Lituans

De Biquipedia
Ir ta: navego, busca
Lituans
Lietuviai
Valancius.jpgRimas Kurtinaitis.jpgAntanas Baranauskas.jpg
Motiejus Valančius · Rimas Kurtinaitis · Antanas Baranauskas
Población total
4-6 millons
Rechions con comunidatz importants
Flag of Lithuania.svg Lituania 3.000.000
Flag of the United Kingdom.svg Reino Unito 100.000
Flag of Ireland.svg Irlanda 50.000
Flag of Germany.svg Alemanya 40.000
Flag of Latvia.svg Letonia 25.000
Flag of Poland.svg Polonia 25.000
Idiomas
Lituán
Relichión
Cristianismo

Os lituans habitan en Lituania y en chicotz territorios de l'ueste de Belarrusia. Se calcula que son 4-5 millons, estando mayoritarios en Lituania. Son cristians catolicos y parlan una luenga indoeuropea d'a branca balta.

Historia[editar | editar código]

A etnochenesi d'os lituans se troba en a fusión de dos confederacions tribals u etnias baltas antigas, os Samotichios y os Auskshataitians, que resistiban a invasión d'as ordens militars chermanas que colonizaban y cristianizaban a zona.

Os lituans encomienzan a tener importancia cheopolitica en 1236 quan vencioron a lo gran mayestre d'a Orden Teutonica Volkwin. Mindaugas, sobirán lituán dende 1239 dica 1263 fació a guerra contra os alemans de l'ueste y norte y contra os rusos a l'este. Encara que fue baptizato en 1251 y fue nombrato "gran duque" en 1252 abchura d'o catolicismo por desaveniencias con os teutonicos. Baixo o suyo reinato os lituans pactan por primera vegata con países eslavos ortodoxos: Grodno y Novogrudok, que asinas se liberan d'o vasallache a los mongols.

Gediminas (1316-1341) situa a capital en Vilna y anexiona a lo ducato Polotsk, Vibebsk, Minsk, Moguilov y Brest. As arias eslavas anexionatas a lo ducato de Lituania prefiguran l'actual Belarrusia.

Alguidas y Keiskutis se reparten o poder. Os lituans plegan a conquerir amplas zonas de l'actual Ucraina: Volhinia, Podolia, a rechión de Kiev (1361) y la rechión de Briansk. Pa tener as espaldas libres d'os ataques d'a orden Teutonica (os caballers teutons entroron en Vilna en 1377) pactan con os polacos. Os polacos y lituans tienen una unión dinastica a fins d'o sieglo XIV. Ye n'ixos tiempos quan se traduce o "Libro d'as Marabillas d'o Mundo" de Chuan de Mandevilla a l'aragonés y parlan d'o "Reino de Cracovia y Lituania" chunto con a Rus de Kiev, Livland (Livonia) y Silistra como países que s'han d'atravesar pa ir a "Tartaria":

Et si he seido enlas otras t(ier)ras comarq(u)antes en este costado / como enla t(ier)ra de Rusia / enla t(ier)ra de Niflan / et en(e)l Regno de Craco & de Letto / Et en(e)l Regno de Rastan et en muchos ot(r)os logares enlas marq(u)as /[1]

En 1386 a reina polaca Doviches fue compromesa en matrimonio con o duque Jogaila (Jagellón) fillo de Keiskutis. Con o tractato de Vilna en 1401 se sella a Unión Polaco-Lituana y Jogaila, convertito a lo catolicismo reina en Polonia como Ladislau II Jagellón. Jogaila confía contina como sobirán de Lituania pero en confia o gobierno a lo suyo primo Vytautas (fillo d'Argirdas).

Con Vytautas (1392-1430) Lituania plega a la suya mayor extensión, con a conquiesta de Yedisán a los tartres, plegando a la Mar Negra. En estos tiempos se produce a diferenciación dentro d'os eslavos orientals entre os rusos, sozmesos a los mongols u tartres y los rutens, dentro d'o estato lituán. Estió tamién Vytautas qui deixó entrar a los chodigos asquenazís en 1388-1390 seguindo o eixemplo d'o polaco Casimiro lo Gran concedendo-lis privilechios.

