Macedonians

De Biquipedia
Ir ta: navego, busca
Este articlo ye sobre l'actual pueblo eslavo de Macedonia. Ta l'antigo pueblo paleobalcanico veiga macedons.
Macedonians
Rechions con comunidatz importants
Republica de Macedonia 1.297.981[1]
Australia 83.978[2]
Italia 78.090[3]
Idiomas
macedonián
Pueblos relacionatos
Pueblos eslavos

Os macedonians son os habitants eslavos nativos de l'antiga republica yugoslava de Macedonia, estando mayoritarios en esta zaguera Macedonia y formando minorías en Bulgaria, Grecia y Albania. Parlan o macedonián, una luenga eslava meridional d'a mesma branca que o bulgaro, (de feito as dos luengas pueden considerar-sen codialectos), y son mayoritariament cristians ortodoxos.

O territorio y/u a identidat d'os eslavos macedonians ha estato historicament disputata por os griegos, bulgaros, serbios, albaneses y o Imperio Otomán (encara bi ha presencia de turcos rumelís).

O cierto ye que os eslavos macedonians yeran vistos por os bizantins como un pueblo eslavo invasor més a qui caleba asimilar, y en parte facioron. Estioron eslavos cristians d'a zona de Salonica qui contribuyoron a cristianizar a los actuals eslavos ortodoxos con una liturchia en un idioma eslavo muito a man d'o proto-eslavo y dito eslavo eclesiastico. A mayor parte d'o territorio eslavo de Macedonia pasó a fer parte d'o primer Imperio Bulgaro. Ohrid yera un centro relichioso ortodoxo y plegó a estar a capital d'os bulgaros. A Bulgaria occidental d'Ohrid estió a zaguera parte d'este imperio en ser conquiesta por o Imperio Bizantín. Macedonia dixó d'estar baixo a orbita bulgara con a expansión d'o reino serbio de Dušan, que ocupó tierras eslavas no serbias, vlacas y griegas y plegó dica os ducatos d'Atenas y Neopatria, pa dimpués cayer en mans d'os turcos otomans. A fins d'o sieglo XIX y en o sieglo XX o territorio macedonio yera disputato por griegos, bulgaros y serbios y a identidat d'os eslavos macedonians yera obchecto de baralla entre o nacionalismo serbio y bulgaro, cosa que fue "solucionata" en 1946 en a Yugoslavia plural de Tito: os macedonians son consideratos como una nación diferent y Macedonia una republica, en contra d'os intreses d'o nacionalismo serbio.

Historia[editar | editar código]

A población de Macedonia en o periodo román y en os anyos escuros[editar | editar código]

Imachen:Macodnian Sklavinia.png
Territorio tribal eslavo de Macedonia, dito Sclavinia por os bizantins, enta l'anyo 700

O territorio de Macedonia prene nombre d'os macedons, antigo pueblo indoeuropeu que ocupaba una chicota part de l'actual Macedonia Griega on creyoron o Reino de Macedonia, que baixo a presona d'Aleixandre lo Gran podió creyar un gran imperio que abracaba a gran parte d'o territorio griego y Orient Meyo. Se discute si os macedons yeran indoeuropeus d'a branca griega u d'una branca paleobalcanica, en tot caso os griegos no los consideraban como tals, pero se helenizoron, proceso que continó en o periodo román, a l'igual que con os pueblos ilirios y cheto-dacos que viviban més a lo interior (l'actual Republica de Macedonia correspondeba en part a Dardania).

En o periodo d'as segundas invasions barbaras, Macedonia, como a mayor parte d'a Grecia continental, fue invadita por os eslavos, que se facioron con o poder. Por manca de fuents no se conoix como yera a coexistencia d'os eslavos y os habitants griegos y vlacos autoctonos, pero si que ye claro que i habió un proceso d'eslavización a lo que escaporon os vlacos transuants d'os monts, que tamién tenioron un proceso migratorio ixemenando-sen por os totz os Balcans.

A reconquiesta bizantina de Macedonia y o primer Imperio Bulgaro[editar | editar código]

Os bizantins facioron campanyas contra os eslavos, reconquerindo muitos territorios. Deportoron muitos eslavos t'Asia Menor. O dominio d'a Macedonia interior yera dificil porque en esta rechión heban de luitar contra a expansión d'o primer Imperio Bulgaro. En o "Libro de los Emperadors" parlan d'un senyor d'Esclavonia a qui quereban demandar aduya os ateniens en os zaguers anyos d'a emperadriz Irene, y ye tentador pensar que se referise a un territorio habitato por eslavos macedonians en l'actual Grecia:

Cuando la emperadriç Ereni romanió monarca, el ermano de su marido e algunos qui eran en presión fuyeron e entraron en la iglesia mayor. Mas uno de casa del emperador que.l dizían Areçio, el cual havía grant privadança en el palacio, tanto favló con ellos fictamientre que los fizo sallir de la esglesia prometiéndoles que no havrían ningún mal. Los cuales, como fueron sallidos, la emperadriç los ha jutgados ir en Atenas. E seyendo en Athenas algunos nobles pregaron al senyor de Esclavonia que prestás con favor e ayuda a un ermano del marido de la emperadriç por entrar a Contastinoble e por haver la senyoría. Mas sintió aquesto la emperadriç e fizo clavar los ojos a todos aquellos.

