Linia Curzon

De Biquipedia
Ir ta: navego, busca
A Linia Curzon en 1945.

La linia Curzon ye una linia de demarcación u muga proposata mientres a Guerra ruso-polaca de 1919-1920 por o menistro d'Asuntos Foranos d'o Reino Unito, Lord Curzon, como una posible linia d'armisticio entre Polonia a l'ueste y a Rusia a l'este. A nueva Unión Sovietica no acceptó iste plan Curzon, que no chugó asinas dengún papel en a fixación definitiva d'a muga entre os dos países en 1921 por a negativa de Polonia. En zaguerías, o Tractato de Riga de 1921 dixó a Polonia alto u baixo 135.000 km² de territorio a l'este d'a linia (a muga definitiva pasaba a una distancia d'arredol de 200 km a l'este d'a Linia Curzon).

Sindembargo, Stalin emplegó a existencia d'ista linia como un argumento en as suyas descusions con os Aliatos en 1942-1945 mientres a Segunda Guerra Mundial, mas que mas en a Conferencia de Yalta. Stalin, en as suyas descusions con os Aliatos, lis deciba que a Unión Sovietica no podeba acceptar menos territorio que o territorio que Lord Curzon ya li heba concedito en 1919.

Ista linia se correponde, alto u baixo, a la muga alcordata entre o reino de Prusia y o Imperio ruso en 1797, dimpués d'o Tercer reparto de Polonia, y yera amás a zaguera muga reconoixita por o Reino Unito entre Polonia y Rusia. Antiparte, a linia Curzon teneba un trazato muit pareixito a la muga alcordata secretament entre a Unión Sovietica y o Tercer Reich en o dito pacto Molotov-Ribbentrop. Asinas, a linia que deseparaba as zonas d'ocupación sovietica y alemana dimpués d'a redota polaca en a invasión de Polonia en 1939 teneba globalment o mesmo trazato que a Linia Curzon, encara que con bellas diferencias arredol de Białystok a o norte y en Galitzia a o sud.

A Linia Curzon teneba dos versions: a versión «A» y a versión «B». A versión «B» dixaba Lwów (hue Lviv) a Polonia, mientres que a versión «A» d'a linia, que estió a versión emplegata en 1945 como base ta a muga definitiva entre Polonia y a Unión Sovietica (encara que con bellas chicotas diferencias) cedeba ista ciudat a la Unión Sovietica.

Ta la comprensión d'a polemica sobre l'atribución de Lwów a uno u atro país, cal parar cuenta de bells feitos:

Gosa decir-se que a Linia Curzon representaba una muga etnica ente a Polonia catolica a l'ueste y a Belarrusia y a Ucraína ortodoxas a l'este, ixa no yera a intención de Lord Curzon quan proposó ista linia, y os suyos oríchens yeran nomás que diplomaticos y historicos (a tercera partición de Polonia). Sindembargo, sí que ye verdat que, con bellas excepcions, a Linia Curzon yera prou amanata a una linia de deseparación entre rechions de poblacions d'orichen etnico variato pero con predominancia de polacos a l'ueste y rechions de poblacions variatas pero a on os polacos yeran minoritarios a l'este.

Historia d'a Linia Curzon[editar | editar código]

Quan remató a Primera Guerra Mundial, os Aliatos alcordoron o restablimiento d'un estato polaco independient, que caldría que se formase con territorios que dica l'inte heban perteneixito a los imperios ruso, alemán y austriaco. O Tractato de Versailles sinyato en 1919 nomás deciba respective d'a restauración de Polonia que a suya muga oriental sería «determinata ulteriorment». En ixas envueltas, os territorios situatos en as mugas de Polonia con os suyos vecins a l'este yeran habitatos por una población mezclata de polacos, lituans, chodigos, ucraineses y belarrusos, encara que denguno d'istos grupos constituiba una población clarament mayoritaria en garra territorio homochenio. Asinas, en nombre d'os Aliatos, Lord Curzon proposó en 1920 una linia que, en pasando por Brest-Litovsk, marchaba dende Grodno dica Lwów, dixando ista zaguera ciudat a Polonia (a Linia "B" d'o plan). Sindembargo, una anyada dimpués, iste esquema fue modificato por un desconoixito funcionario d'o Menisterio d'Asuntos Foranos d'o Reino Unito, fendo asinas que no s'atribuise a ciudat a Polonia. Iste feito estió determinant con posterioridat mientres as negociacions sobre a muga de Polonia que se facioron en a Conferencia de Teherán y en a Conferencia de Yalta en os anyos 1940

Con o esboldregamiento d'o Imperio ruso y con a Guerra civil rusa que s'escaició dimpués d'a Revolución rusa de 1917, no heba en ixas envueltas garra Gubierno ruso estable con qui se podese negociar a muga oriental polaca. Sindembargo, uno d'os primers actos d'o nuevo Gubierno revolucionario ruso estió a denuncia publica d'os tractatos que heba sinyato o Imperio ruso con prusians y austriacos ta repartir-sen Polonia; en conseqüencia, churidicament ixo comportaba que Polonia recuperaba os territorios que teneba en 1772, quan se facioron as particions. Pero tamién pasaba que o rechimen bolchevique ruso pretendeba invadir Polonia ta estendillar a revolución por o corazón d'Europa, mas que mas en a convulsa Alemanya de zaguerías d'os anyos 1910, quan a Republica de Weimar no yera prou consolidata. En istas circunstancias, a guerra yera inevitable y en zaguerías esclatoron as hostilidatz a finals de l'anyo 1919.

