Monesterio de Leire

De Biquipedia
Ir ta: navego, busca
Anvista de l'actual entrada principal d'o monesterio de Leire.

O monesterio de Leire, monesterio de Leyre, monesterio de Sant Salvador de Leire u monesterio de Sant Salvador de Leyre ye un monesterio situato en a sierra de Leire u sierra de Leyre (tamién clamata sierra d'Errando) en l'actual termin municipal de Yesa, en Navarra.

Ye situato en un plano d'ixa sierra, con anvistas a lo entibo de Yesa, sobre o río Aragón, dencima d'o antigo Camín de Sant Chaime Aragonés.

Citato en o sieglo IX, as partis más antigas de l'edificio actualment existent son d'os sieglos X a XII, d'estilo romanico.

O monesterio lo han cedito actualment a los flaires d'a Orden de Sant Benedet, que estioron amás a más os suyos fundadors, antis d'a plegata a lo monesterio d'os flaires de Cistels, que tenioron o monesterio bells sieglos.

Historia[editar | editar código]

Os suyos orichens[editar | editar código]

L'abside principal y dos absidiolos en o monesterio de Leire.

A sierra de Leire ye a mán d'un territorio muit romanizato mientres a ocupación d'istas tierras por o Imperio Román. Asinas, a o piet d'a sierra de Leire, en Liédena, chunto a la Foz de Lumbier en o río Irati, bi ha una important villa romana, bi ha restos arqueolochicos en a Canal de Berdún, Sangüesa y d'atros lugars, a menos de 5 km de distancia d'a seu d'o monesterio de Leire. Dende os sieglos III u IV, ista rechión fue tamién profundament cristianizata.

Ye una zona de rocas calsinosas, con muitas cuevas y una espesa vechetación d'arbustos de tipo mediterranio,[1] carrascas arbustibas sobretot, que dende os primers intes d'o Cristianismo fueron ocupatas por armitans, con a qual cosa a suya agrupación en un monesterio fue natural en os intes posteriors a una invasión como la d'os musulmans en o sieglo VIII.

A primera cita historica d'o monesterio ye de l'anyo 848, con enchaquia d'a vesita a lo reino de Pamplona de Sant Eulochio de Cordoba.[2] Sindembargo, se considera falsa a cita de 842, seguntes la qual o monesterio recibió, en donación d'o rei de Navarra Enneco Ariesta, os lugars de Yesa y Benasa.[1] Luis Javier Fortún diz que a primera cita d'o lugar ye en una carta de Sant Eulochio de Cordoba a lo bispe de Pamplona Guilesindo, o 15 de noviembre de 851.[1]

Sindembargo, ye de suposar que o monesterio yera anterior, como o propio monesterio de Sant Per de Ciresa, ta alcanzar l'esplendor de que charra Sant Eulochio de Cordoba d'iste zaguer, con más d'un centenar de monches y una nutrita biblioteca, difícil d'acumular en no más de trenta anyadas, y como d'atros monesterios d'ista redolada pirenenca, como o de Ciellas. José María Lacarra, en a suya Historia de Navarra, charra d'a influencia sobre a redolada d'os carolinchios, posiblement a traviés d'a calzata romana que trescruzaba la Val d'Echo, dende Biarn por o Puerto Palo ta l'actual Zaragoza. Sindembargo, Fortún apunta que no se puet estender sin más a presunción d'a influencia carolinchia a d'atros monesterios navarro-aragoneses. E ixo por a redota sufrita en 816 y en 824 por os francos en os Pireneus y a presa d'os suyos chefes, Eblo y Aznar.[3] Amás a más, os nombres que cita Sant Eulochio de Cordoba en os suyos escritos son d'orichen visigodo u bien autoctonos navarros, y unicament Chuan ye un nombre que se troba a lo norte y a lo sur d'os Perinés.[4]

Asinas, as influencias carolinchias en o monesterio de Leire no son probatas, sino meras deduccions, testimonios indirectos u difícils de contrimuestrar, como as teorías que charran de l'orichen d'estilo carolinchio d'un premitivo monesterio anterior a lo sieglo X.[4]

A desamortización y l'albandón[editar | editar código]

En 1836, con a desamortización de Mendizábal, s'albandonó o monesterio, dica 1954, quan tornoron os monches benedictins d'o monesterio de Santo Domingo de Silos.[2]

A suya influencia cultural y politica[editar | editar código]

En a Edat Meya[editar | editar código]

O monasterio de Leire estió un foco de difusión d'o navarro-aragonés sustituindo o vasco. Este proceso de romancización talment continaba a latinización que s'heba produeito en a epoca d'os romans. Os lugars arredol d'o monesterio de Leire esdevinioron una d'as arias principals d'o romance navarro. En o monesterio de Leire s'escribiba en latín y en tiempos més tardanos en navarro.

En a Edat Contemporania[editar | editar código]

Huei o monesterio de Leire ye o que identifican como simbolo suyo os navarros cristians de tendencias conservadoras y espanyolistas, en oposición a lo monesterio d'Aralar, que se considera más ligato a los navarros bascoparlants independentistas.

Falordia de Sant Birila[editar | editar código]

Seguntes charra a falordia, Sant Birila yera un abat d'o monesterio que fue a una fuent amanata, hue clamata Fuent de Sant Birila, ta portar augua a lo monesterio. Una vegata en ixe lugar, s'encantó mientres escuitaba o canto d'un ruisenyor, pensando en o misterio cristián d'a eternidat. Dimpués se dió cuenta que yera tarde, y corrió ta o monesterio, antis d'a nueit.

Sindembargo, cuando plegó d'o monesterio, descubrió que no conoixeba a dengún d'os monches, porque heban pasato tres sieglos dende a suya vesita a la fuent. Asinas pudo comprender o misterio d'a eternidat cristiana.

Bibliografía consultata[editar | editar código]

Referencias[editar | editar código]

  1. 1,0 1,1 1,2 (Fortún, 1994:73)
  2. 2,0 2,1 Monesterio de Leire en Romanico Aragonés.com.
  3. (Fortún, 1994:74)
  4. 4,0 4,1 (Fortún, 1994:75)

Vinclos externos[editar | editar código]