Micnasa

De Biquipedia
Ir ta: navego, busca

Os micnasa estioron una confederación tribal berber que viviba en l'este Marruecos y ueste d'Alcheria. Han dato nombre tanto a Meknes (Marruecos), como a Mequinenza (Zaragoza).

Os micnasa son orichinarios de Tripolitania y sud de Tunicia, pero migroron entre l'ueste en tiempos preislamicos.

Dimpués que os exercitos arabes musulmans sozmetesen o Magreb muitos micnasas se convirtioron ta o Islam. En l'anyo 711 bells micnasa yeran en os exercitos musulmans que conquirioron o Reino Visigodo de Toledo. D'ixos micnasas que entroron en a peninsula una branca s'establió en o Baixo Ebro dando nombre a Mequinenza, y atra en Badajoz, fundando en o sieglo XI a dinastía aftasida.

Atra colla micnasa prenió parte en a revuelta de Maysara entre l'anyo 739 y l'anyo 742, fendo-se Kharichista cerrina y establindo un emirato en Sichilmasa, en a marguin norte d'o Sahara. Aliatos d'os omeyas de Cordoba podioron resistir os ataques d'os fatimís. Manimenos cuando o chefe Al-Mutazz s'alió con os fatimís, os micnasas fuoron forachitatos de Sichilmasa por os magrawas, que yeran aliatos d'os omeyas.

Una zaguera colla de micnasas yeran aliatos d'os fatimitas contra os omeyas d'Al-Andalus, derrocoron a os rustamidas de Tahert en l'anyo 912 y atacoron a los salihidas d'o norte de Marruecos en 917. Pero no podeban mantener a suya resistencia contra os magrawa en o norte de Marruecos de pa cutio, y, enfeblitos por a luita, fuoron sozmesos por os almorabetz en o sieglo XI.