Michael Faraday

De Biquipedia

Michael Faraday Un grabato de Michael Faraday, obra de John Cochran seguntes una pintura anterior de Henry Pickersgill. Naxito n'o: 22 de setiembre de 1791 Naxito de: Newington Butts (Surrey, Anglaterra) Muerto n'o: 25 d'agosto de 1867 Muerto en: Hampton Court (Anglaterra, Reino Unito) Ocupazión: Fesico y quimico Casato con: Sarah Barnard (1821-1867)

Michael Faraday, naxito de Newington Butts (Surrey, Anglaterra, güé un bico de Londres) o 22 de setiembre de 1791 y muerto en o palazio de Hampton Court o 25 d'agosto de 1867, estió un fesico y quimico britanico, considerato o fundador d'a eletroquimica.

Por as suyas imbestigazions y treballos rezibió, entre atros premios, a Medalla Copley, a Medalla Rumford y a Medalla d'a Royal Society. Tamién en a suya onor, se clama farad a unidat de capazitanzia d'o Sistema Internazional, y á la cantidat de carga eletrica d'un mol d'eletrons se le diz faraday u constant de Faraday.

Contenius 1 Biografía 2 Treballos y escubrimientos 2.1 Eletrezidat 2.2 Quimica 3 Notas y referenzias 4 Enrastres esternos

[editar] Biografía

Michael Faraday naixió d'una familia pobra, perteneixient á una colla relichiosa, os glasitas, que s'eban saliu d'a Ilesia d'Escozia. Su pai, James Faraday, eba estau o ferrero d'o lugar d'Outhgill, en o Westmorland d'an que emigró enta par de 1790. O choben Michael, que teneba atros tres chermans, no tiene so que una educazión primaria, y a más gran parte d'as conoixenzias que alquirió son fruito d'o suyo autoaprendizache ^[1]. Dende a edat de 14 años, ye aprendiz con George Riebau, un librero-encuadernador y amuestra gran talento manual y curiosidat: « d'aprendiz, m'encantaba de leyer os libros zientificos que cayeban en as mías mans ». D'entre els, se puet fer menzión d'o libro d'Isaac Watts L'amélioration de l'esprit (L'amillorazión d'o esprito), d'an que quitará os « seis prenzipios de Faraday » y os libros de dibulgazión zientifica de Jane Marcet, como Conversations sur la chimie (Combersas sobre a quimica).

Bel día, uno d'os clients d'a librería, li ufrió un puesto t'asistir á conferenzias de quimica feitas por o quimico Humphrey Davy, miembro d'a Royal Institution y d'a Royal Society. Asinas, con 20 años, Faraday dentra por primer begada en a Royal Society de Londres ta asistir-ie á las charradas de Davy. A Royal Society yera un d'os puestos más altos d'a zienzia britanica y Humphrey Davy s'eba embrecau en dar-le o prestichio que amenistaba. Faraday quedó impresionau y faszinau por os treballos de Davy, y l'escribió, adchuntando á la carta as notas qu'eba presas d'entre as conferenzias. Sir Humphrey Davis, dimpués d'un aczident de laboratorio, perdió un güello y dos didos, y clama, en 1812, á o choben Faraday ta que li serbise de secretario.

O 2 de chunio de 1821, Michael Faraday s'acomoda con Sarah Barnard (1800-1879), á qui conoix en a ilesia glasita, pero d'iste matrimonio no tien garra fillo.

Ye esleyiu miembro d'a Royal Society en 1824, y nombrau diretor d'o laboratorio d'ista instituzión en 1825. En chunio de 1832, a Universidat d'Oxford li nombra Dotor honoris causa en dreito zebil. Encara que azeutó iste títol d'onor unibersitario, Faraday refusó o títolo de caballero y refusará por dos begadas estar o President d'a Royal Society. En 1833, le fan o primer titular d'a catedra fulleriana de quimica (Fullerian professorship) en a Royal Institution, sin garra obligazión dozent.

En 1848, por propuesta d'o prenzipe-consort, Alberto de Saxonia-Coburgo-Gotha, se li atorga á Michael Faraday una casa en Hampton Court, sin garra coste. Á ista casa, conoixida como a d'o Maitre-Maçon, se la conoix dimpués como Faraday House, y se troba en o numero 37 de Hampton Court Road. En 1858, Faraday se chubila y bibe en a casa definitibament^[2]. Ye allí an que muere, o 25 d'agosto de 1867. Modesto como yera, eba refusau d'estar enterrecau en l'Abadía de Westminster (an que manimenos, a suya memoria ye remerada por una placa, no guaire luen d'a sepoltura d'Isaac Newton) y a suya fuesa se troba en o fosal de Highgate en Londres.

[editar] Treballos y escubrimientos

[editar] Eletrezidat

Os suyos treballos más importants son os relatibos á la eletrezidat. En 1821, dimpués que o quimico danés Ørsted escubrise o fenomeno d'o eletromagnetismo, Faraday construyó dos aparellos ta produzir o qu'el mesmo clamó una rotazión eletromagnetica: o mobimiento zercular contino d'una fuerza magnetica arredol d'un filo. Ye dezir, a muestra d'un motor eletrico.

Diez años más tarde, en 1831, enzetó una larga serie d'esperimentos mientras os cuals escubrió a induzión eletromagnetica. Ixos esperimentos forman a base d'a tecnolochía eletromagnetica moderna.

