Mallo (cheomorfolochía)

De Biquipedia
(Reendrezato dende Mallo)
Ir ta: navego, busca
Anvista aeria d'os mallos de Riglos

Os mallos son una forma de modelato cheolochico que se desembolica en almendróns y piedras d'arena quan a erosión aproveita dos familias de diaclasas u fracturas verticals de diferent dirección. Con o tiempo a erosión que se produce n'estas diaclasas aisla pinaclos u torres de roca ditos mallos.

Os mallos son releus abruptos entallatos en masas d'almendrón d'as marguins d'una cuenca, por eixemplo cuencas terciarias como a Depresión de l'Ebro, que tienen una forma de “puro” con cumbre cupular y laderas verticals u en extraplomo. Amaneixen formando conchuntos, roldes bella cosa aislatos en tot en o frent pirenenco: Agüero, Riglos, Salto de Roldán, Alquezra, d'as Sierras exteriors y en bells puntos d'o semontano iberico "Los Fayos", "Tormos d'o Matarranya", ligatos siempre a puntos on as arterias fluvials penetran en a Depresión de l'Ebro.

O modelato d'os mallos se desembolica sobre almendrons sinorochenicos constuitos por ruellos heterometricos y poco redolatos, diachenizatos por un cemento calsinoso-archilenco de color royenca. En orichen estos almendron fuoron os depositos d'a radiz d'amplos y espesos ventallos aluvials d'edat oligocena-miocena, que a erosión posterior fació que destacasen por a denudación d'as series litolochicas més tovas y erosionables de l'arco externo.

A inestabilidat tectonica sinsedimentaria se tradució en una serie de fracturas en rella, que esdevinioron linias de febleza litolochica y individualizan a masa d'almendrón en prismas que, reelaboratos por a erosión darán primero formas cupulars y dimpués por encaixamiento d'o rete fluvial y desbastatura d'as ariestas, serán punto d'orichen d'as tipicas formas cilindricas u puros.

Atras discontinuidatz menors como os plans de sedimentación, subhorizontals en os tramos superiors, troban reflexo morfolochico en as fendiduras y extraplomos que dan a forma final d'os mallos.

Os mallos son as enrunas d'os antigos conos de dechección, que tienen una morfolochía prou diferent a la orichinal. A tectonica y procesos erosivos, en interacción, han labrato un paisache prou especial.

Etimolochía y toponimia[editar | editar código]

Mallos d'Agüero

A palabra aragonesa mallo (malh en gascón, mall en catalán y mallo en vasco), tot y que suene igual que a palabra pa dicir a lo martiello gran, ye d'atro orichen car puet venir de l'indoeuropeu antigo *molh (en albanés montanya se diz mal y tuca majë). Os toponimos d'influencia ligur Mons Blustiemelus, Ventamiglia y Leucumellus, pueden mostrar que en celtoligur i habió una palabra tipo *melo relacionata con roca u penya. Os cheomorfologos espanyols emplegan a palabra mallo en lur terminolochía.

En Aragón a palabra mallo apareixe en muitos toponimos (Mallos de Riglos, Mallos d'Aguero, San Esteban del Mall), mesmo en Teruel ("Castiello de Mallo" en Mosqueruela). Os mallos de Riglos son consideratos como uno d'os paisaches más emblematicos d'Aragón. En o semontano de Moncayo bi ha presencia de mallos a man de Los Fayos. En o Matarranya destacan os mallos conoixitos como Les Roques del Masmut (en Penyarroya de Tastavins) y atros mallos d'o termin de Bezeit en o parache de La Pesquera.

En Catalunya destacan os mallos de Montserrat, de Sant Llorenç del Munt y las Les Roques d'En Benet. En A Riocha bi ha mallos en a compleganza d'o río Iregua a lo piet d'a Sierra de la Demanda.[1].

En Navarra destaca os Malloak de Aralar,[2] ditos popularment Malloak u las Malloas,[3] son a part d'a Sierra d'Aralar enfilata enta l'Val d'Araitz y Betelu en forma d'una imponent parete u cinglo, entre a muga de Navarra y Guipuzcua. A més gran part d'os Malloak d'ixe puesto se troban territorio de Navarra y només que uns pocos son en Guipuzcua.[4] Dende o mirador d'o brendador de l'Autovía de Leitzaran entre Leitza y Lekunberri se puet esnavesar una buena anviesta d'os Malloak. Os Malloak d'Aralar son formatos por os siguients monts que son visibles dende a Val d'Araitz: Balerdi (1165 m), Egurbide (1317 m), Urkute (1328 m), Aldaon (1411 m), Intzako dorrea (1431 m), Ttutturre (1262 m), Kurutzeaga (1308 m) y Aitzear (1286 m).

As Malloak d'Aralar (Os Mallos d'Aralar), entre Navarra y Guipuzcua, os nombres d'os diferents picos y cerros y os lugars que bi ha a lo suyo piet.

Referencias[editar | editar código]

  1. Francisco Pellicer Corellano, Maria Teresa Echeverría Arnedo Formas de relieve del centro de la depresión del Ebro pp27. Institución Fernando el Católico, 1989
  2. Os Mallos d'Aralar (es)
  3. «Las Malloas de Aralar» cuentan su propia historia. Gara.net (es)
  4. Aralarko Malloak (eu) Malloak/Las Malloas: En vasco no bi ha un chenero definito, quan a chent d'a redolata parla castellán lo castellaniza como las Malloas con chenero femenín.

Bibliografía[editar | editar código]