Mortalera de Boston

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Grabato propagandistico d'epoca d'a Mortalera de Boston, feito por Paul Revere.

Se conoix con o nombre de Mortalera de Boston (The Boston Massacre en anglés) a bels sucesos escaicitos o 5 de marzo de 1770 en a ciudat de Boston, que alavez feba parte d'a colonia britanica de Massachusetts (hue uno d'os estatos d'Estaus Unius). Os feitos estioron uno mas d'os episodios en a confrontación entre as colonias britanicas en America d'o Norte y a suya potencia colonial, y que rematoron en a Guerra d'Independencia d'os Estaus Unius y en a independencia estausunidense.

A secuencia d'os feitos prencipió o 22 de febrero de 1770, cuan morió un adolescent, Christopher Seider, por disparos britanicos. As manifestacions d'os colons en protesta continoron dica o 5 de marzo, cuan os soldatos de l'Exercito britanico disparoron contra os manifestants en King Street, fendo un total de 5 muertos, feito que fació que os bostonians encara tenesen mas inquina contra os britanicos.

Encara que nomás bi habió 5 muertos, Paul Revere fació uso propagandistico intensivo d'os escaicimientos por meyo de gravatos que charraban d'a mortalera sangrienta de King Street, encara que os gravatos amás no respondeban a la realidat (uno d'os muertos yera de raza negra, y amanix blanco en o gravato, amás que en o gravato apareix nieu en as carreras).

Dimpués d'os feitos, os britanicos facioron un chudicio militar contra o capitán Thomas Preston, qui mandaba a os soldatos (a suya esfensa en o chudicio la fació John Adams, futuro president d'Estaus Unius). Por a sentencia, fuoron forachitatos de l'Exercito britanico. Sindembargo, iste episodio se gravó en a conciencia estausunidense, fendo d'el uno d'os feitos mas conmemoratos d'a Guerra d'Independencia d'os Estaus Unius y celebrando-se como fiesta nacional dica fins d'o sieglo XVIII.