O emperador Niceforo I forachitó a muitos eslavos d'o Peloponiso occidental y i reasentó griegos exellatos d'esta rechión.

Quan o primer Imperio Bulgaro entró en decadencia, a suya parte oriental, que incluiba Macedonia, yera o suyo centro de poder. Samuel I creyó un estato centrato en Ohrid.

O emperador bizantín Basilio II encomenzó una guerra d'ocupación contra Bulgaria y li posoron d'embotata Bulgaroctonos, (matador de bulgaros). En 1014 lis inflichió una derrota decisiva y ninvió a lo rei Samuel 14.000 presioners bulgaros con uellos buedatos guiatos por un tuerto. Quatre anyatas més tarde o zaguer rei de Bulgaria morió en batalla.

Os macedonians entre bizantins, bulgaros y serbios[editar | editar código]

I habió un periodo de dominación bizantina.

En o sieglo XII, con o estato bulgaro reconstruito, o territorio de Macedonia yera disputato entre os bulgaros y os serbios, pueblo con un estato en expansión y que enantes yera restrinchito a una zona montanyosa més a l'ueste y en una chicota porción d'a costa hadriana (actuals Herzegovina oriental, Montenegro, Sanchac y Kosovo). En 1346 o rei de Serbia Esteban Dušán se fa coronar en Skopje emperador d'os serbios y griegos. A extensión d'a Serbia de Dušan plegaba dica a Mar Echea y heba conquiesto a los mesmos almogavars territorios d'o Ducato de Neopatria. En a "Cronica de Morea" parlan d' esclavons:

El qual, recebida la senyoria, non quiso reposar, mas quiso recobrar toda la tierra de la Morea & ferla vna senyoria, porque el castiello de Napol & la ciudat de Maluasia & toda la montanya de Laconia & toda la montanya de los Esclauones se tenian por los Grieguos, & algunas vegadas fazian grant danyo a los Francos

.

Despues el princep se partió con su gent & vino a las montanyas de los Esclauones & subiogolos a su senyoría, & por mellor senyorearlos fizo fer dos castiellos, vno a la marina a la part de enta Coron, qui se clama Mayna, & por la part de la tierra, sobre Lacedemonia, fizo fer el castiello de Mizitra

O dominio otomán[editar | editar código]

Os otomans prenen Macedonia en a decada de 1380, y mantendrán o control d'esta rechión dica 1912. Muitos turcos s'establixen en Macedonia, y tamién bells eslavos macedonians s'islamizan (en o mesmo proceso que os pomacos de Bulgaria). Os eslavos musulmans que prenen a luenga turca esdebienen turcos rumelís. Bi ha movimientos de población, producindo-se emigracions y inmigracions que afectan a vlacos, albaneses y griegos.

Entre o nacionalismo bulgaro y o nacionalismo serbio[editar | editar código]

En 1870 os bulgaros consiguen que s'instituya dentro d'a Ilesia Ortodoxa una eparquía bulgara con seu en Veles, que incluye a mayor parte d'a Republica de Macedonia actual. En a guerra ruso-turca de 1877-1878 por o tractato de Sant Stefano o soldán acepta a creyación d'una gran Bulgaria que incluye a Macedonia, pero a presión britanica fa que en o Congreso de Berlín en 1878 a extensión de Bulgaria siga més redueita y que Macedonia no siga incluita en o territorio de Bulgaria. Alavez se produce una gran achitación social. Os komitadjis reclaman l'autonomía y se creya a ORIM (Organización Revolucionaria Interior Macedoniana). Os bulgaros dende 1893 refirman a la ORIM. Bi ha disturbios y atentatos. A insurrección de Sant Elías o 2 d'agosto de 1903 dura tres meses. O Exercito turco crema 200 lugars d'a redolata de Monastir y permite as exaccions d'os bachibuzuks (clausulas adicionals). As potencias europeas demandan reformas y estableixen una Chendarmería en a rechión con presonal forano. A l'anyo vinient s'elabora un cens.

Os turcos reaccionan a la intervención prenendo actitutz nacionalistas y en 1906 se creyó en Salonica un Comité otomán d'a libertat con miembros que dimpués tenioron un papel clau en a revolución d'os Chóvens turcos en 1908.

