Mostín d'o Pireneu

De Biquipedia
Ir ta: navego, busca
Un mostín d'o Pireneu masclo.

O Mostín d'o Pireneu ye una raza de cans de gran mida, naturals d'o Pireneu aragonés. Per la suya gran mida y fortaleza la FCI la encluyó en o grupo 2 y sección 3era d'a claseficación internacional de razas caninas; os molosos (cans de defensa) de montanya.

Tradicionalment os mostins heban acompaniato lo bestiar transuant en Aragón d'entre o Pireneu y a val de l'Ebro, y per qualques rotas, dica ta lo Mayestrato per lo sud. La suya función en a ramata yera de plantar concarada a la defensa d'o bestiar y os pastors contra d'os animals salvaches, como los onsos y os lobos que ta par d'alaveyz i yeran més abundants en a tierra baixa. Per ixe fer se gosaban liebar dos u tres d'estes animals en a ramata, a demés d'os cans d'atura habituals que i yeran més numerosos y chicotz que os mostins.

En o sieglo XX, especialment dimpués d'a Guerra Civil espanyola, se gosoron perder muto los rasgos tradicionals d'estas bestias perque se feba caro mantener-los per a mida tan gran y a fambre d'a post-guerra, y perque ya no caleban como enantes l'heban feito per estar-se dindo de caita las poblacions de salvachinas que podesen atacar lo bestiar. En a segunda metat d'o sieglo, i heban poquetz puestos a on estes animals encara i conserbesen las caracteristicas prencipals en a raza, y en os anyos 70 quan que se fayoron os primers intentos de quitar-la ta debant y revitalizar-la como raza de companya, se'n recuperoron qualques (anque poquetz) exemplars que encara las mantenesen, y se fayoron canir ta repoblar. En 1977 se constituyó lo Club del Mastín del Pirineo de España que enguán encara organiza la selección y cría d'esta raza.

Actualment, lo mostín d'o Pireneu tiene una gran reconoixedura internacional, como gosan demostrar a existenzia de Clubs en numerosos países europeus y en Estatos Unitos.

Ta cumplir con as caracteristicas d'o suyo patrón racial, se considera que os masclos han de sobrepasar os 77 cm d'altaria en o lumo, y as fembras os 71 cm, anque s'aconsella que pasen os 81 e 77 cm respectives l'un y l'altro sexo. Tienen o cuerpo cobierto de pel largo y denso, de color blanca anque con fastras més fuscas en qualques puntos d'o cuerpo.

Vinclos externos[editar | editar código]