Dende o sieglo XV a fins d'o sieglo XVIII a historia de Lituania ye común con a historia de Polonia, y Lituania pierde grau de sobiranía. Dimpués d'a Unión de Lublin (1569) se creya una dieta común pa Lituania y Polonia. O Gran Ducato Lituania a més pierde os territorios meridionals, (l'actual Ucraína), que pasan a Polonia, encomenzando a deseparación dentro d'os rutens entre bielorrusos y ucranians. En os sieglos XVII y XVIII Vilna y a suya rechión se polonizan muito. Muitos lituans prenen a luenga polaca y arriban muitos polacos. Samotichia permaneix menos polonizata y ye on millor se conserva a luenga lituana.

En os repartos de Polonia o Ducato de Lituania pasa a mans rusas. En 1795 tota l'actual Lituania pasa a Rusia fueras d'os territorios d'a marguin ezquierda d'o Niemen (Que pasan a Prusia). Baixo dominio ruso os rutens son consideratos rusos y os lituans polacos por estar catolicos. Os lituans actuan refirmando as sublevacions polacas en 1831 y en 1863 durament esclafatas. Os primers disturbios independentistas lituans no pro-polacos estioron os de 1905.

En 1915 os alemans conquirioron Lituania que yera devastata por a retirata d'as tropas imperials rusas. Dende 1917 se reunió una dieta Lituana. Os alemans reconoixioron un estato lituán dimpués d'o tractato de Brest-Litovsk.

Dimpués de l'armisticio de l'11 de noviembre de 1918 os bolcheviques denuncian o tractato de Brest-Litovsk y prenen Vilna en chinero de 1919. Proclaman una republica sovietica, que remata en verano por l'acción conchunta d'os nacionalistas lituans, os polacos y os alemans. Dende alavez Lituania queda implicata en a Guerra Polaco-Sovietica. Os polacos entran en Vilna o 20 d'abril de 1920, pero os rusos tornan en chunio. O 12 de chulio de 1920 os rusos firman con Lituania o tractato de Moscú y reconoixen a independencia de Lituania con Vilna como capital. Manimenos a segunda contraofensiva polaca, encomenzata en agosto fa que os polacos creyen una falca entre Lituania y lo territorio ocupato por os sovieticos, prenendo Vilna o 9 d'octubre de 1920. A capital d'a Lituania independient d'entreguerras será Kaunas.

Poco enantes d'a segunda Guerra Mundial Alemanya querió fer servir a Lituania contra Polonia pa fer-li pinza, pero Lituania no querió implicar-se. D'esta tranya o Tercer Reich se desentendió de Lituania y la deixó en mans d'a Unión Sovietica. En octubre de 1939 i habió un tractato d'aduya mutua entre a Unión Sovietica y Lituania. Lituania aceptó bases sovieticas y a plegata de colons a lo suyo territorio, Manimenos as tropas sovieticas ocuporon o territorio Lituán o 15 de chunio de 1940, primero creyoron un gobierno titere y dimpués adhiben Lituania a la URSS. Os liders lituans que no s'exellan en Europa Occidental son deportatos ta Siberia. A nueit d'o 14-15 de chunio de 1941 30455 miembros d'a intelichentsia (exmiembros d'a guardia nacional y funcionarios) son deportatos ta Siberia. Atros deportatos y 5000 executatos poco enantes que os sovieticos fuyisen escopeteyatos d'o ataque alemán fan puyar a zifra de perdugas humanas a 45.000 lituans en total.

O exercito royo tornó en 1944, con ocupación de Vilna o 13 de chulio, completando-se a ocupación d'o país en octubre. Enantes de l'ocupación sovietica uns 80.000 lituans heban fuyito y fuoron a parar a l'ueste d'Alemanya, pero os 60.000 que quedoron en l'este d'Alemanya fuoron ensopinatos por os sovieticos y deportatos ta Siberia.

En os primers anyos d'ocupación sovietica se produció una rusificación forzata. Entre 1945 y 1946 uns 145.000 lituans fuoron movitos dende lur tierra ancestral. En marzo de 1949 se produció una tercera deportación masiva, en relación con una colectivización agricola forzata. Uns 60.000 fuoron deportatos ta Siberia y norte de Rusia.

Lituania declaró a suya independencia enantes que se descomponese a URSS en 1991. Muitos rusos de Lituania se'n fuoron.

Referencias[editar | editar código]

Bibliografía[editar | editar código]