En aviento de 1919, os Aliatos facioron ista declaración:

Os prencipals poders Aliatos y asociatos reconoixen que ye important de rematar tan pronto como siga posible con as condicions d'incertidumbre politica en as que a nación polaca se troba actualment y, sin prechuzgar as decisions que habrán en lo venidero de precisar as mugas orientals de Polonia, declaran por a present que reconoixen o dreito d'o Gubierno polaco, seguntes as condicions definitas d'antis mas por o Tractato con Polonia d'o 28 de chunio de 1919, a organizar una administración regular d'os territorios de l'antigo Imperio ruso situatos a l'este d'a linia descrita debaixo. Os dreitos que Polonia siga capable d'establir en os territorios a l'este d'a dita linia son expresament reservatos.

En mayo de 1920, mientres a Guerra ruso-polaca de 1919- 1921, os bolcheviques teneban a superioridat y dentroron en o territorio polaco, plegando amán de Varsovia; en chulio, os polacos solicitoron a os Aliatos que intervenisen. L'11 de chulio, Lord Curzon of Kedleston proposó a o Gubierno sovietico un alto o fuego a o largo d'a linia que heban sucherito l'anyada anterior. Os sovieticos, en creyer que iban ganando a guerra, refusoron a propuesta y continoron con a guerra. Sindembargo, en agosto os sovieticos fuoron redotatos en as puertas de Varsovia, reblando y retirando-sen. Como conseqüencia, sinyoron o Tractato de Riga en 1921, acceptando una muga situata muit a l'este d'a Linia Curzon, dixando a Polonia no nomás Lwów sino que tamién Wilno (hue Vilnius, en Lituania). En a rechión d'arredol de Wilno, dita Lituania Central, se fació en 1922 un referendum, que comportó que s'adhibiese a Polonia, d'alcuerdo con o 65 % d'os votos. Ista nueva muga polaco-sovietica fue reconoixita por a Sociedat de Nacions en 1923 y fue tamién refirmata por quantos alcuerdos entre os dos países.

En o pacto Molotov-Ribbentrop, sinyato en agosto de 1939 entre Tercer Reich y a Unión Sovietica, istos dos países alcordaban repartir-sen Polonia, en fixando una linia marcata por o río San, o río Vistula y o río Narew. Quan a Wehrmacht d'o Tercer Reich invadió Polonia en setiembre, prencipiando asinas a Segunda Guerra Mundial, o Exercito polaco s'esboldregó, cesando a suya resistencia, y tropas d'o Exercito Royo sovietico aproveitoron ta dentrar en territorio polaco, anexionando-se os territorios que se trobaban a l'este d'a linia Curzon amás de Białystok y d'a Galitzia oriental, territorios que fuoron adhibitos a la Republica Socialista Sovietica de Belarrusia y a la Republia Socialista Sovietica d’Ucraína dimpués d'uns pseudo-referendums, y bells cientos de mils de polacos y chodigos fuoron deportatos enta l'este d'a Unión Sovietica. En chulio de 1941, con a invasión d'a Unión Sovietica en a Operación Barbarroya, istos territorios fuoron ocupatos por os alemans, que exterminoron a la mayor parte d'a población chodiga en l'Holocausto.

En 1944, as tropas sovieticas reconquirioron a Polonia oriental a los alemans. Alavez, en forma unilateral, a Unión Sovietica declaró que l'antiga frontera chermano-sovietica trazata en 1939 (ye decir, alto u baixo a Linia Curzon) esdevendría a nueva muga entre a Unión Sovietica y Polonia, encara que ista vegata os sovieticos acceptaban que Białystok fese parte d'o territorio polaco. O Gubierno polaco exiliato en Londres s'oposó vigorosament, y en a Conferencia de Teherán y en a Conferencia de Yalta con Stalin tanto Winston Churchill como Theodore Roosevelt demanoron a Stalin que rectificase a suya posición, mas que mas respective d'a ciudat de Lwów, pero Stalin refusó de cambear-la. Asinas, a Linia Curzon modificata esdevenió a muga oriental definitiva de Polonia, y fue reconoixito asinas por os Aliatos en chulio de 1945.

Quan a Unión Sovietica desapareixió en 1991 con a disolución d'a Unión Sovietica, a Linia Curzon esdevenió a muga oriental de Polonia con Lituania, Belarrusia y Ucraína.

Se veiga tamién[editar | editar código]