As guerras balcanicas[editar | editar código]

En a Primera Guerra Balcanica (octubre de 1912-marzo de 1913) os serbios conquerioron o territorio de l'actual republica de Macedonia, os griegos conquieren l'actual rechión griega de Macedonia. Os bulgaros, que han combatito en l'este a los turcos, atacan en chunio a los serbios y griegos pa ocupar Macedonia encomenzando a Segunda Guerra Balcanica. Os bulgaros pierden a guerra y con ella a posibilidat d'anexionar-se Macedonia, que os bulgaros consideran un territorio historicament bulgaro. Esto fará en o futuro que os bulgaros interviengan contra os serbios y griegos en a Primera y Segunda guerras mundials como aligatos d'os alemans d'Alemanya y Austria.

As dos guerras mundials[editar | editar código]

Bulgaria entra en a Primera Guerra Mundial en o bando d'as Potencias Centrals en octubre de 1915 y ocupa Macedonia con l'aduya d'as tropas alemanas forachitando a las tropas serbias. Tres anyatas dimpués o Frent Oriental se creba y Macedonia torna a Serbia en aplicación d'un armisticio.

En o periodo d'entreguerras Macedonia, como part de Serbia, no se beneficia de garra estatuto especial en o Reino d'os Serbios, Crovates y Eslovens. Bulgaria preba de mantener l'achitación en Macedonia dica fins d'a decada de 1920.

En o territorio meridional de Macedonia os griegos imposan una campanya d'helenización que durará pa cutio. Os macedonians actuals de Grecia son muito asimilatos a los griegos.

En 1941, mientres a Segunda Guerra Mundial, Bulgaria troba l'inte d'ocupar Macedonia como aligata de l'Exe. Manimenos, l'aria poblata por albaneses en o norueste ye ocupata por os Italia, enamplando asinas a suya colonia d'Albania. Os bulgaros prebarán d'asimilar a los macedonians.

Macedonia como republica yugoslava[editar | editar código]

Gnome-searchtool.svg
Ta más detalles, veyer l'articlo Republica Socialista de Macedoniaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Tito creya una nueva Yugoslavia més plural en a que aturan muitas aspiracions d'os nacionalistas serbios y crovates. D'esta traza oficialment s'acepta a existencia d'identidatz nacionals que no yeran aceptatas por os nacionalismos crovate y serbio. Os musulmans de luenga serbocrovate son consideratos “musulmans” (re-prenendo una prebatina d'o periodo austro-hongaro, fendo-los diferents tanto d'os crovates como d'os serbios) y os eslavos de Macedonia son consideratos “macedonians”. Tito desepara Macedonia d'o territorio de Serbia con categoría de Republica (Republica Socialista de Macedonia), y da autonomía a dos rechions de Serbia con una alta proporción de minorías no serbias, Voivodina y Kosovo. En 1946 o luengache macedonián esdevién a luenga oficial d'a Republica de Macedonia, y tien como base a parla de Prilip.

En a zaguera decada d'existencia de Yugoslavia i habió reivindicacions nacionalistas albanesas. Os albaneses reclamaban a formación d'una republica albanesa con o Kosovo y a zona de mayoría albanesa de Macedonia.

Quan en 1990 Yugoslavia ya ye camín d'esminglanar-se, os macedonians s'amuestran prudents.

Macedonia independient[editar | editar código]

Gnome-searchtool.svg
Ta más detalles, veyer l'articlo Republica de Macedoniaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Dimpués d'as esleccions libres de noviembre-aviento de 1990, s'aprueba en chinero una declaración de sobiranía. Kiro Gligorov, o dirichent d'a Liga d'os Comunistas de Yugoslavia, ye esleito president d'a Republica. Dica 1991 no s'organiza un referendum d'independencia. Os albaneses boicoteyoron o escrutinio, y con o 75% d'os votants o resultato estió de 95% a favor d'a independencia. Bulgaria estió o primer estato en reconoixer a la Macedonia independient, o 16 de febrero de 1992.

Encara que os nacionalistas serbios se planteyaban encomenzar a guerra en Macedonia desacherando o numero de serbios que i residiban, no teneban medios porque yeran ocupatos en guerras en Croacia y Bosnia y Herzegovina.

O problema principal d'a Macedonia independient en politica internacional estió a hostilidat de Grecia. Grecia tien una rechión dita Macedonia con una minoría eslava en camín de desapareixer por asimilación. Grecia desichiba que Macedonia faiga constar en a suya Constitución que no tien garra reivindicación territorial y que se cambeye o nombre, (l'argumento ye que tenendo nombre de Macedonia reclamaba a rechión con o mesmo nombre y que o toponimo ye d'orichen griego y no lo podeban fer servir como denominación d'estato os eslavos, que no son griegos).

En abril de 1993 un compromís permite que Macedonia siga miembro d'a ONU y ocupe o suyo puesto con o nombre d'Antiga Republica Yugoslava de Macedonia.

Dimpués d'a guerra d'o Kosovo, os albaneses han prebato de fer-sen con o control de zonas d'o norueste de Macedonia y i ha habito combates en Titovo.

Bells macedonians famosos[editar | editar código]

Referencias[editar | editar código]