Malautía d'Alzheimer

De Biquipedia
Ir ta: navego, busca
Articlo d'os 1000
Icono d'aviso medico
Advertencia: Biquipedia no ye un consultorio medico.
Si creye que aprecisa d'aduya, por favor consulte con un profesional d'a salut.

A malautía d'Alzheimer u demencia senil d'Alzheimer ye una malautía neurodechenerativa que comporta una perduga progresiva de funcions mentals, debito a lo deterioro d'o teixito cerebral. As suyas causas exactas (etiolochía) encara son desconoixitas, pero se creye que i pueden contrebuir factors ambientals y cheneticos (por eixemplo, s'ha trobato que bi ha mutacions en quatre chens que pueden predisposar a tener l'Alzheimer).

Os suyos sintomas fuoron descritos por primera vegata por o neurologo alemán Alois Alzheimer, de qui en prenió lo nombre. Dica os anyos 60, se creyeba que yera una malautía poco común. Más entabán, se veyó que buena parti d'o que se creyeba normal en o proceso de l'aviellamiento yera, de feito, consequencia d'ista malautía. O factor de riesgo más important d'ista malautía ye, chusto, a edat.

Dende allora, os abances han estato muit importants, encara que hue día os tratamientos farmacolochicos disponibles (inhibidors d'a colinesterasa y memantina) consiguen beneficios clinicos limitatos.

Se sape que existe un periodo, o deterioramiento cognitivo leve (en anglés, mild cognitive impairment), que se puet considerar como a fase inicial d'a malautía d'Alzheimer. Cada anyo, o 10-20% de pacients con deterioramiento cognitivo leve evolucionan a la malautía d'Alzheimer. Ye fundamental a detección precoz, en o prencipio d'a malautía, ta poder emplegar os recursos medicos y sociosanitarios que sían menester, ya que l'atención d'os pacients con a malautía muit evolucionata suposa una important carga ta os familiars y ta la sociedat.

O suyo diagnostico se realiza a partir d'uns criterios consensuatos (os más conoixitos son os d'o DSM-IV (sieglas en anglés d'a 4ª edición d'o Manual Diagnostico y Estatistico d'os Trastornos Mentals).