María Agustín
| María Agustín | |
|---|---|
 |
|
| Información personal | |
| Calendata de naixencia: | 13 d'abril de 1784 |
| Puesto de naixencia: |  Zaragoza |
| Calendata de muerte: | 22 de noviembre de 1831 |
| Puesto de muerte: | Zaragoza |
| Ocupación: | heroína |
María Agustín (Zaragoza, 13 d'abril de 1784 - Zaragoza, 22 de noviembre de 1831) filla d'Antonio, naixito de Badenas y Catalina, naixita de Rueda de Xalón, estió una vecina d'o vico zaragozano de Sant Pavlo y una d'as heroicas esfensoras d'a ciudat en os Setios de Zaragoza, escayecitos mientres a Guerra d'o Francés.
Debito a la economía familiar, María ha de treballar dende nina servindo en una casa d'o vico. Ye astí a on conoixe a o suyo futuro marito, Pedro Roncal, con qui se casará o 12 de mayo de 1805 en a parroquia de Sant Chil. Ye en a nueva casa d'o matrimonio en a carrera Serón a on les pilla o prencipio d'a guerra.
Mientres a guerra María aduyará en a lochistica, soministrando a os soldatos aragoneses augua, alimentos y munición. Un día fue ferita en o cuello quan yera aduyando en o frent, amán d'a Puerta d'o Carmen (en l'actual Paseyo de María Agustín), manimenos encara que sangraba y le feba mal a ferita contino treballando.
Dimpués de rematar a guerra, en l'anyo 1815, o cheneral Palafox reconoixió a faina feita en a guerra por María Agustín y le dió un chornal de dos reyals diarios, ya que a ferita en o cuello l'heba dixato o brazo cucho invalido y por tanto ya no podió treballar más, y o Escudo de Distinción por o Primer Setio de Zaragoza.
En 1819 morió Pedro Roncal que yera malauto y seis anyos dimpués María se casa con Antonio Guisan, tresladando-se os dos ta a Torre de Postas en Alagón. María moriba un 22 de noviembre de 1831 con 48 anyatas, estando apedecata en o fosal de Sant Pablo.
