Metropolitán (hierarquía cristiana)

De Biquipedia
Ir ta: navego, busca

Bispe metropolitán u Arcebispe metropolitán (abreviato como metropolitán) ye o bispe d'una metropoli, ye dicir, a capital d'una antiga provincia romana, una provincia eclesiastica u una capital rechional.

O Metropolitán en as ilesias de rito román[editar | editar código]

Zygmunt Kamiński, un Arcebispe metropolitán levando palio

En a Ilesia catolica no bi ha guaire diferencia entre un metropolitán y un arcebispe común, manimenos a un arcebispe que no siga metropolitán li dicen Arzebispe ad personam, O metropolitán tien autoridat sobre atros bispes en atras provincias eclesiasticas ditas seus sufraganias, os quals se dicen bispes sufragants.

En os tiempos quan Uesca yera baixo dominación musulmana o territorio de l'Alto Aragón occidental y Navarra dependeban d'o metropolitán d'Aush.

O Metropolitán en as ilesias de rito griego[editar | editar código]

En a ilesia ortodoxa u "pravoslaviana" a fegura d'o metropolitán ye diferent, y tamién bi ha diferencias entre as ilesias autocefalas d'os países eslavos y las atras ilesias de rito griego. Manimenos en dengún d'estos casos os metropolitans tienen una autoridat especial sobre os bispes rechents en lurs propias provincias.

As ilesias no eslavas posan a los metropolitans dichós d'os arcebispes, y os primatos d'as ilesias locals dichós o ran patriarcal se dicen por un regular arcebispes. En o "Libro d'os Emperadors" fan mención de metropolitans:

enuiaron a ellos por enbaixador el metropolitan de Nicomedia
encara lo ha feito metropolitán en un castiello que se clama Eucaíta.
fue feyto metropolitano de Saloniqui. Et aprés la muert del emperador Teofilo...
E aquel ora el metropolitán de Cesaria tomó aquel escripto por mostrarlo al emperador,..

En as ilesias eslavas os metropolitans se clasifican por d'encima d'os arcebispes, y o títol se puet fer servir tanto pa seus d'o primato como pa qualsiquier ciudat important.

Macario II, metropolitán de Moscú

En o Imperio Austriaco o metropolitán serbio de Karlovci teneba autoridat sobre totz os cristians ortodoxos d'o territorio baixo poder d'Austria: serbios, rumans, ecetra... En mayo de 1848 o metropolitán de Karlovci fació aplegar un parlamento serbio sabor que decidió a creyación d'una Voivodina que incluiba Sirmia, Batchka y Banato y puyó a lo metropolitán a lo ran de patriarca.

En as ilesias vlacas hi ha habito metropolitán en Vicina, Argeş, Suceava, en Alba Iulia, Sibiu y Bucarest

En Muntenia o primer metropolitán reconoixito por o patriarcato de Costantinoble fue nombrato en tiempos d'o mandato de Nicolae Alexandru (1352-1364). En Moldavia o primer metropolitán fue nombrato en tiempos de Petru Musat (1375-1391) y fue reconoixito por o patriarcato de Costantinoble en tiempos d'Alexandru ce Bun (1400-1432).

O nombramiento d'un metropolitán con seu en Sibiu en 1868 significó l'autonomía relichiosa d'os rumans d'o territorio Austro-Hongaro en relación con as autoridatz relichiosas ortodoxas d'os serbios d'o Imperio Austro-Hongaro.

En Vlaquia y Moldavia a ilesia ortodoxa rumana esdevién una ilesia autocefala en 1885 con a seu metropolitana en Bucarest.

Os metropolitans en a formación d'as ilesias greco-catolicas[editar | editar código]

En territorio polaco-lituán se fa en 1596 una asambleya de clero ortodoxo y de fidels proclama a unión con a ilesia catolica. D'os ueito bispes se n'oposan dos, pero no son tenitos en cuenta por o metropolitán de Kiev. Amaneix una ilesia uniata que reconoix l'autoridat d'o Papa pero mantién o rito bizantín, dito tamién griego.

En 1620 o patriarca de Costantinoble consagra un metropolitán en Kiev y tamién bispes d'a ilesia ortodoxa orichinal. O rei de Polonia se vei obligato a reconoixer-los en 1632, d'una traza que bi ha dos hierarquías paralelas, a ortodoxa y a "uniata". O nuevo metropolitán Per Mohila encomienza una nueva contrarreforma

Quan o metropolitán d'Alba Iulia reconoixió l'autoridat d'o Papa de Roma y en 1698 amaneixió a Ilesia d'Alba Iulia, greco-catolica, propia de part d'os vlacos transilvans.

Bibliografía[editar | editar código]