municipal de Barcelona (Catalunya) situato en a estrimera norte d'a ciudat, entre la sierra de Collserola y l'avenita d'a Meridiana. Actualment se composa de catorze vicos: Can Peguera, Canyelles, Ciutat Meridiana, Guineueta, Porta, Prosperitat, Roquetes, Torre Baró, Torre Llobeta, Trinitat Nova, Turó de la Peira, Vallbona, Verdum y Vilapicina.

Parque Central de Nou Barris.

Istos vicos, que en a suya mayoría son situatos en lo que historicament yeran os municipios d'Horta y Sant Andreu de Palomar (y más tardi de Barcelona), creixioron a lo largo d'o sieglo XX, en especial entre las decadas d'os cinquanta, sisanta y setanta.

Paseyo Pi i Molist.

En 1998 o districto teneba una superficie de 800,2 hetarias y una población de 168.837 habitants, habendo perdito más de vente mil habitants en poco más de siet anyadas. En as zagueras anyatas, o districto ha tornato a estar una d'as zonas d'acullida d'a cerenya corrient inmigratoria dende lo 2000, debito a lo pre relativament más baixo d'a vivienda en o districto, transformando la composición etnica y o rete de comercios d'os vicos.

Mientres os anyos 1990, a chiración en educación feita en a decata anterior prencipió a tener efecto, y la zifra de población sin estudeyos en o districto cayó d'o 26,7% (1991) a lo 23,1% (1996), aumentando espectacularment o numero de tetulatos en educación segundaria y superior. En quanto a lo conoiximiento d'o catalán, a meyatos d'a decada ya lo entendeba o 92,8% d'a población, y dos tercios lo podeban fablar.

Politicament, o districto vivió una cerenya actividat menata per os ligallos de vecíns mientres tot o franquismo, en respuesta a lo urbanismo espachinato y os desequilibrios d'o desembolico d'os sisanta y setanta. Mientres a democracia, o districto ha estato un granero de votos socialistas, superando por un regular más d'o cinquanta per ciento d'os sufrachios.

O nombre d'o districto se dió en l'anyata 1984 quan o Concello de Barcelona hemologó una nueva división territorial d'a ciudat, emplegando la denominación d'a revista d'o primer ligallo de vecíns d'a zona a prencipios d'as anyadas setanta. Se da lo feito de que una parti impotant de Nou Barris yera dentro de l'antigo Districte 9, chuntament con parti de l'actual Sant Andreu.

Una d'as construccions más antigas d'o districto se corresponde a l'antigo Hespital Mental d'a Santa Creu i Sant Pau, l'actual seu d'o districto. Formó parti d'o prochecto medico d'o Dr. Pi i Molist y o prochecto d'arquitectura hespitalaria de l'arquitecto Josep Oriol Bernadet (1811-1860). A propuesta se presentó en 1859, anque no se construirá dica l'anyada 1888. En 1960 se vendió y xerbigó a metat d'o edificio debito a la especulación urbana, anque lo hespital mental continó operativo dica la decada de 1990. En l'actualidat, o edificio ye en emplego per o Archivo Monecipal d'o Districto de Nou Barris, o Consello Monecipal d'o Districto de Nou Barris y la Biblioteca Popular de Nou Barris, una d'as más grans d'a ciudát.

Esporte[editar | editar código]