En o suyo treballo sobre a corrient contina, Faraday contrimostró que a carga se sitúa nomás en o esterior d'o conductor cargau y que ista no tien garra efeuto sobre o que pueda aber-ie en o interior. Iste efeuto de blindache ye conoixiu por o suyo emplego en a gabia de Faraday.

Estió tamién un d'os prenzipals fundadors d'a eletroquimica como desziplina zientifica. En 1833, introduz os termins d'anodo, cathodo, d'anión, de catión y d'ions (encara que sin conoixer a nozión de corrient eletrica escubierta más entadabent por André Marie Ampère).

Da o suyo nombre á o farad, una unidat de capazidat eletrica, y tamién á o Faraday (unidat), unidat de carga eletrica y a constant de Faraday, que fan referenzia á la carga d'un mol d'electrons. O suyo retrato sale en os billez de 20 libras anglesas. Tamién da nombre á la inestabilidat de Faraday, ebidenziada en 1831.

[editar] Quimica

Os primers treballos quimicos de Faraday los fa como aduyant de Humphry Davy. Faraday estudió o cloro y escubrió dos nuebos cloruros de carbonio. Fazió esperimentos sobre a efusión d'os gases, un fenomeno identificau por John Dalton y que a suya importanzia la sacata t'a luz Thomas Graham y Joseph Loschmidt. Aconsiguió a licuefazión de bels gases naturals, como o cloro. Analisó diferents aliazions d'azero y obtenió nuebos tipos de bidres d'uso optico. Uno d'els esdebenirá muit important ta la zienzia ya que grazias á él Faraday identificó a rotazión d'o plano de polarizazión d'a luz cuan o bidre se ficaba adintro d'un campo magnetico. S'adedicó tamién á dibulgar d'os metodos d'analís en quimica.

Se li deben os primers exemplars, encara que frustraus, d'o que dimpués esdebenirá o cremador Bunsen, un cremador unibersalment emplegau en laboratorios ^[3],^[4].

Faraday escubrió entre atras sustanzias quimicas, o benzén^[5] e imbentó o sistema d'o numero d'oxidazión. En 1820, Faraday aconsiguió sintetizar por primer begadas composaus d'o carbonio y d'o cloro, C₂Cl₆ y C₂Cl₄, resultaus que publica á l'atro año.^[6],^[7][8] Faraday definió a composizión d'o clatrato de cloro que l'eba escubierto Humphry Davy en 1810.^[9],^[10].

Faraday ye o primero en menzionar a esistenzia de o que se conoizerá como nanoparticlas metalicas. En 1847, oserba que as propiedaz opticas d'o coloide d'oro son diferents d'as d'o metal puro, obserbazión que se podría considerar como a naixenzia d'as nanozienzias.^[11]

[editar] Notas y referenzias

1. ↑ "Michael Faraday", History of Science and Technology. Houghton Mifflin Company, 2004. Answers.com 4 June 2007
2. ↑ Faraday House.
3. ↑ William B. Jensen. The Origin of the Bunsen Burner. Journal of Chemical Education. 82(4). pp. 2005. [1].
4. ↑ Michael Faraday, Chemical Manipulation, Being Instructions to Students in Chemistry, 1827, page 127.
5. ↑ (fr) O benzén, de Faraday á Thiele
6. ↑ (en) Michael Faraday. On two new Compounds of Chlorine and Carbon, and on a new Compound of Iodine, Carbon, and Hydrogen. Philosophical Transactions. pp. 47. 1821.
7. ↑ (en) Michael Faraday. Experimental Researches in Chemistry and Physics, pp. 33-53. Eds: Richard Taylor and William Francis. Londres, 1859.
8. ↑ (en)L. Pearce Williams. Michael Faraday: A Biography. pp. 122-123. Basic Books, New York, 1965.
9. ↑ (en) Michael Faraday. On Hydrate of Chlorine. Quartly Journal of Science. 15. p. 71. 1823.
10. ↑ Michael Faraday. Experimental Researches in Chemistry and Physics. pp. 81-84. Ed. Richard Taylor and William Francis, Londres, 1859.
11. ↑ The Birth of Nanotechnology. Nanogallery.info. Faraday miró d'esplicar qué cosa yera a causa d'a colororazión tan biba en as suyas mesclas d'oro dezindo que os fenomenos conoixius pareixeban endicar que una simpla bariazión en a grandaria d'as particlas d'oro podeban causar a bariedat de colors resultants.

[editar] Enrastres esternos

• Se beigan as imachens de Commons sobre Michael Faraday.

Predezesor: George Biddell Airy	Medalla Copley 1832	Suzesor: Siméon Denis Poisson
Predezesor: John Frederic Daniell	Medalla Copley (con Carl Friedrich Gauss) 1838	Suzesor: Robert Brown
Predezesor: William Henry Fox Talbot (1842)	Medalla Rumford 1846	Suzesor: Henri Victor Regnault (1848)
Predezesor: Thomas Snow Beck y George Biddell Airy	Medalla d'a Royal Society 1846 (con Richard Owen)	Suzesor: William Robert Grove y George Fownes
Predezesor: Charles Lyell y John William Lubbock	Medalla d'a Royal Society 1835 (con William Rowan Hamilton)	Suzesor: George Newport y John Herschel